Nyut Miti i Kom Dano—Ki Pwoyogi
1 Miyo pwoc cuko cwiny dano, miyo gibedo ki miti me timo gin moni-ni dok keligi yomcwiny. Lutit kwena mapol gunongo ni miyo pwoc ma a ki i cwinywa miyo dano gibedo ki miti me winyowa ka watye i tic me pwony. Yo ango ma wan waromo pwoyo kwede dano ka wamito tito lok me kwena maber-ri botgi?
2 Bed ki Wang ma Bit: I kare ma Yecu Kricito odok i polo, en oneno ki pwoc jami mabeco ma kacokke abiro ma tye i Asia Minor gubedo ka timone. (Yabo. 2:2, 3, 13, 19; 3:8) Kit meno bene, ka wan wabedo ki miti i kom jo ma wanongogi i ticwa me pwony, ci bimiyo wayenyo yo me pwoyogi. Me labolle, dyekal ma kigwoko maleng, lanyodo ma obedo ka nyuto mar bot lutinone, nyo bwunyo pa rwed ot ki motte i yo me lurem ducu miyowa kare me pwoyogi. In mono kare ducu iketo wangi me neno jami ma tye wek iti kwedgi?
3 Bed Ngat ma Ciko Ite: Ka itye ka tito pi kwena bot dano, penygi ki lapeny ma rwatte wek gutit tamgi. Nyut woro botgi ki keto tammi i gin ma giwaco. (Rom. 12:10) Olo twal ibinongo gin mo ma itwero miyo iye pwoc botgi ka dong iti kwede calo kacungoni me lok.
4 Ti ki Niang Matut: Ngo ma omyero watim ka rwed ot owaco gin mo ma pe rwatte ki lok ada me Baibul? Me ka ka laro lok ma pe tye atir meno, pwo rwed ot pi lokke meno ci medde ki lok ni, “atyeko neno ni in kara itamo matek i kom lok man.” (Kol. 4:6) Kadi bed ni en obedo ngat ma maro laro lok, watwero pwoye kare ki kare pi miti ma en tye kwede i lok moni-ni. Lok i yo me mwolo kit meno romo loko cwiny dano moni ma nongo nen calo deg lok me kwena maber-ri.—Car. 25:15.
5 Wek wacuk cwiny dano, omyero wapwogi ki cwinywa ducu. Tic ki lok ma cuko cwiny kit man kelo deyo i kom Jehovah dok twero ywayo cwiny dano me winyo kwena me Ker-ri.