Kony Jo Mukene Wek Gudok Lurem Lubanga
1 I kare-ni, kitye ka pwonyo dano me rok ducu ki cik pa Jehovah. (Ic. 2:2, 3) Ento wek jo ma kit magi ‘ginyak nyiggi kun gidiyo cwinygi,’ omyero kong gucak ki maro Jehovah. (Luka 8:15; Mar. 12:30) Labongo mar ma kit meno, pe gibibedo ki kero me loyo lyeto ma bino me timo jami maraco nyo bedo ki tekcwiny me timo jami mabeco. Yo acel me konyo jo mukene me bedo ki wat maber ki Jehovah obedo me dongo i cwinygi mar i kom kite mapat pat. Cuk cwinygi me tamo tam matut i kom ngec ma tye i buk me Draw Close to Jehovah.
2 Lanenni: Kit me kwoni romo gudo cwiny lutino kwanni me Baibul matek. Ka gineno ni in itero watti ki Jehovah calo gin ma pire tek dok gineno kit man i kwoni, ci man bicuko cwinygi me dongo wat ma kit meno gin kikomgi. (Luka 6:40) Ada, lanenwa pol kare gudo kwo pa jo mukene makato wa gin ma waloko.
3 Yo maber ma lunyodo twero pwonyo kwede lutinogi me maro Jehovah aye obedo lanengi. (Nwo. 6:4-9) Laco mo gin ki dakone ma onongo gimito pwonyo lutinogi me dongo i ada gupenyo tam ki bot lunyodo ma lutinogi dong gitye i ada. Laco-ni owacci: “Tam ma ngat acel acel ma aloko kwede omiyo ducu obedo i kom lanen pa lunyodo.” Pi meno, lunyodo giromo miyo lanen maber bot lutinogi ki nyuto i yo me kwogi ngo ma ‘larem ki Jehovah’ obedo.—Yak. 2:23.
4 Lega ki Cwinywa Ducu: Itwero bene konyo jo mukene me dongo lurem ki Jehovah ki pwonyogi kit me lego lega ma a ki i cwinygi. Nyo iromo nyutigi lega ma Yecu omiyo macalo lapor-ri, kacel ki lega mukene mapol ma kicoyogi i Ginacoya. (Mat. 6:9, 10) Iromo pwonyo lutinoni ki lutino kwanni me Baibul kit me lega ki legani. Ka guwinyo kit ma in ilego kwede ki cwinyi ducu, ci miyo giniang kit ma itamo kwede i kom Jehovah. Cuk cwinygi me ‘diyo cwinygi i lega’ ka gitye ka rwatte ki atematema. (Rom. 12:12) Kit ma nongo giwoto ki nongo kony pa Jehovah i kare me peko, gin bene gicako geno en ki maro en macalo laremgi me ada.—Jab. 34:8; Pil. 4:6, 7.