Gin Ango ma In Iketo Bedo me Acel?
1 In itwero dok i lapeny man nining? Ada, wan ducu wamito ni waket pi Ker-ri obed mukwongo. (Mat. 6:33) Ento waromo penye kekenwa ni, ‘Mono jami ma ayero nyuto ni an atimo meno?’ Baibul cuko cwinywa ni: “Wutemme kekenwu.” (2 Kor. 13:5) I yo ango ma waromo temme kwede kekenwa me neno ka ce watye ka keto Ker-ri me bedo me acel?
2 Karewa: Waromo cakone ki ngiyo kit ma watiyo kwede ki karewa. (Ep. 5:15, 16) Kare ma rom mene ma watero cabit ki cabit i namo, neno telebijon, tic ki Intanet, nyo i timo jami ma yomo iwa? Ka wacoyo kare ma watero i timo jami macalo magi piny, ci waporo ki kare ma watero i tiyo jami me cwiny, waromo bedo ki ur adada. Wan mono watero kare malac makato cawa ma omyero wagik kwede tic ki i dog ticwa kun nongo pe miyo cawa mo dong pi tiyo tic maleng pien ni nongo wamito bedo ki jami me rwom ma malo? Wakeng cokke nyo tic me pwony kare ki kare wek ominiwa kare i Ceng Abicel nyo i Ceng Cabit me cito ka mato yamo ka mo?
3 Rye Jami ma Pigi Tego me Atima: Pol pa wan pe watye ki kare muromo me timo jami ducu ma wamito. Dong me keto pi Ker-ri me bedo me acel, omyero waniang ngo ma pigi tego wek wayub kare pi timo ‘jami ma pigi tego makato.’ (Pil. 1:10) Man kwako kwano Lok pa Lubanga, nywako i tic me pwony, gwoko luotwa, ki bino i cokke pa Lukricitayo. (Jab. 1:1, 2; Rom. 10:13, 14; 1 Tem. 5:8; Ibru 10:24, 25) Jami mogo calo rweyo ler ki mato yamo i yo ma rwatte bene ber. (Mar. 6:31; 1 Tem. 4:8) Ento jami ma pigi pe tego magi omyero pe obal yub me timo jami ma pigi tego woko.
4 Omego mo matidi obedo ki tam me keto pi Ker-ri me bedo me acel ki donyo i tic me pwony ma tero kare malac ma ka medde ki kwan i rwom ma lamal ma yabbe yo pi nongo tic madit. En opwonyo leb mukene ci ocito ka tic i kabedo mo ma onongo lutit kwena mitte iye mapol. En owacci: “Atye ka nongo yomcwiny madit adada kany. Tic me pwony dong pud gonyo kom ya! Atamo ni kono nene twere, kono jo matino ducu gutimo kit man wek gin bene guwiny kit ma an awinyo kwede-ni. Pe tye gin mo maber makato tic pi Jehovah ki jami ducu ma watye kwede.” Ada, keto pi Ker-ri me bedo me acel kelo mot madwong ento ma pire tek loyo ducu aye ni yomo cwiny Jehovah Wonwa me polo.—Ibru 6:10.