Pe Ilwor Miyo Caden
1. Tekcwiny mitte me timo ngo, dok pingo?
1 In mono dong iling woko kare mogo ma pe imiyo caden i cukul pien ilwor ni dano binyeri? Adada, miyo caden mito tekcwiny, tutwalle ka ibedo dano ma lewic mako oyot. Ngo ma romo konyi?
2. Ka itye ka miyo caden i cukul, ryeko mitte i yo ma nining?
2 Ti ki Ryeko: Kadi bed ni itero cukul calo wang tic-ci, wi myero opo ni pe mitte ni icak nyamo lok me Baibul ki dano ducu kit ma itimo kwede ka itye ka tito kwena i ot ki ot. Ti ki ryeko me ngeyo kare mene mupore me cako lok. (Latit. 3:1, 7) Pwony mo ma wunyamo i kilaci nyo tic mo ma kimiyo i cukul twero miyo boti kare me tito niyeni. Gwok nyo latin kwan lawoti mo twero penyo pingo in pe inywako i yub mogo. Lukricitayo mukene gitito bot lupwonyegi i acakki me kwangi me cukul ni gin gitye Lucaden pa Jehovah dok gimiyo bot lupwonye bukke ma tito niyewa. Mukene giketo bukkewa i wi mejagi ka maleng wek lutino kwan luwotgi onen ci gupeny lapeny i kom bukke meno.
3. Itwero yubbe me miyo caden i cukul nining?
3 Yubbe Woko Con: Ka iyubbe woko con, ibimedde.ki bedo ki tekcwiny. (1 Pet. 3:15) Pi meno, tam i kom lapeny mogo ma kitwero penyone, dok ilwod kit ma itwero gamone kwede. (Car. 15:28) Ka twere, gwok Baibulli ki bukke mogo, calo buk me Reasoning, bukke me Young People Ask, ki gin akwana i kom cwec obed boti i cukul, ma nongo iromo tic kwedgi ka mitte. Peny lunyodoni wek wubed ki lapor mogo i kom jami ma timme i cukul i kare me woro pi jo me ot.
4. Pingo omyero imedde ki miyo caden i cukul?
4 Bed ki Neno Maber: Pe ibed ki tam ni lutino kwan luwoti bibedo ka nyeri kare ducu ka icako nyamo lok ada. Mogo i kingi giromo cako woro in pi tek cwinyi dok guromo ye winyo lok. Ento pe iwek cwinyi otur ka pe inongo ngat mo ma mito winyo lokki. Cwiny Jehovah bibedo yom pi yelleni. (Ibru 13:15, 16) Wot ki penyo en wek okonyi me ‘tito lok ki tekcwiny labongo lworo mo.’ (Tic 4:29; 2 Tem. 1:7, 8) Tam kong yomcwiny ma ibibedo kwede ka ngat mo owinyo lokki. Dano meno romo bene doko latic pa Jehovah!