Nyut Miti i Kom Dano—Ki Tito Kwena Maber-ri Labongo Apokapoka Mo
1 I ginanyuta mo, lakwena Jon oneno lamalaika mo ma tye ka tuk wire i dye polo kun tye ka tito lok me kwena maber bot jo me “rok ducu ki kaka ki leb-gu ki jo mapatpat ducu.” (Yabo 14:6) Wan mono walubo lanen pa lamalaika-ni ki tito kwena labongo apokapoka mo? Waromo bedo ki cwiny me cwak ot kongo nyo ki apokapoka labongo ngeyone. Kit cwiny ma nongo watye kwede i kom dano ma warwatte kwedgi, romo gudo yo ma watito kwede kwena maber botgi. Pi meno omyero wabedu ki cwiny me mar kikome ka watye ka tito kwena bot dano ma gua ki kit me kwo mapat pat.
2 Tam Kong pi Jo me Wang Ticwu: Nyo tye jo ma gua ki i lobe mukene nyo luring ayela ma gibedo i wang ticwu? Tamwa pe oromo bedo i komgi. Kwany kare me yenyo kodi jo ma kit meno dok itemme me ngeyogi maber. Gin ango ma giparo pire nyo gimito, gimaro nyo gidag ngo, lworogi kono? Yelle matek me loko kit me tito kwena me Ker-ri i yo ma rwatte ki kodi dano moni. (1 Kor. 9:19-23) Calo lakwena Paulo, omyero wange ni obedo ticwa me nywako lok me kwena maber-ri ki ngat mo keken ma tye i wang ticwa, kadi wa jo ma nongo gua ki i lobo mukene, jo ma gilubo cik me tekwaro mapat, jo ma giloko leb mapat, kacel ki jo mulony-gu.—Rom. 1:14.
3 I yo ango dong, ma in itwero miyo kwede caden bot ngat mo ma loko leb mukene? Ti ki latin buk me Good News for People of All Nations. Iromo wot bene ki trak nyo brocuwa ma tye i leb mapat pat ma kilokogi i wang ticwu. (Nen Our Kingdom Ministry me Julai 2003, pot 4, para. 2-3.) Medo i kom meno, lutit kwena mogo dong guyelle me pwonyo kit me moto mot ki kit me miyo pwony manok i leb mukene. Pol kare cwiny dano bedo yom ka giwinyo ngat moni yelle me lok botgi ki lebgi. Kadi bed ni en nongo pe loko maber, ento man romo ywayo tamgi me winyo lok me kwena maber.
4 Por Kit pa Jehovah: Ka watimo tek me o wa bot jo ma gia ki i kabedo mapat pat, nongo watye ka poro kit pa Lubanga Jehovah ma pe poko kin dano ma mitine tye me ‘laro jo ducu dok mito ni jo ducu gunge lok me ada.’—1 Tem. 2:3, 4.