“Yubbe pi Tiyo Tic mo Maber Ducu”
1 I kare ma Yecu ocako tic manyen me tito kwena, en okwanyo kare mo olo me pwonyo lupwonnyene kit me timone. (Mat. 10:5-14) Kadi bed ni wan ducu watye ki tic mapol, kwanyo dakika mo manok me yubbe kong ma peya wacito i tic me pwony i doggola ki doggola konyowa me nongo adwogi maber.—2 Kor. 9:6.
2 Kit me Yubbe: Yubbe maber cakke ki ngeyo lok ma tye i buk ma wamito terone bot dano-ni. Omyero watam bene pi jo ma gitye i wang ticwa. Pargi mono tye kwene? Pwony me dini ango mono ma wabirwatte kwede? Waromo neno tam mogo ma kimiyo i Ticwa Me Ker kacel ki buk me Reasoning From the Scriptures.
3 Tero itwa me winyo ki diro lapor ma kinyutu i Cokke me Ticwa bene konyowa. Ka wawoto ki dongo i diro me cako lokwa, pe wabitero cawa malac me yubbe. Ento, kare ducu ma peya wacito i tic me pwony, ka kong watamo i kom gin ma wabiloko kun wamedde ki yubo kit me cako lokwa, ci lokwa bibedo maber adada. Omyero bene wanen ni kicaa me tingo jami me pwonywa tye ki bukke ma wabitiyo kwedgi.
4 Ngo ma romo konyowa me po i kom lok ma wayubo? Bedo ka poro gin ma wamito wacone-ni ki dwan ma winye weko gin ma wamito wacone-ni moko i wiwa maber. Jo me odi mukene gimaro timone i kare me kwangi macalo jo me ot. Jo mukene ginongo ni konyo tutwal me coyo gin ma gimito wacone i latin karatac mo wiye wiye ma weko kong gineno ma peya gio i doggola moni.
5 Gin Mumiyo Pire Tek: Yubbe maber medo diro me ticwa kacel ki yomcwinywa i tic me pwony. Konyowa me lok ma komwa opye mot labongo lworo mo ka watye i doggola moni. Miyo waketo cwinywa i kom rwod ot me ka bedo ka tamo ngo ma myero wawacci. Medo i kom meno, ngeyo ngo ma tye i buk moni-ni konyowa me miyone ki mit kom.
6 Ginacoya cuko cwinywa me “yubbe pi tiyo tic mo maber ducu.” (Tito 3:1) Tika tye tic mo ma pud dong ber loyo tito lok me kwena maber-ri? Ka ce wayubbe maber, ci wanyutu ni watye ki woro bot rwod ot ma oye winyo lokwa-ni, ki pi Jehovah, Lubanga ma wacung pire.—Ic. 43:10.