“Wubed Jo ma Miyo Pwoc”
1 I kare ma Yecu ocango ludobo apar, ngat acel keken ki i kingi aye odwogo cen ka pwoye. Yecu openyo ni: “[Onongo] pe gilonyo dano apar? Jo abongwen kono gitye kwene?” (Luka 17:11-19) Pire tek mada ni wan omyero wami pwoc pi jami mabeco ducu ma Lubanga Jehovah Wonwa me polo ominiwa!—Kol. 3:15; Yak. 1:17.
2 Jami mogo ma miyo wabedo ki pwoc obedo ngogi? Wamiyo pwoc pi ginkok ma obedo mic madit ma Lubanga omiyo pi dano. (Jon 3:16) Wapwoyo bene Jehovah pi nyikowa cok bote. (Jon 6:44) Notewa macalo Lukricitayo bene obedo tyen lok mukene ma weko wamiye pwoc. (Jab. 133:1-3) In bene olo nongo iromo tamo pi mic mukene mapol ma a ki bot Jehovah. Pe wamito ni wabed calo jo Icrael ma onongo gipe ki pwoc, ma wigi owil woko i kom tic ma Jehovah otiyo pigi-ni!—Jab. 106:12, 13.
3 Nyut Pwoc: Kadi bed ni ludobo apar-ri ducu oromo bedo ni gubedo ki pwoc pi gin ma Yecu otimo pigi, ento ngat acel keken aye ma onyutu pwoc. (Luka 17:15) I yo acel-lu, wan bene wanyutu pwoc ki timo tic me pwony ki mit kom. Ka ce ada watye ki pwoc pi jami ducu ma Wonwa me amara ma i polo otimo piwa, ci cwinywa biterowa me nyutu kodi marre-ni ki tito lok i kome bot jo mukene. (Luka 6:45) Pi meno, ka watito pi ‘tic me aura kacel ki kit ma Jehovah tamo kwede piwa,’ ci mar ki pwocwa pi Jehovah bidongo medde.—Jab. 40:5.
4 Tug Cwiny Jo Mukene me Miyo Pwoc: Omyero wayeny yo mogo ma waromo konyo kwede lutinowa kacel ki lutino kwanwa me Baibul me bedo ki cwiny me miyo pwoc. Lunyodo gitye ki kare mapol me timo man, calo ka gitye ka neno nyo lok i kom cwec pa Jehovah kacel ki lutinogi. (Rom. 1:20) Ka watye ka kwan ki latin kwanwa mo me Baibul, waromo penye ni, “Man mono tittiwa ni Jehovah tye ngat ma obedo nining?” Ka pwoc pa latin kwan man tye ka dongo, nongo marre pi Lubanga bene tye ka dongo, man miyo moko tamme matek me yomo cwinye.
5 I kare man me agikki-ni, jo mapol pe gimiyo pwoc. (2 Tem. 3:1, 2) Neno kit ma luticce ma gudyere ginyutu kwede pwocgi ki tiyo tic me pwony ki mit kom yomo cwiny Jehovah adada!—Yak. 1:22-25.