Awake! ma Kite Dok Pat ma Kibitero Bot Dano i Sektemba
1 Pol pa dano gimaro winyo koko pa winyi ma gikok mamit dok gimaro neno deyo me poto pa ceng. Ento kadi bed kumeno, pol pa dano pe giye ni Wonwa me polo ma lamar-ri aye ocweyo jami magi. Wabibedo ki kare ma mwonya me miyo caden i kom Jehovah macalo lacwec ki tero Awake! man ma kite dok pat-ti. (Ic. 40:28; 43:10) Awake! man me Sektemba-ni bilok i kom wi lok ma tye ni, “Lacwec Mono Ada Tye?” keken.
2 I Wang Ticwu: Ka twerre, yub yub me nywako kacel ki kacokke i tic me ot ki ot i Ceng Abicel ducu. Iromo tero magajin man ma kite dok pat-ti i nino mukene-ni bene. Lupwonye kacel ki jo mukene ma gitiyo tic madok i kom pwonye aye tutwalle guromo bedo ki miti me kwano magajin man. Pi meno myero wuket yub madok pat me limo jo macalo magi ma gitye i wang ticwu.
3 Ka ce ngat mo onyuto miti, wek lapeny mo bote ma ibigamo ka idok cen ka lim. Me lapore, itwero penyo lapeny i kom pingo Lacwec ma lamar weko dano deno can. Ci i nino ma idok cen ka lim, itwero nyuto dul me 1 nyo me 11 i buk me Baibul Pwonyo. Nyo itwero penyo lapeny i kom yub pa Lacwec pi lobo, ci iromo tic ki dul me 3 ka idok cen ka lim.
4 I Cukul: Ka pud itye i cukul, pingo pe iter Awake! man ma kite dok pat-ti macalo mic bot lupwonyeni nyo lutino kwan luwoti? Keto magajin man i wi decci keken twero tugo peny i kom niyewa. Romo bedo ni kare twero nen boti me tic ki ngec ma tye i magajin man me tito niyeni bot lutino kwan luwoti i kare me nyamo lok kacel i kilaciwu ki dok ka wutye ka coyo ripot i kom gin mo. Me konyo kori, magajin man tye ki pwony ma waco ni “Young People Ask” ma wi lokke tye ni “An Atwero Tito Niyena i Kom Cwec Nining?”
5 Jehovah aye myero me nongo woro ki deyo pi jami ma en ocweyogi. (Yabo 4:11) Watwero miyo deyo bot Lacwecwa dok watwero konyo jo mukene me timo man ki tero botgi Awake! man me Sektemba-ni ki mit kom.