Ti ki Kabedowa me Intanet i Tic me Pwony—“Lapeny ma Kigamo me Baibul”

But jw.org ma wiye tye ni “Pwony me Baibul” tye bene ki ka ma wacci “Lapeny ma Kigamo me Baibul.” Ka wangeyo lapeny ma kimaro penyo, ci waromo waco ki rwod ot ma tye ki peny ni ocit i Kabedowa me Intanet wek onong lagam ma jenge i Baibul. Watwero bene tic ki lapeny magi me cako lok ka watye i tic me pwony. Watwero yero lapeny mupore ki miti pa dano ma i wang ticwa, ci wapenyo rwod ot gin ma en tamo, ka dong wanyutte gin ma Baibul waco, kun watiyo ki tam ma i jw.org. I ngeye watwero tite nyo nyute kit ma wanongo kwede lagam ma wamiyo-ni. Yo mukene aye me kwano lagam atir ki i Kabedowa me Intanet. Dako pa laneno me adwol acel onongo adwogi maber ki i waco bot rwod ot ni: “Jo mapol gipenye ni, ‘Lubanga aye mono kelo can i loboni?’ Imito ngeyo lagamme i cekon 51 keken?” Ci dong tuko dwan ma kimako pi lagam me lapeny meno ki i cimme. En giko lokke ki nyuto dul me 11 me buk me Baibul Pwonyo.