Bok Me Lapeny

◼ Mono pore ki lwak me dongo cinggi i nge pwony acel acel i Cukul me Tiokraci kacel ki Cokke me Ticwa?

I kare ma Lacwecwa, Jehovah ocweyo lobo, ‘lakalatwe ducu me odiko guwero kacel, dok awobe pa Lubanga ducu gudange ki yomcwiny.’ (Yubu 38:7) Awobe pa Lubanga magi ma gubedo lumalaika-ni gubedo ki miti me pako Jehovah pi cwecce me aura ma onongo obedo yo manyen ma en onyutu kwede ryeko, berre, ki dong tekone.

Nyutu pwoc ma a ki i cwinywa bot omegiwa pi tutegi ki dok pi pwony ma gimiyo obedo gin maber tutwal. Me labolle, pol kare wadongo cingwa pi pwony ki lapor ma kimiyogi i cokke mogo ma dok kitgi pat, calo gure matino ki madito. Pwony ma kimiyogi kunnu nongo yubone otero kare malac ki kero madwong. Dongo cingwa pe nyutu pwoc pi tute pa lalok keken ento wa pi pwony ma Jehovah miyo kun a ki i Lokke kacel ki dulle.—Ic. 48:17; Mat. 24:45-47.

Dongo cing i nge miyo pwony acel acel i Cukul me Tiokraci kacel ki Cokke me Ticwa kono? Pe tye cik mo ma okwero dongo cing ka ce miti meno obino kene pi miyo pwoc, calo ka gwok latin kwan mo pud omiyo pwonye tyen me acel i cukul. Ento dongo cing twero doko gin ma kitimo ma nongo cwiny pe iye ci tere doko pe woko. Meno aye oweko pol kare pe wadongo cingwa i nge pwony ducu.

Kadi bed ni pe waromo dongo cingwa pi pwony acel acel ma kimiyo i Cukul me Tiokraci kacel ki i Cokke me Ticwa, ento tye yo mukene mapat ma waromo nyutu kwede pwocwa pi pwony ma kimiyo ki dok pi tute pa jo ma gimiyo. Waromo timo man ki bedo ma wangwa twolo kun waketo cwinywa i kom lalok. Ki dong i nge cokke, waromo cito bot ngat ma omiyo pwony moni ci wapwoye pi tutene.—Ep. 1:15, 16.