Pol Kare Bed Atera me Cako Kwano Baibul ki Dano

1. Cobo tic ma Yecu omiyo i Matayo 28:​19, 20 kwako timo gin ango?

¹ Yecu ominiwa tic me ‘loko dano me doko jo ma lubbe . . . , kun wapwonyogi.’ (Mat. 28:​19, 20) Pi meno, wamito ni cawa ducu wabed atera me cako kwano Baibul ki dano, ento pe i nino acel ma kiyubo me cako kwano Baibul ki dano ma bedo i tum cabit-ti keken. Tam magi ma kimiyogi ni romo bedo me kony.

2. Waromo cako kwano Baibul ki angagi?

² Cak Kwano Baibul ki Dano: Ka pol kare watemme me cako kwano Baibul ki dano, ci wabibedo ki kare ma pol bene me nongo acel mo. (Latit. 11:⁠6) Tika dong i temo penyo dano me cako kwano Baibul kwedgi? Kacokke mo acel i United States gutute me timo man pi dwe acel. Gubedo ki yomcwiny me cako kwano Baibul ki dano maromo 42 kulu! Pe ibyek abyeka ni jo ma inongogi ma gitye ki miti ni gingeyo ni itye atera me kwano Baibul kwedgi. Pingo pe icak kwan kwedgi ka idok cen ka lim nino mukene? Ka gukwero, meno pe peko. Iromo medde ki dongo mitigi. Tika dong ipenyo jiranini, wadini, lutic luwoti, ki lutino kwan luwoti ka gimito ni ikwan Baibul kwedgi? Iromo bene penyo lutino kwanni me Baibul ka ce gitye ki luremgi nyo wadigi ma gwok nyo gimito kwano Baibul.

3. Gin tic ma konyo ango ma watye kwede me cako kwano Baibul ki dano, dok waromo tic kwede nining?

³ Gin Tic ma Konyo: Gin tic ma pud dong pire tek adada me cako kwano Baibul ki dano obedo trak me In Imito Ngeyo Lok Ada? Itwero miyone bot rwod ot kadi gukwero bukke mukene-ni nyo pe. Kiromo tic kwede ka kitye ka tic i kabedo me cat, i teng gudu, ka kicwalo waraga, ki dong ka ki dok cen ka lim. Kiromo bene wekone i odi ma wegine pe paco. Pingo pe iwot kwede ka itye i cafari, itye ka wil, ki ka itye i gang tic? Pot karatac me agikki tito wiye wiye yubwa me kwano Baibul ki dano dok bene loko i kom buk me Baibul Pwonyo.

4. Waromo tic ki trak me In Imito Ngeyo Lok Ada? nining me cako kwan ki dano?

⁴ I nge miyo trak man bot ngat mo, iromo nyutte lapeny ma gitye i pot karatac mukwongo ci ipenye ni, “I kin lapeny magi, mene mono ma imito ni myero kong inge?” Ingeye wunyam lagamme ki i trak man, ci kwan nyo lok i kom pot karatac me agikki, ma tito pi yubwa me kwano Baibul. Iromo nyutte bene ka ma ngec mukene mapol nonge i ye i kom pwony meno ki i buk me Baibul Pwonyo, mine buk man, ci ket yub me dok cen kun wumedde ki nyamo lokwu.

5. Pingo omyero pol kare wabed atera me cako kwano Baibul ki dano?

⁵ Wang ticwa pud tye ki jo ma gitye ki miti me ngeyo ngo ma Baibul ada pwonyo. Ka pol kare wabedo atera me cako kwano Baibul ki dano, ci wabibedo ki kare muromo me nongo yomcwiny ma bino pi konyo jo mukene me lubu yo me kwo.​​—⁠Mat. 7:​13, 14.