Yo Manyen me Miyo Caden i Dye Lwak
1. Kicuko cwiny kacokke mogo ma gitye ki kabedo ma dano mapol woto iye ki tyengi me timo ngo?
1 Kicuko cwiny kacokke mogo ma gitye ki kabedo ma dano mapol woto iye ki tyengi, me yubbe me miyo caden i dye lwak, kun gitiyo ki meja nyo lalor bukke. Ka kitiyo ki lalor, latit kwena acel myero obed nyo ocung cok ki lalor meno. Ento, mitte ni lutit kwena aryo aye myero gucung cok ki meja. Jo ma gucung cok ki meja nyo lalor-ni myero gubed jo ma jolo dano, gibwunyo, dok cwinygi yom. Ka dano mo oketo tamme me neno bukke ma tye i wi meja nyo lalor, latit kwena acel twero cako lok bote kun wacci: “Itamo ni Baibul loko ningo i kom pwony man?” Latit kwena acel nyo gin aryo giromo cung bor manok ki lalor bukke ma nongo gimiyo caden ma pe guyubbe iye bot dano.
2. Tit gin mutimme na nyuto ni miyo caden i dye lwak kun kitiyo ki meja nyo lalor bukkewa pire tek.
2 Yo me miyo caden man onyayo wel lutino kwan me Baibul. Latin kwan acel me univaciti oyero me kwedo lok me tyeko kwanne i kom Lucaden pa Jehovah, ento oyenyo Ot me Ker kwe. I nge cabit acel, en oneno meja ma kicano iye bukkewa i gang kwangi. Cutcut kicako kwano Baibul kwede, kombeddi en dong otyeko nongo batija dok cito ka tito kwena kun tiyo ki yo man.
3. Lutit kwena mogo giwinyo nining i kom yo me miyo caden man?
3 Lamego mo acel ma dong onongo mit me tito kwena kun tiyo ki yo man owacci: “Jo mogo gibino i meja nyo lalor ka gamo magajin ma pud okatti nyen. Jo mukene nongo peya guwinyo pi Lucaden pa Jehovah. Atamo ni yo man pud dong biweko wabinongo dano mapol.” Lamego mukene dok owacci, “Man yo manyen me miyo caden pien dano bino boti kadi bed pe gitye ki miti madwong i lokwa.”
4. Pingo bedo ber ka kiketo meja ki lalor bukkewa i kabedo acel i nino moni, ki i cawa moni cabit ki cabit?
4 Bedo ber ka kiketo meja ki lalor bukkewa i kabedo acel i nino moni, ki i cawa moni cabit ki cabit. Macalo adwogine, dano gibingiyo ki neno meja nyo lalor bukke i kabedo meno ci motmot gibicako bedo agonya me cito ka penyo lapeny ki nongo bukke. Tika kacokkewu dong oyubo yub me miyo caden i dye lwak? Ka dong gutimo, itwero nywako i yub man me tito “lok i kom Ker pa Lubanga” i bor piny.—Luka 9:60.