Dok Cen bot Jo Ducu ma Gunyuto Miti
1 Pol pa wan watye i ada i kare-ni pien ngat mo oneno kit ma wajolo kwede kwena me Ker-ri maber ci odwogo, nyo tyen mapol pi dongo miti meno. I kit yo acel-lu wan bene omyero wamedde ki dok cen bot jo ma nongo ginyuto miti. Ki lok ada, dok cen ka lim bene obedo but tic ma kimiyowa me ‘loko dano wek gudok lupwonnye.’—Mat. 28:19, 20.
2 Niang Miti: Kadi bed ni ngat moni pe oye gamo bukkewa, kit ma wange nen kwede, dwane, nyo lok ma en loko oromo nyuto miti mo manok i kom kwena me Ker-ri. Pi meno waromo dok cen ka limme. Omego mo acel obedo kalimo laco mo teretere pi cabit abic ma peya laco-ni oye gamo buk mo. I kare me dok cenne me abicel, ka dong laco ca oye gamo buk, mot mot gucako kwano Baibul.
3 Teke ineno miti mo, tugi dok cen cut i nge kare mo manok. Pe iwek “Larac” okwany kodi ma nongo icoyo i cwiny ngat meno woko. (Mat. 13:19) Temme me lubo cikkeni ka ce onongo wuyubo ni ibidok cen i cawa moni.—Mat. 5:37.
4 Tic i Teng Gudu: In mono itemme me dongo miti ma inongo i kare me ticci i teng gudu nyo miyo caden ma nongo pe iyubbe iye? I agikki me lokwu, iromo wacci: “Nyamo lok man obedo maber adada. An atwero nongi kwene wek dok wamedde kwede?” Lutit kwena mogo gimiyo namba cimgi nyo gipenyo namba cim pa rwed ot. Ka dano gineni katic i kabedo acel i teng gudu moni-ni kare ki kare, ci giromo bedo ki miti me mini namba cimgi nyo nyuto kabedogi. Kadi bed pe guye nyutti kit ma itwero nongogi kwede, pud itwero temme me dongo mitigi ka ce irwatte kwedgi i teng gudu i nino mukene.
5 Ka waneno yat ma wapito, wayoro pii i wiye tye ka dongo maber, keliwa yomcwiny. I yo acel-lu, wabedo ki yomcwiny madwong adada ka wadok cen ka limo ki dok konyo dano wek gudong i yo me cwiny. (1 Kor. 3:6) Wek obed yubbi me dok cen ka limo jo ma nongo gunyuto miti.