Watito pi Genwa me Ker-ri bot Jo Mukene
1 I kare man me agikki ma piny tye marac-ci, jo mapol i lobo-ni pe gitye ki gen mo. (Ep. 2:12) Jo mukene guketo gengi i kom lonyo, luloc lobo, diro me cayan, ki jami mukene mapol ata. Cwinywa pud dong yom atika ni watye ki gen me ada pi anyim, gen ma tye calo “lajuk me mel, ma cwinywa cung iye matek, ma pe wawire atata”!—Ibru 6:19.
2 I te loc me Ker pa Lubanga, kibiloko lobo doko paradic. Jowa me amara ma guto kibicerogi woko. (Tic 24:15) Can, ngolo kop alenga, two, tiyo, kacel ki to dong bibedo pe matwal. (Jab. 9:18; Mat. 12:20, 21; Yabo. 21:3, 4) Magi aye gubedo cikke mogo pa Jehovah ma gicok cobbe. I kin genwa magi, mene ma in itye ka kuro cobbene tutwal?
3 Tit pi Kwena Maber-ri: Pe omyero waling i wi gen me Ker-ri woko. Mar pi Lubanga ki luwotwa miyo waporo Yecu ki “tito lok me kwena maber bot lucan, bot jo ma tye i opii ni gibigonyogi, ki bot jo ma wangi oto ni gibiyabo wangi, ki me gonyo jo ma giunogi wek gucit ki kuc.’’ (Luka 4:18) Lakwena Paulo otito lok me kwena maber-ri i cuk ki i kabedo ducu ma onongo dano nonge iye. En otiyo matek i tic me pwony. (Tic 18:5) Lubu lanenne me tic ki mit kom i tic me pwony, pe bimiyo “paro lok me lobo man ki maro lonyo” umo genwa macalo Lukricitayo woko.—Mar. 4:19.
4 Genwa me Ker-ri pe rweny kadi bed warwatte ki dano ma ginyutu miti manok i kwena me Ker-ri, nyo adegadega atir ka maleng. Wamoku “matek liking i gen ma watuco, labongo tagge atata.” (Ibru 10:23) ‘Lewic pe makowa i lok me kwena maber-ri.’ (Rom. 1:16) Oromo bedo ni tekcwiny ki diyo cwiny ma wanyutu bimiyo jo mogo giwinyowa.
5 Kadi bed ni waniango dano ni balle pa lobo-ni tye ka cobo lok pa lunebi me Baibul, ento wan pe wabedo lutit lok me ngolo kop me to. Ma ka meno, ticwa me pwony omyero ocung i kom genwa me Ker-ri—kwena maber me Ker pa Lubanga. Pi meno dong watitu lok me kwena maber-ri ki tekcwiny dok ki mit kom ‘wek wabed ki gen nio wa i agikki.’—Ibru 6:11.