Lonyo Magi Twero Bedo Meri!
1 In mono itye ka yenyo yomcwiny madit kacel ki yengo i kwoni? In tika dong inongo yomcwiny ki yengo ma bino pi konyo jo mukene? Mono itye ki miti me medo ticci pi Jehovah? Ka ce lagammi tye ni eyo pi lapeny mo acel i kin lapeny magi, ci myero icak tamo pi tic calo painia marii. Tye kono gire ni omyero kong watam pi ticwa, pi jo me pacowa kacel ki tic mukene ma lubbe ki Ginacoya, pi yotkomwa, pi goro kom ma nongo watye kwede.
2 Lok ma Lubanga omiyo Solomon ocoyo nyutu ni mot pa Jehovah kelo lonyo me kom. (Car. 10:22) I kare-ni, mot pa Jehovah tutwalle kelo lonyo me cwiny. Lonyo ma kit meno bino madwong bot painia marii. Me labolle, ka ‘gitiyo ki karegi’ ma myero gutim kwede jami me kwogi pi konyo jo mukene, ci ginongo yomcwiny madit ma bino pi miyo. (Kol. 4:5; Tic 20:35) Jehovah neno dok pwoyo ticgi me mar-ri. ‘Lonyo ma kikano i polo’ ma kit meno wele pe bipoto. (Mat. 6:20; Ibru 6:10) Medo i kom meno, ka painia gibedo ki ‘wang ma pe mito jami mapol’ dok giketo gengi i kom Jehovah pi minigi jami ma mitte, ci watgi ki en dongo doko matek.—Mat. 6:22, 25, 32; Ibru 13:5, 6.
3 Yenyo lonyo me kom pol kare tero dano i ‘miti mapol me mingo.’ (1 Tem. 6:9, 10; Yak. 5:1-3) Man pe timme i kom mot ma Jehovah miyo. Tic ki but cawagi mogo i tic me pwony konyo painia marii me keto cwinygi i kom jami ma pigi tego loyo. (Pil. 1:10) Omego mo acel oweko ticce me bedo engineer ma onongo camo cawane tutwal-li pi doko painia. En owaco ni: “Anongo ni ticca ca onongo olo koma mada. Ento tic calo painia marii pe olo koma. Kombeddi dong atye ka konyo dano ki pwonyogi ki lok me ada. Man aye obedo tic ma kelo yengo ki yomcwiny pud dong loyo.”
4 Mot bot Jo Mukene: I kare-ni, dano ducu tye ka yelle ki ‘piny marac’ me kare man. (2 Tem. 3:1) I kabedo ducu dano mito gin mo ma minigi gen. Lutit kwena me Ker-ri gibedo ki yomcwiny me neno ni wang dano ma nongo nyutu cwercwiny twero lokke doko wang ma tye ki gen ka gujolo lok me kwena maber-ri. Yomcwiny man tye dit tutwal bot painia marii ma gimiyo cawa makato 800 kulu mwaka ki mwaka i tic man me laro kwo-ni!—1 Tem. 4:16.
5 Tika ibedo ka tamo matek pi tic calo painia marii? Tic man mito ‘tic ki kare ma watye kwede maber’ pe me balone i tic ma pigi pe tego. (Ep. 5:15, 16) Jo mapol dong gutimo meno ki loko yo me kwogi me doko mayot, ma oweko gudwoko cawa ma onongo gicwalo i tic me lobo-ni wek ginong cawa madwong me timo tic me Ker-ri. In mono iromo loko kwoni wek in bene idony i kingi?
6 Leg pi ryeko ma a ki bot Jehovah wek iket yub ma konyo. (Yak. 1:5) Mot ango ma itamo ni ibinongogi macalo adwogine? Mot madwong adada me cwiny! Jehovah bene bimiyi mot me jami me kom ma nongo mitte piri. (Mat. 6:33) Jo ma gitemo Jehovah i yo man gibinongo ‘mot madwong ata.’—Mal. 3:10.
[Study Questions]
1. Pingo omyero watam pi tic calo painia marii?
2. Tit kong lonyo mogo me cwiny ma painia marii ginongo.
3. Apokapoka ango ma tye i kin yenyo lonyo me cwiny ki yeny lonyo me kom?
4. Painia marii ginongo mot ango ka gitero kwena maber bot jo mukene bene?
5, 6. Ngo ma twero konyi me doko painia marii?