Pe Iwek Marri Mukwongo ca Okwe Woko
1 I kare ma Yecu onongo dong tye i deyone, en omiyo tira bot kacokke me Epeco i cencwari me acel ni: “Atye ki lok man i komi, pien dong iweko mar ma onongo yam itye kwede mukwongo ca-ni woko.” (Yabo. 2:4) Nen calo jo mapol onongo dong gurwenyo margi mukwongo ca i kom Jehovah woko. I kare ma onongo pud watye ka kwano lok me ada akwana, wadongo mar matut pi Jehovah ki pi jiraniwa, meno oweko wacako nywako gen ma watye kwede ki mit kom. Ngo ma bigengowa ki i rwenyo marwa mukwongo-ni kacel ki miyo mit komwa i ticwa me pwony kwe woko?
2 Kwan Piri Keni Kacel ki Bedo i Cokke: Ngo ma oweko wadongo mar pi Jehovah ki pi jiraniwa i kare ma onongo pud wapwonyo lok me ada apwonya? Pe obedo pi pwony ma wanongo i kom Jehovah ki i kwano Ginacoya? (1 Jon 4:16, 19) Pi meno, wek marwa “odong omedde ameda,” omyero wamedde ki nongo ngec matir dok wayeny ‘tam matut pa Lubanga.’—Pil. 1:9-11; 1 Kor. 2:10.
3 Lubo yubbi me kwan kare ducu oromo bedo gin matek mada i kare man me agikki ma kwo opong ki par ki angola ngola mapol-li. (2 Tem. 3:1) Omyero waketu cawa i yubwa pi camo cam me cwiny. Bedo tye i cokke kare ducu bene obedo gin ma pire tek, tutwalle kit macalo ‘waneno nino maca dong tye ka nyiko cok.’—Ibru 10:24, 25.
4 Ticwa me Pwony: Tic ki mit kom i ticwa me pwony konyowa me gwoko marwa mukwongo pi Lubanga-ni. Ka watye ka tito lok me kwena maber-ri, nongo poyo wiwa bene i kom cikke me mar pa Jehovah, dok man miyo wabedo ki gen kacel ki mar matut. Pwonyo lok me ada ma tye i Baibul, mitte ni omyero wakwed tyen lok mogo wek wabed ki niang matir iye, man jingo niyewa.—1 Tem. 4:15, 16.
5 Jehovah myero me nongo jami ducu, man kwako wa marwa bene. (Yabo. 4:11) Pe iwek mar-ri okwe woko. Gwok marri mukwongo-ni wek obed matek ki kwano Baibul piri keni, bedo tye i cokke kare ducu, kun itito pi lok ma pire tek i cwinyi tutwal-li bot jo mukene ki mit kom.—Rom. 10:10.