Yubo Kit me Nyuto Magajin

1. Pingo bedo ber me yubo kit me nyuto magajin i yo ma megwa me ka mako lok ma ki miyo macalo lapor i Ticwa Me Ker i wiwa?

¹ Iromo penye ni: ‘Pingo dok omyero wayub kit me nyuto magajin ma kun kit me nyutone katti i Ticwa Me Ker acel acel?’ Kadi bed ni dano mapol ginongo ni kit me nyuto magajin ma nongo kiketo-ni ber botgi, ento yubbe maber piri keni pud mitte. Kit me nyuto magajin ma rwatte i kabedo moni-ni cawa mogo nongo pe rwatte i kabedo mukene. Pi meno, omyero pe watam ni gimito ni wanyut magajin kun nongo walubo lok ma kimiyo macalo lapor-ri kore ki kore. Ento kadi bed ni wamito tic ki tam ma kimiyo macalo lapor-ri, pud bedo ber me lubo tam meno kun watiyo ki lok ma megwa.

2. Omyero watim ngo me moko wi lok ma wabitiyo kwede?

² Yer Wi Lok Acel: Mukwongo, kwan kong magajin moni ka iyer pwony ma inongo ni oyomo cwinyi dok rwatte ki kwo me wang ticwu. Miti ma inyuto kacel ki loko lok i kom wi lok moni-ni ki yamo komi bimiyo rwed ot bedo ki miti me kwanone bene. Kadi bed ni ibilok i kom wi lok acel mo ma romo gudo cwiny dano mapol i wang ticwu, omyero ibed bene ki ngec muromo i kom lok mukene ma tye i magajin meno. Man biweko ibedo ki kare me loko kit me cako loki i yo mapat pat ka i rwatte ki jo ma gitye ki miti i kom jami mukene mapat ki ma in iyubo-ni.

3. Kit yo me cako lok mene ma in itiyo kwede ma kelo adwogi maber?

³ Peny Lapeny: Me aryone, yub kit me cako lokki maber. Kit ma icako kwede lokki pire tek adada. Twero bedo ber me penyo rwed ot ki lapeny ma gudo cwinye wek otug mitine i kom wi lok ma nongo iyero me tic kwede. Lapeny ma golo tam pa rwed ot pol kare konyo. Pe ipeny lapeny ma twero kelo lewic nyo laro lok.

4. Adwogi mabeco ango ma bino pi kwano ginacoya bot rwed ot ka kare ye?

⁴ Kwan Ginacoya Mo: Me agikkine, yer ginacoya mo ma omyero ikwan ka ineno ni rwed ot tye ki kare, nyo acel mo ma tye i te wi lok ma imito lok iye-ni. Kwano ginacoya miyo rwed ot neno ni kwenawa a ki i Lok pa Lubanga. (1 Tec. 2:13) Ginacoya bene nongo omine caden kadi bed en okwer magajin. Jo mukene gitugo miti pa rwed ot ki kwano ginacoya ma nongo peya gupenyo lapeny mo. Iromo lok kit man, ma nongo peya ikwano ginacoya ma imito kwanone, ni, “Amito ngeyo tammi i kom gin ma Baibul loko i tyeng en-ni.” Ci inyut bote gin ma magajin-ni loko i lok meno, ka dong ilok macek me medo mitine ma nongo peya imiye magajin.

5. Yo ma pigi tego ango ma myero waket obed i tamwa ka watye ka yubo kit me nyuto magajin?

⁵ Pe tye cik mo matek i lok madok i kom ngo ma myero ilok i iye ka itye ka nyuto magajin. Pol kare bedo ber ka iweko lokki bedo macek dok mayot. Ti ki tam ma ineno ni ber boti dok ma twero kelo adwogi maber. Ket tammi i jami mabeco ma tye i magajin meno, dok ilok ki yamo komi. Ka iyubbe maber, ci ibinongo ni nyuto Watchtower ki Awake! bot “jo ducu ma myero gunong kwo ma pe tum” bidoko yot mada.—Tic 13:48.