Bok Me Lapeny

◼ Ka lunyom mo gimito tic ki Ot me Ker pi nyomgi, jami ango ma myero gin kong gunyam ki luelda?

Nyom ma kiyubo ma lubbe ki cik ma iye lac me Baibul keto deyo i kom Jehovah. Man obedo lok ada madok i kom nyom ma bedo i Ot me Ker, kit macalo jo mukene gineno yub ducu ma timme kunu calo gin ma nyutu kit ma dulwa-ni obedo kwede. Wek ‘jami ducu owot maber, dok kore ki kore,’ pore tutwal ki luelda me nyamo jami mogo ki lunyom ma lubbe ki nyomgi ka ce gupenyo pi tic ki Ot me Ker pi nyomgi.—1 Kor. 14:40.

Lunyom ma gimito tic ki Ot me Ker pi nyomgi omyero kong gupeny komitti ma loyo wi tic me pwony me kacokke ma girwatte i Ot me Ker moni-ni kun giketo i coc. Omyero gumi waraga meno con kun ginyutu nino dwe kacel ki cawa ma gimito tic kwede ki Ot me Ker meno. Omyero bene gunge ni luelda pe gibiloko cawa me cokke pi nyomgi-ni. Medo i kom meno, lunyom aryo ducu omyero gubed jo ma tye lanen maber i kacokke, ma gikwo ma lubbe ki kit matir pa Jehovah.

Wek nyomme okel deyo i kom Lubangawa me deyo, lunyom-mi omyero gunyam yub me nyomgi ki komitti ma loyo wi tic me pwony ma peya gumoko yubgi. Kadi bed ni luelda pe gibirido tamgi i kom jami ma myero kitim, ento ka jamine mukene pe rwatte, ci omyero gin guwiny lok pa luelda. Omyero kiti ki wer ma kiyerogi ki i Kingdom Melodies nyo wer ma ginonge i buk werwa. Omyero kong luelda gunen kit deyo mo keken ma kimito ketone i Ot me Ker nyo yub me ryeyo kom me bedo ka tye maber. Ka kibimako cal ki kamera nyo ki vidio ci pe myero kiwek obal deyo me yub man. Luelda giromo ye ni kipor kit ma yub biwot kwede i Ot me Ker teke pe balo yub pa kacokke. Karatac me lwongo mo keken pe omyero kiket i ka keto lok angeya. Ento, luelda giromo miyo lok angeya macek i cawa me Cokke me Ticwa pi niango kacokke i kom yub me nyom ma bibedo i Ot me Ker.

Kadi bed pe tye cik mo ma wacci jo ma giwoto kacel ki lunyom i kare me nyom omyero gubed jo munongo batija, ento pe pore me keto jo mogo ma kwogi pe rwatte ki cik me Baibul nyo ma timgi kelo lapeny mapol i wi jo ma bibedo tye. Ka laelda mo tye, ci en aye myero omi pwony me nyom man. Luelda gubedo lupwonye mucwiny me Lok pa Lubanga, pi meno gin gupore me pwonyo cik me Ginacoya i yo ma rwatte ki yub ma kit man. (1 Tem. 3:2) Ngat ma luloc ocimo macalo lakwong lunyom en aye neno kwonge pa jo ma binyomme.

Kit ma nyom moni-ni nongo gudu laelda ma bikwongo gin lunyom-mi, omyero kiniange kit ma yub me nyom biwot kwede. En birwatte ki lunyom-mi pi penyogi kit ma gubedo ka kwo kwede i kare me winyegi; lunyom-mi myero gunyut gene ki loko jami ducu bote labongo mungone. Ka ngat acel ki i kingi onongo kong onyomme i kare mukato angec, ci en omyero onyut ka ce en tye agonya i yo ma lubbe ki Ginacoya me nyom doki. (Mat. 19:9) Man kwako nyutu kopi me waraga ma nyutu keto nyomme macon ca bot laelda-ni.

Ka lunyommi gubedo agonya me lok dok gukubbe ki luelda, ci yubgi me nyom bibedo kare me yomcwiny bot dano ducu.—Car. 15:22; Ibru. 13:17.