Bed Latit Kwena ma Dongo
1 Cwinye Wonwa me polo bedo yom ka luticce gidongo i yo me cwiny. Meno kwako dongo me doko latit kwena mucwiny dok mutegi. Paulo ocuko cwiny laneno Temceo me keto cwinye i kwane kacel ki pwonye wek dano gunen dongone. (1 Tem. 4:13-15) Wan ducu omyero watute me dongo diro me pwonywa, kadi wa wan jo ma dong wabedo lutit kwena ma guri.
2 Ket Yubbi: Dongo i yo me cwiny mito keto yub pi anyim. Yub pi anyim ango ma wan waromo ketone? Waromo temme me dongo dirowa i tic ki pala lucwanwa me cwiny, ma en aye Baibul. (Ep. 6:17) Nyo gwok mitte ni wayub kit me miyo cadenwa, i teng gudi, i tic ki cim, nyo i tic i kabedo me timo biacara. Waromo bene yubo kit me dokwa cen ka lim wek obed ma gudo cwiny. Gin mukene maber adada ma waromo yubone aye me dongo dirowa i cako kwano Baibul ki dano.
3 Jami ma Konyowa: Yub me cokke, tutwalle Cukul me Tiokraci ki Cokke me Ticwa, kiyubogi me konyowa me dongo macalo lutit kwena. Ka watute matek me yubbe ki dok cito i cokke magi kun waketo pwony ma kimiyogi i tic, ci wabinongo adwogi mabeco mapol ki iye.—2 Kor. 9:6.
4 Mitte bene ni omyero wakony luwotwa me dongo. (Car. 27:17) Tero itwa i pwony pa jo ma watye ka tic kwedgi i tic me pwony bikonyowa me dongo dirowa. Medo i kom meno, lanen wi cokkewa me kwano buk romo keto yub mo piwa wek wanong kony ma mitte. Nongo kony ki bot painia mo mucwiny nyo latit kwena mukene pi dongo dirowa ma miyo wanongo yomcwiny i ticwa me pwony obedo twon mot madit atika! Nyo gwok tye latit kwena mo manyen i cokkewa me kwano buk? Waromo lwonge me wot kwedwa i tic me pwony.
5 Tic ma pire tek loyo ma kitye ka timone i kare-ni obedo tic me pwony pa Lukricitayo. Dong ka watye ka miyo ‘pakwa macalo gitum ma gityero’ bot Jehovah, omyero wamiye gin maber loyo ducu. (Ibru 13:15) Ka ce watute me dongo i ticwa me pwony, ci wabibedo lutic ma ‘gipe ki gin mo ma lewic myero omakgi iye, ma gitero lok me ada i yo ma atir.’—2 Tem. 2:15.