Wubed calo Jo Maryek
1 I kare ma Yecu openyo lumak rec angwen me bedo lulub kore, gin pe gugale ki moko tamgi “cutcut gulubo kore.” (Mat. 4:18-22) I kare ma Caulo me Taruco odoko Lakricitayo dok wange ocako neno, labongo galle en bene “ocako tuco lok i kom Yecu i kacokke cut.” (Tic 9:20) Cawa woto mere anyim labongo cung, ka okato nongo dong okato. Dong pire tek ni myero wabedu “calo jo ma ryek” itic ki cawa wa.—Ep. 5:15, 16.
2 Jami ma Timme Atura: Kare ma watye kwede me tic pi Jehovah i nino moni pe romo gene ka bedo tye orwone. (Yak. 4:14) ‘Jami ma timme atura,’ poto i kom dano ducu. (Latit. 9:11) Medo i kom meno, wan ducu watii, dong “kare ma opong ki gin marac” ma bino kacel ki tiyo dwoko ticwa pi Jehovah piny, man obedo gin ma pe waromo ngwec ki iye i kwo me kare man. (Latit. 12:1) Pi meno, pe bedo me ryeko ka ce wagalle ki dyere bot Lubanga nyo wamito ni kong wakur kare ma rwatte wek wamed ticwa i kit ma nongo watwero kwede. (Luka 9:59-62) Abraim obedo ki kuc, oto ma “mwakane dong dit” pien otiyo ki kwone i yo me ryeko, odyere me tiyo miti pa Jehovah.—Acak. 25:8.
3 Kare Dong Odoko Ding: Wan bene wamito ni wati ki cawawa ki ryeko pien “kare dong odoko ding.” (1 Kor. 7:29-31) Lobo man dong cok gik. Kare me tiyo tic me coko jo ma gubedo romi i kare me ‘kac me lobo-ni’ dong cok gik. (Yabo. 14:15) Omyero pe wawek paro pi jami me komwa kacel ki jami mukene ma balo tamwa okwany cawa ma watye kwede me tiyo tic me pwony. (Luka 21:34, 35) Bibedo me yomcwiny adada ka waneno ngewa kun wanongo ni watiyo tic matek me kac!
4 Omyero wabedu ma wangwa twolo kare ducu wek pe wakeng mot me tic me pwony ma waromo nongone. Dong wamoku tamwa me timo jami ducu ma watwero pi Jehovah “ka pud waromo lwongo ni ‘Tin.’” (Ibru 3:13) Ka watimo kit meno, ci wabinyutu ni wan waryek, pien “ngat ma tiyo gin ma Lubanga mito rii nakanaka.”—1 Jon 2:17.