Dongo Dirowa i Tic me Pwony—Mi Kony Bot Latit Kwena Lawoti

Gin Mumiyo Pire Tek: Yecu onyuto ka maleng ni tito kwena kacel ki ngat mukene pire tek. Pi meno, i kare ma ocwalo lupwonnyene i nyime ka tito kwena, ocwalogi me cito ki aryo aryo. (Luka 10:1) Latit kwena lawoti twero miyo kony boti ka ikemme ki peko mo nyo pe ingeyo kit me dok i lapeny pa rwod ot. (Latit. 4:9, 10) En twero nywako kwedi jami mutimme i kome kun miyo tam kicel kicel ma twero konyi wek idok latit kwena mucwiny. (Car. 27:17) En bene twero cuko cwinyi ka wutye ka boko lok kun wuwoto i kin gangi.—Pil. 4:8.

Kit me Timone:

Ter iti ka winyo lok pa lawoti ka en tye ka tito kwena. (Yak. 1:19) Ka lawoti tye ka kwano ginacoya moni, lub ki i Baibulli. Man bimiyo ibedo atera me miyo kony ka mitte.
Ti ki ryeko me niang maber cawa mupore piri me lok. (Car. 25:11) Ka icito ki latit kwena mukene ka kwano Baibul ki latin kwanne, tam ma imiyo kicel kicel bibedo me kony. Ento ka wutye ka pwony i ot ki ot, ka dong kare pa lawoti me lok, bedo ber ka iweko en oloko ki rwod ot. Ngene kene ni ka en pud latit kwena manyen nyo pe ngeyo kit me dok i lapeny pa rwod ot, ci bibedo ber ka imiyo bote kony. Ento kadi bed itye ka tic ki latit kwena mukene i ot ki ot, dok cen ka lim, nyo kwano Baibul ki ngat mo, pe ingol lok pa lawoti, pe icak lok tektek, dok pe ikel pwony mapat ki ma en tye ka lok iye.
Tite jami mutimme i kwoni ma twero bedo me kony. Ka ce itwero miyo bot latit kwena lawoti tam mo me kony wek oyub pwonye, pe ikwer miyone. (Car. 3:27) I cawa mupore, itwero cako ki penye ni: “Itamo ni pwonywa owoto nining?” nyo “Tika atwero mini tam mo?” nyo “Gin ma amaro timone pol kare aye en.” Wi opo ni kadi bed i kare mukene dano gijolo tam, ento cwinygi balle woko ka ibedo ka lok i kom bal ducu ma gitimo.

Tem Tic ki Diro Man i Dwe-ni:

I nge tic ki ngat moni i tic me pwony, tit bote gin maber ma en owaco nyo otimo ma okonyi mada.