Lutinoni Mono Gitye Atera?
1. Pingo mitte ni lutino kwan me cukul myero gubed atera?
1 Kare ducu ka lutinowa gidok i cukul i nge yweyo girwatte ki peko ki lyeto mogo manyen. Gin bene nongo gitye ki kare me miyo “caden me lok me ada.” (Jon 18:37) Mono gitye atera me timo man?
2. Wek gubed atera, gin ango ma lutinoni omyero gunge?
2 Tika lutinoni giniang lok ma kwako kwer mogo calo woro banderagi-ni, kwero nino madito me dini goba ki dong gin mumiyo nywako i kwer magi obedo gin marac? Tika giromo cung matek ka kiketo lyeto i komgi me medde ki kwan i rwom ma lamal, donyo i tim me cuna ki dong mato kongo nyo tic ki jami mogo calo jayigi-ni? Mono giwaco mere keken ni dinigi pe nywako i kwer mogo-ni, nyo gingeyo kit me tito niyegi maber?—1 Pet. 3:15.
3. Lunyodo giromo tic ki cawagi me Otyeno me Woro pi Jo me Ot pi konyo lutinogi nining?
3 Wuti ki Otyeno me Woro pi Jo me Ot: Ngene kene ni, wubedo ka nyamo peko manyen ma lutinowu giwoto ki iye i mwaka me kwangi. Ka ce itute me nyamo kwedgi pekki mogo ma romo bino i cukul ma peya tam me kwan manyen ocakke, man bicuko cwinygi. Pingo pe iti ki cawa me Otyeno me Woro pi Jo me Ot me timo man? Iromo penyo lutinoni i kom jami mogo ma ginongo ni kelo botgi par ma loyo ka gitye ka tam pi dok cen i cukul. Jami mogo ma wunyamogi yam con dok wuromo nwoyone kit macalo lutino nongo giwoto ki dongo dok niangogi woto ki medde. (Jab. 119:95) Wuromo poro gin ma timme i kwo ma nongo in itye ka poro bedo lapwony, lami tam, nyo latin kwan. Pwony lutinoni me ngeyo kit me miyo lagam ki i Baibul ki me tic ki buk me Reasoning ki bukke me Young People Ask. Lanyodo acel otiyo ki kare meno me nyutu bot lutinone kit me cako lok ki lapwonygi manyen i acakki me tam ducu ki me tito bote ni gin gibedo Lucaden pa Jehovah.—nen Watchtower me Decemba 15, 2010, pot karatac 3-5.
4. Lunyodo maryek gibitimo ngo?
4 Pekki mapat pat ma bulu ma Lukricitayo gitye ka wot ki iye tye ka doko “marac” medde ameda. (2 Tem. 3:1) Lunyodo maryek gicako tamo kit me lweny ki pekki pa lutinogi con. (Car. 22:3) Ma peya tam manyen me cukul ocakke, ti matek me konyo lutinoni wek gubed atera.