In Mono Itye Atera me Loko Yo me Pwonnyi?
1. Alokaloka ma tye ka timme i lobo-ni mito ni wan walokke i yo mene?
1 I 1 Jo Korint 7:31, Baibul oporo lobo-ni ki wi abam ka ma lutuk goga mapatpat gilokke iye aloka. Alokaloka ma tye ka timme i lobo-ni mito ni wan bene walok kit me tito kwena, tic ki cawawa, ki dong cako lok. In mono itye atera me loko yo me pwonnyi?
2. Pingo myero walok yo me pwonywa wek wawot kacel ki dulwa?
2 Yo me Tito Kwena: Kacokke pa Lukricitayo pol kare loko kit me tito kwena ka mitte. I kare ma Yecu ocwalo lupwonnyene tyen mukwongo, en owacci pe guwot ki kicaa nyo cente mo. (Mat. 10:9, 10) Ento lacen, oloko cikke-ni pien ongeyo ni kibiketo gero i kom luticce i kare me anyim ka ticgi me tito kwena omedde i wang tic mukene. (Luka 22:36) I cencwari mukato-ni, dul pa Jehovah otiyo ki yo me tito kwena mapatpat calo tic ki kad, redio, nyo lakub dwan ma kiketo i wi mutoka—ma lubbe ki ngo ma onongo mitte i kare meno. I kare-ni kit ma nongo dano paco tek-ki, kitye ka cuko cwinywa me tic i kabedo ma guro wi lwak mapol, ki miyo caden ma pe wayubbe iye, medo i kom tic i ot ki ot. Kicuko cwinywa bene me cito i ot ki ot i otyeno ka i dyeceng nongo dano tye i dog ticgi. Ka lawala me cwiny pa Jehovah bedo ka lokke, in bene iwoto kacel ki lawala meno?—Ejek. 1:20, 21.
3. Bedo atera me lokke konyowa nining me tic i wang ticwa maber?
3 Kit me Cako Lok: Peko ango ma tye ka gudo kwo pa dano ma i wang ticwu i kareni? Can lim? Kwo me ot? Lweny? Bedo ber ka wangeyo pekki ma dano me wang ticwa gitye ka wot ki iye wek wayubbe maber me lok kwedgi. (1 Kor. 9:20-23) Ka rwod ot owaco tamme, ma ka medde ki pwonywa, bedo ber ka waloko tamwa me winyo ki nywako lok i kom gin ma en tye ka lokone.
4. Pingo omyero walokke labongo galle?
4 Cokcok-ki, alokaloka madit bitimme i lobo-ni, ci twon can madit atika-ni bicakke. “Kare dong odoko ding.” (1 Kor. 7:29) Pud dong pire tek mada, me loko kit me pwonywa labongo galle, wek wacob ticwa man ma pire tek i kare mudong manok-ki!