“In Iromo Gamone Ningo?”
1. Peko ango ma polwa tye kwede?
1 In mono imaro Lok pa Lubanga ento inongo ni tek boti tutwal me po i kom jami mogo ma otimme ma tye i Baibul nyo kakwene ki i Ginacoya ma lok moni twero nonge iye? Nyo imito ni lutinoni gubed ki ngec matir i kom pwony mogo ma pigi tego ma gitye i Baibul? Lok ma tye ka ma kipenyo ni “In Iromo Gamone Ningo?” ma bedo i Awake! ducu i pot karatac 31, twero konyo jo madito wa ki matino weng me ngeyo Lok pa Lubanga maber adada.—Tic 17:11.
2. Watwero tic ki dul mapat pat ma tye i te wi lok ni “In Iromo Gamone Ningo?” nining?
2 In itwero tic maber ki lok ma nonge kunnu nining? Awake! me Januari mwaka 2006 omiyo tam magi: “Kwany kare manok me neno pot karatac 31 . . . Pwony mapat pat ma bedo i pot karatac man ywayo tam pa lukwanwa ma pud gitino; mukene twero yelo wa wi jo ma dong gutegi woko i lok me Baibul. Ka ka ma penyo ni ‘Man Otimme Awene i Tekwaro?’ bikonyi me niang awene ma ngat moni ma Baibul loko i kome-ni okwo iye ki dok awene ma jami mogo ma pigi tego-gu otimme iye. Ki tungcel, lagam me ka ma loko ni ‘Kikwanyo ki i Iye Kany,’ nonge i acakki nio wa i agikki me magajin moni-ni, ento lagam me lapeny mukene-ni kibiketogi i pot karatac acel mo i magajin meno, kun nongo kiloko cocce bedo olungtuke. Pingo pe ikwed inong lagamme ma nongo peya ikwano lagam ma kiketogi-ni ka dok inywak gin ma ipwonyo-ni ki jo mukene bene? Itwero tic bene ki ka ma penyo ni ‘In Iromo Gamone Ningo?’ me nyamo lok me Baibul ki jo me oti nyo macalo gurup.”
3. Jo me odi mapol dong gunongo adwogi maber ki i kabedo meno nining, dok kakwene ki i iye ma in inongo yomo cwinyi ma loyo?
3 Adada, jo me odi mapol gimaro tic ki kabedo man i kare me kwangi macalo jo me ot. Mego mo acel ocoyo ni: “Wan ki won ota watamo ni bedo ber ka wamedo ka ma waco ni ‘Cal me Ayenya pi Lutino’ i kwanwa macalo jo me ot wek obed mit wa bot latin anyakawa me mwaka adek bene. Neno kit ma en kwanyo kwede Awake! ma mege ka cako yabo pot karatac ki acel acel nio wang ma onongo gin ma en tye ka yenyone-ni yomo cwinywa mada.” Wego mo acel ki i Brazil owacci: “Wan ki latin awobina me mwaka abiro wamaro kabedo man ki i Awake! mada. Okonyo Moises me keto cwinye, ngiyo Ginacoya, niang tyen lok ma cal tye kwede, ki dong ngeyo mwaka.” Ashley ma tye ki mwaka aboro ocoyo ni: “Apwoyowu matek pi kabedo ma penyo ni ‘In Iromo Gamone Ningo?’ ma tye i pok nge Awake! Anongo pwony mapol me Baibul ki iye.”
4. Jo me odi gitwero tic ki kabedo man me medo jami me anyama i kwano Baibulgi macalo jo me ot nining?
4 Pingo pe wutam me tic ki ka ma penyo ni “In Iromo Gamone Ningo?” kicel kicel i kwanwu macalo jo me ot? Iromo tic ki Index nyo Watchtower Library i CD-ROM ka tye, me yenyo lagam me lapeny mogo matego. Ka ibedo katimone kumeno ci ibipwonyo lutinoni me ngeyo kit me kwedo tyen lok. Ka itye ki lutino madongo, pingo pe iwek gutem yenyo lagam me ka ma tye ni “An Abedo Anga?” nyo “Man Otimme Awene i Tekwaro?” ka gitye ka yubbe pi kwanwu macalo jo me ot? Man biweko ginywako kwedwu lok mabeco ma gukwedo, i kare me kwanwu. Yo acel ma lunyodo gitwero pito kwede Lok pa Lubanga i cwiny lutinogi aye me tic ki pot karatac man maber me konyogi wek gunge “coc maleng” cakke wa i tinogi.—2 Tem. 3:15; Nwo. 6:7.