Kony Latit Kwena Lawoti ka Wutye i Tic me Pwony

1. Watwero lubo kit pa lakwena Paulo ka watye ka tic ki jo mukene i tic me pwony nining?

¹ Lakwena Paulo oneno kare ma en tye kacel ki luye luwote calo kare maber pigi me ‘cuko cwinygi kekengi.’ (Rom. 1:12) Ka itye ka tic ki latit kwena mukene i tic me pwony, tika ikwanyo kare me cuko cwinye kun ikonye ka mitte? Me kaka ling alinga, pingo pe inywak lok kwede i kom gin ma konyi me bedo latit kwena mucwiny?

2. Waromo timo ngo me jingo cwiny latit kwena ma watye ka tic kwede, dok pingo man pire tek?

² Jing Cwinye: Lutit kwena mogo gilwor, dok man nen woko ka maleng i wanggi kun bene winye i dwangi. Waromo jingo cwinygi ki miyogi pwoc ma a ki i cwinywa. Yo ango mukene ma tye me jingo cwiny dano? Laneno mo ma woto awota maro tito bot ngat ma en tye ka tic kwede pi lworo ma en tye kwede ki kit ma en lego pi kony me loyo lworo meno. Omego mukene oloko i kom gin ma konye me bedo ki tekcwiny ni: “Cak ki bwunyo. I kine mukene, kong alego wek bwunyo obed yot.” In itye ki gin mo ma dong okonyi me bedo ki tekcwiny i tic me pwony? Tit bot latit kwena ma itye ka tic kwede.

3. Tam ango ma itwero nywakone ki latit kwena lawoti ma twero konye me doko latit kwena mucwiny?

³ Wule Tam i kom Yo me Pwony Mapatpat: Dong inongo yo nyo lapeny mo mayot me cako lok, gwok nyo ma kwako jami ma tye ka timme i wang ticwu? Gwok nyo iketo alokaloka i kom kit me cako lok ma kimiyo i Ticwa Me Ker ci okelo adwogi maber? Tit bot latit kwena lawoti. (Car. 27:17) Ka wutye ka dok cen ka limo ngat moni, itwero tito bot lawoti lok ma wubinyamone ki kit ma dong iyubbe kwede. I nge kwano Baibul ki ngat moni, iromo tito gin mumiyo iyero pwony, ginacoya, nyo yo me pwony moni me cobo miti pa latin kwanni.

4. Pingo myero wabed ki miti me konyo lutit kwena luwotwa?

⁴ Lutit kwena me cencwari me acel pe onongo gitye ki miti me konyo jo ma pe i niye keken. Gin guniang bene ni cuko cwiny luye luwotgi pire tek. (Tic 11:23; 15:32) Lakwena Paulo opwonyo Temceo dok ocuk cwiny Temceo me nywako jami ma en opwonyo ki jo mukene. (2 Tem. 2:2) Ka wiwa pe owil me timo gin maber bot Lukricitayo luwotwa ka watye i tic me pwony, ci wabimedo yomcwinygi ki dirogi kun wayomo cwiny Wonwa me polo bene.—Ibru 13:15, 16.