Watwero Cako Kwano Baibul ki Jo ma Gamo Magajinwa Kare ki Kare

1. Pingo dul pa Jehovah bedo ka cuko cwiny lutit kwena me tero magajin bot jo ma giye kwanone kare ki kare?

¹ Tye dano mapol ma pe giye ni wakwan Baibul kwedgi, ento gimaro kwano magajinwa. Pi meno, dul pa Jehovah bedo ka cuko cwiny lutit kwena me tero magajin botgi kare ki kare. Ka dano kwano magajin kare ducu, pol kare gicako dongo miti pi Lok pa Lubanga. (1 Pet. 2:2) Mot mot, gin mo ma gukwano twero gudo cwinygi, weko giye kwano Baibul.

2. Watwero dongo miti pa jo ma gigamo magajinwa kare ki kare nining?

² ‘Oony’ Pii i Kodi me Ada: Ma ka weko mere magajin bot rwod ot ci ia woko, nywak lok kwede, wek idok lareme. Man bikonyi me niang kit me kwone, mitine, ki niyene, dok bikonyi me lok bote ki diro. (Car. 16:23) Yubbe pi lim ducu. Ka twere, lok i kom pwony acel ki ginacoya ma rwatte ki i magajin, man rom ki onyo pii i kodi me ada ma tye i cwinye. (1 Kor. 3:6) Co nino dwe ma icito ka limme, bukke ma iweko bote, ki pwony kacel ki ginacoya ma wunyamo.

3. Myero wadok cen ka limo jo ma gigamo magajinwa tyen adi?

³ Myero Wadok Cen Tyen Adi? Myero idok cen dwe ki dwe wek water magajin manyen bot jo ma gigamo kare ki kare. Ento, ma lubbe ki kwoni nyo miti pa dano-nu, itwero dok cen tyen mapol i dwe moni. Me labolle, cabit acel nyo aryo i nge weko magajin bot ngat moni, iromo dok cen ci iwacci, “Abino ka limmi pi kare manok wek anyuti pwony mo ma pire tek ki i magajin ma aweko ca.” Man bitugo miti pa dano-nu me kwano pwony meno. Ka en dong okwano pwony meno woko, itwero penyo tamme iye ci wunyamo wiye wiye. Nyo ka dano-nu maro kwano bukkewa, itwero dok cen ci wanyute trak, brocuwa, nyo buk ma watye ka terone i dwe meno.

4. Ngo ma myero watim kare ki kare me niang ka jo ma gigamo magajinwa gitye ki miti me kwano Baibul?

⁴ Pe ikur ni rwod ot aye openyi ni emito kwan. In aye myero ipenye. Kadi bed en okwero kwano Baibul i kare mukato angec, kare ki kare itwero nyutte pwony me “Lapeny ma Kigamo me Baibul” ki i Wi Lubele ci ineno ka en ye nyamone kwedi. Gwok nyo iromo cako kwan kwede ki i nyim doggolane. Ento, ka pe itwero cako kwan kwede, iromo medde ki tero magajin bote wek mitine odong.