In Dong Itye ma Iyubbe pi Cukul?
1. Kare maber ango ma tye ka kurri ka icako kwan?
1 Kadi bed ni man mwakani me cako kwan nyo mwaka mukene me kwanni, wun jo matino ma wubedo Lukricitayo wurwatte ki peko kacel ki lyeto manyen mapat pat. Ento wutye bene ki kare maber me miyo ‘caden i lok me ada.’ (Jon 18:37) In tika itye ma iyubbe maber dok atera me miyo caden?
2. I yo ma nining ma iromo yubbe kwede pi cukul?
2 Me konyi wek ibed ki kwo maber, ityeko nongo pwony madwong ki bot Jehovah, lunyodoni, ki dong lagwok ot ma lagen dok maryek. (Car. 1:8; 6:20; 23:23-25; Ep. 6:1-4; 2 Tem. 3:16, 17) Myero obed ni kombeddi dong ingeyo pekki ma ibirwatte kwede i cukul. Yubbe me miyo caden ma lubbe ki pwonye ma inongo ki bot Lubanga ki ngec ma itye kwede i kom kwo ma ibirwatte kwede. (Car. 22:3) Tam kong matut i kom pwony kacel ki tam mabeco ma a i Ginacoya ma nonge i bukke aryo me Young People Ask ki pwony mukene ma rwatte ma bino kare ki kare i Awake!
3. I yo ma nining ma in itwero miyo kwede caden?
3 Wang ticci ma kite dok pat-ti bimini kare me miyo caden i yo mapat pat. Ka jo mukene guneno ber pa rukki ki kit ma inen kwede, kit me kwoni ki lokki, woro ma inyutu bot lutino kwan luwoti ki lupwonye, kadiwa ryekoni me kilaci, guniang ni in pe itye atata, man bimiyo gipenyi ni, “Pingo in dok ipat tutwal?” (Mal. 3:18; Jon 15:19) Ibibedo ki kare me miyo caden ki dok tito tyen lok me niyeni. (1 Tem. 2:9, 10) Pi mwaka kulu, ibirwatte ki pekki calo kwero nino madongo me loboni ki mukene-gu. Ka kipenyi pingo pe inywako i kwer magi, ibigamo mere keken ni, “Dinina pe ye; an abedo Lacaden pa Jehovah,” nyo ibikwanyo kare me miyo caden i kom Jehovah, Wego ma lamar-ri? Yubbe maber ki lubo tira pa Jehovah twero weko ibedo atera me miyo caden maber bot lupwonye, lutino kwan luwoti, ki jo mukene.—1 Pet. 3:15.
4. Pingo itye ki gen ni ibicobo mwaka me kwanni maber?
4 Kadi bed ni itye ki lworo me cito i cukul, nge ni jo mapol tye ma gicwaki dok gimito ni ityek mwaka me kwanni maber. Medo i kom meno, wan bene cwinywa yom mada pi miyo caden ma itye ka miyone i wang ticci ma kite dok pat-ti. Dong, bed ki tek cwiny dok ma iyubbe maber pi cukul!