Wek Kwoni Okel Deyo i Kom Jehovah Bute me 2—Gwokke ki Tic Tekwaro ma pe Rwatte ki Cik pa Lukricitayo
GWOK MABER
1, 2. Tic tekwaro ducu mono rac? Tit kong.
1 Lakwena Petero ocoyo ni: “Pi meno, lurema, ka wutye ka kuro man wuket tek wek Lubanga pe onong roc mo nyo bal mo i komwu, ento onong wutye ki kuc.” (2 Pet. 3:14) Lucaden pa Jehovah pe gilubo tic tekwaro pien gilubo pwony man. Jo ma gitye ka kwano Baibul ki Lucaden pa Jehovah omyero wigi opo i kom kwer mogo ma pe rwatte ki cik pa Lubanga ma tye i pwony me 11 i brocuwa me Ngo ma Lubanga Mito ki Botwa?
2 Tye bene tic tekwaro mogo mabeco ma rwatte ki cik me Baibul. Gwoko wele, woro jo mutegi, konyo lupeko gitye i kine. Pol kare, tic tekwaro mukene calo kit me ruk nyo mot-gu pe turo cik me Baibul. Ento, tye tic tekwaro mapol ma pe yomo cwiny Lubanga. Tic me tekwaro ma kit magi kitwero ketogi i kin ‘kit pa kwaro ma pe konyo’ ma Petero ociko iye Lukricitayo macon-ni. (1 Pet. 1:18) Mitte mada ni omyero walubu lok ma Paulo ociko ni: “Wugwokke wek ngat mo pe ongakwu woko ki tam me ryeko . . . ma tere pe, kun wulubo kit pa kwaro . . . ma pe wulubo Kricito.” (Kol. 2:8) Kong dong wanenu tic mogo me tekwaro ma timme i kabedowa.
Lirre
3, 4. (a) Lirre onongo pire tek pingo i kare pa jo Icrael macon? (b) Tit kong kit lirre mogo ma pe yomo cwiny Jehovah.
3 Baibul pe ogengo liro co. Lirre onongo yam obedo i kin Cik ma Jehovah omiyo bot jo Icrael macon. Nio wa i kare me to pa Yecu, latin laco ma pe kiliro onongo pe bedo dano maleng. Ento Cik-ki onongo obedo mere ‘lagwokgi nio ka Kricito obino.’ Kombeddi liro co pe tye i te cik pa Lubanga dok dong pe mitte ni Lakricitayo omyero otim.—Gal. 3:24; 5:6.
4 Pi meno, ka lunyodo mogo guyero me liro lutino awobegi—gwok nyo pi lok kom yotkom—meno lubo cwinygi. I kabedo mogo, kiyubo nino me liro awobe ma dong guo i wel mwaka moni. Kiyubo cam, wer kacel ki myel pi keto deyo i kom awobe magi, dok man weko kicako kwanogi i kin jo ma dong gidongo. Kwer magi obedo dini dini dok Lakricitayo mo pe myero odony i kodi tic macalo man ma pe kelo deyo i kom Lubanga-ni.
5. Adwogi maraco ango ma liro mon kelo?
5 Liro mon kono? Kit tim man me liro mon-ni pud tye timme i kabedo mapol i lobo Africa. Kit lir ma kit man kitimo i yo mapol mapat pat, ento kit yo mo keken ma kitiyo kwede kelo arem mapol i kom anyira matino. Karatac akwana mo otito ni: “Adwogi maraco ma bino inge lirre man cut cut aye arem malit atika, twon lworo madit, cwer pa remo, awano i kabedo ma olworo komgi me mon, det pa wang ret, ki to bene.” Adada, lunyodo ma gubedo Lukricitayo pe omyero guwek jami ma kit man otimme i kom anyiragi! Gin mukene marac aye ni tim man okubbe ki tic me woro jogi.
6. Ginacoya ango ma gudo wa lok i kom tim me liro mon?
6 Liro mon kelo peko wa i kom mitigi me buto, kun ki tungcel Jehovah ocweyo dako me nongo mit me buto i kingi ki cware. Kiliro mon ki tyen lok ni meno gwoko anyira pe me ngeyo co i kare ma nongo gin pud pe kinyomogi. Ento ki lok ada, pe ngolo kom me mon i yo marac kuman aye gwoko anyira pe me ngeyo co, ento lubo cik pa Lukricitayo aye gwokogi. Awake! me April 8, mwaka 1993, otito ni: “Gin ma twero juko kwo marac obedo pwonyo dano, ento pe ngolo kom i yo marac kit man. Me lapore: Omyero kingun bad lutino woko wek pe gudong gubed lukwo? Nyo kingun lebgi woko wek pe dong gulok leb mo marac matwal?” Ngolo kom anyira rac mada, dok romo weko ngat moni tingo alii me to i wiye. (1 Tekwaro 11:17-19; Jab. 51:14) Ngat mo keken ma cwako tic tekwaro marac kit man nongo nyuto cac i kom Jehovah, ma en aye obedo “wang it me kwo ducu” dok obedo Lami “gin mo ducu maber.” Medo i kom meno, i lobo mogo ma gamente-ne oketo kigeng i kodi tic man, lunyodo ma gubedo Lukricitayo omyero gulub cik meno. (Jab. 36:9; Yak. 1:17; Rom. 13:1) Lunyodo ma gubedo Lukricitayo ma giye ni kilir anyiragi, pe kibimiyogi tic mogo ma kimiyo ki jo ma cungogi tye atir me timone pi kacokke. Rom aroma bene ki lamego mo ma oye gire pire kene ni omyero kilirre.
Yat Lagwok Kom
7. Ruko yat lagwok kom kubbe ki tim ango?
7 Cakke wa i tekwaro, dano gubedo karuko yat me gwoko komgi ki i jami mogo maraco. Yat lagwok kom mogo a ki i kom yec, cogo, lak nyo lwet lee-gu. Mukene kiyubo ki i kom nyonyo, bongi, tiko, nyo lum ki yadigi-ni. I kare pa jo Ejipt macon, onongo giruko tiko, yadi aruka, ki yadi lagwok kom mukene mapol pi tyen lok me tim tyet.
8. Lapeny ango ma konyowa me neno peko ma bino ma lubbe ki ruko yat lagwok kom?
8 Ka Lakricitayo tye ki jami macalo magi, en kong omyero openye kekene ni: ‘Pingo an atye ki yat lagwok kom? An mono atye ki niye ni jami magi twero gwoka ki i kom two, can me yo, luyir, nyo jogi? Ruko jami magi i koma mono weko jo mukene gitamo ningo? Ka wadina gineno litinona ruko jami magi, ci pe gibicako cuko cwinya me timo tim tyet mukene-ni?’ Jami aruka magi pe twero gwoko ngat mo. Ento, giywayo jogi aye i komwa doki. Yat lagwok kom pe obedo jami aruka me deyo. Obedo jami ma jogi tiyo kwede, tim ma balo watwa ki Jehovah.—Nwo. 18:10-12; Gal. 5:19-21; Yabo. 21:8.
Lim Keny ki Nyom
9. (a) Ginacoya mene ma twero konyo lunyodo ma gubedo Lukricitayo i moko wel lim? (b) Pingo omego ma kimito nyomo nyare pe myero owek wadine aye gumok wel lim kacel ki yubo yub me nyom?
9 Kicoyo pi mic ma kimiyo bot lunyodo pa nyako wa i Baibul. I kare me nyomo Labeka pi Icaka, latic pa Abraim “okelo lwak atego ryal ki atego jabu, ki lwak ginaruka.” (Acak. 24:53) En omiyogi bot Labeka, mine, ka ominne—jo me ot acel-li. Pe tye ka mo i Ginacoya ma loko pi miyo lim keny bot wadi mukene. Lunyodo ma gubedo Lukricitayo mono omyero guwek wadigi aye gumok wel lim me keny? I nyom mogo, jo ma kit magi gingolo wel nyom ma lamal ma pe twere, nyo gitemo “cato” nyako bot ngat ma tye ki wel lim ma dit loyo. Lunyodo maryek pe giketo mitigi i kom lim ento gimito ni cwar nyargi obed ngat ma maro Jehovah, ngat ma kome mit i tic pa Lukricitayo ma nongo oketo lok me ada odoko yo me kwone.
10. Tit kit tic tekwaro mogo ma twero balo nyom pa Lukricitayo.
10 Nyom pa Lukricitayo myero okel pak ki deyo i kom Lubanga Jehovah, Ngat ma Ocako te nyom. Paulo ociko Lukricitayo ni: “Dong ka wucamo cam nyo ka wumato mat, nyo gin ducu ma wutiyo, wutim ducu pi miyo deyo bot Lubanga.” (1 Kor. 10:31) Lukricitayo pe omyero guwek nyomgi okel yet i kom Jehovah nyo kacokkene. Nyom pa Lukricitayo pe myero kilok odok kabedo me mero ki daa. I kabedo mukene i lobo Africa, dano gituko nyo gimyelo wer ma nongo keto deyo i kom teko me nywal kun nongo gikiro mucele malo nyo kwer mukene ma obedo pa lukamfiri. Jami ma kit meno myero pe otimme i nyom pa Lakricitayo.
11. Ngo ma omyero kigwokke kwede ka ce yub me nyom obitimme i Ot me Ker?
11 Ka yub me nyom obitimme i Ot me Ker, omyero kinen ni kigwokke tutwal. Luelda omyero gunen ni yub me nyom meno owoto ma lubbe ki cik pa Lukricitayo. Pi meno, Watchtower me April 15, 1984, waco ni: “Ki i Ot me [Ker], wer ma cuko cwiny dano calo ma tye i buk wer pa Lucaden pa Jehovah-ni keken aye omyero kiti kwede. Ature ki jami mogo me deyo, kit ma lunyom gidonyo kwede i Ot me Ker kacel ki kit ma kimako kwede cal ducu omyero obed mupore.—Jo Pilipi 4:5.” Jo ma kilwongogi i nyom kono? Magajin acel-lu dok omedde ni: “Niango mitte me ngeyo wel dano adi ma gitye i yub meno, rukgi ki kit ma gitye ka kwo kwede. Pe pore me lwongo jo ma kityeko ryemogi woko nyo jo ma nongo yo me kwogi rac ma pe rwatte ki cik me Baibul me bedo tye. (2 Jo Korint 6:14-16) Me ka lwongo cogi abembem nyo jo ma tyegi camo cing dano, pol pa Lukricitayo (ki lulok) gilwongo jo ma nongo gitye cok kwedgi i tic pi Jehovah.”
12. Kakwene ma omyero kinyut iye niango ki bedo ki kit pa Lukricitayo ka kitye ka yubo yub me nyom?
12 I kare me yubo yub me nyom, lunyom gimoko tam pi jami mapol. Tam calo kit nyo kala me bongo ma gibiruko, lok i kom lagit cing, nyo wele adi ma myero gilwong. Labongo akalakala mo, lunyom omyero gunyut niango ki kit pa Lukricitayo i moko tam magi. Me lapore, jo me lobo giyubo mutoka mapol ma nongo kideyogi me ngwec kun nongo gimol mapol ma nongo wo kacel ki kijira oculo piny woko liking. Lukricitayo mono gineno yub macalo man nining? Watchtower me April 15, 1997, oloko i kom tam man ni: “Kadi bed ni Yecu bene obedo i nyom, ento pe omyero watam ni en onongo romo cwako yub man me cano mutoka mapol ma gingweco kun gimol gilworo dye taun ki twon wo adada; abili bene dong ongolo cul i wi deribwa mogo ma gimol kun giwoto ki goyo titit i kare me nyom. (Nen Matayo 22:21.) I yo magi ducu, Lukricitayo omyero pe gunyut awaka me nyutte nyo gulub kit pa dano me lobo-ni, ento guti ki ryeko macalo jo ma mwol.”
Yik ki Kumu
13. (a) Mono rac me nyuto cwercwiny nyo koko ka danowa me amara oto? (b) Kit kwer ango ma pe myero ki ngat ma tye ki niye i gen me nicer?
13 Wan ducu wawinyo malit atika ka danowa me amara oto. Cwercwiny ma kit man weko Lukricitayo bene gikok kit macalo Yecu bene “okok ki pig wange” i kare ma en ocito i kin dano ma gitye ka koko lyel pa lareme Lajaro. (Jon 11:35) Kadi bed kit meno, Lukricitayo omyero pe gulub kwer mogo ma pe rwatte ma tye mapol i lobo Africa. I kwer mogo, dano gipwutu yer wigi dong ma obwuc obwuc nyo gilyelo wigi maliyu, giruko bongi macilo adada ka gigoyo kidule gingene kwede i ngom, giwito cingi, nyo gikok macalo gurup ki dwan acel. Wan Lukricitayo me ada pe dok wakok i yo ma nyuto cwercwiny marac tutwal, pien meno nyuto ni wan waketo niyewa i gen me nicer kun wangeyo ni i kare me anyim, jowa me amara ma guto gibicer woko.—Yubu 14:14, 15; Jon 5:28, 29; Tic 24:15.
14. Adwogi marac ango ma kodi yub me kumu mogo kelo i kom lupaco pa lato?
14 I kabedo mapol, kong kikumu ma nongo peya kiyiko yik. Dano gibedo dyewor bene bene labongo nino nio ka piny oruu, kun giwoto ki wer, koko, nyo mato kongo. Man camo cing dano tutwal. Kiwilo cam nyo kineko lee, kipango kema ki giwot-gi. Jami ma kit man twero weko lupaco pa lato gidong ki twon banya madit dok twero terogi i tic ma pe rwatte ki kit pa Lukricitayo. Konye pe adada! Kwero tim me tekwaro magi lajwac twero miyo dano dagi, ento kelo mot pa Lubanga.—2 Tem. 1:7.
15, 16. Jami ango ma miyo dano giyiko kom latogi i kabedo moni?
15 Kabedo me yik kono? Nen kong lanen mogo ma tye i Baibul. Abraim otiyo ki limme me wilo ka ngom me yik pi jo me ode. (Acak. 23:3-20; 25:9; 49:29-32) Yucepu onyuto woro i kom wonne ki tingo lyelle me tero kayikone wa i Kanaan. Nen calo Parao omiyo twero ki Yucepu me tic jami me Lobone wek ocit oyik wonne kit macalo yam gumoko kwede.—Acak. 47:29, 30; 50:6-13.
16 I karewa-ni, yub me yik polle bedo i wi jo me odi aye, ento kabedo me yik kare mukene romo bedo ni omyero obed ka ma lubbe ki cik me lobo moni. Pol kare, jo mukene gitero lyel ka yikone wa i ngom kwarogi. Jo me ot moni aye omyero gumok tam man i nge bedo piny me neno wel lim adi ma man bitero. (Luka 14:28) Jo mukene gibalo lim mapol i pango giwot me tero lyel ka yikone ka mabor, polle i ka yik ma tye i ngom kwarogi kadi bed ni nongo ka yik tye i kabedo moni-ni. Pingo? Pien dano mapol gitamo ni ka kiyiko ngati moni i ngom kwaro ci en rwatte ki tipo pa kwarigi dok gimedde ki bedo kacel, ka pe ci pe timme. Wan Lukricitayo pe wamoko tamwa ma lubbe ki tam macalo man.—Latit. 9:5, 10.
17. Tic ango ma timme i kare me kumu ma pe rwatte ki Ginacoya ma Lukricitayo omyero pe gulubi?
17 Lok madit ma dako ma obedo Lakricitayo omyero ocung iye matek i cik me tekwaro mukene aye obedo lok kom “lako,” ma wat pa lato ma obedo laco omyero olak dato i kare me kumu. Meno pe rwatte matwal ki cik pa Jehovah dok pe ber pi yot kom dato. Dako ma obedo Lakricitayo omyero pe oye tam ma kumeno.
18. (a) Ngo ma Lakricitayo myero onen maber ka kilwonge me miyo pwony i ka yik? (b) I yo ango ma Lukricitayo gitwero nyuto kwede woro bot jo me ot to?
18 Lukricitayo ma gubedo Lucaden pa Jehovah giyubo yub me miyo pwony ma a ki i Baibul i kare me yik. Ka kilwongo Lakricitayo mo me miyo pwony man, en omyero olub lok ma tye i karatac ma kiyubo pi pwony man dok en pe omyero odony i yub ma nongo coko wi lulok mukene ma nongo gilubo cik tekwaro ma pe obedo pa Lukricitayo nyo gipwonyo pwony goba ma pe rwatte ki Ginacoya. Yub me yik pe omyero ocok jami mapol, omyero obed ma cuko cwiny dok i yo me woro. Pwony ma kimiyo i kare me yik-ki, romo cuko cwiny jo pa lato ki lurem mukene ma nongo gitye. Kadi bed ni wire me limo jo ma gurwenyo danogi-ni kare ki kare nyuto mar, ento pe dok ber me bedo ki yub me limo ma dok rii kato woko ma nongo omego ki lumego mapol gibedo ka wero wer me Ker kunnu. Keto yub me yik ma pe gwaro jami mapol tutwal, pe tero cente mapol, man weko kony ma Lukricitayo gimiyo cobo jami ducu ma mito lim. Pe myero kiket ajog mo obed tye pi ‘yub me lyel’ i kacokke nyo cente mo ma kijogo pi jami ma timme atura ma kilwongo ni ‘ajog pi jami ma poto atura.’
Wubed i Mar pa Lubanga
19. (a) Ngo ma bikonyowa me moko tam matir i kom kwer ki tic tekwaro mogo ma gitye mapol-li? (b) Pingo in imoko tammi matek me bedo pat ki lobo ma pe ngeyo Lubanga?
19 Kit macalo watye ka tic pi Jehovah i lobo ma pe ngeyo en ni, omyero wange maber ni peko mapol bibino. Ento pe twere me keto cik ma mako yo me kwo ducu. Pi meno, pire tek mada me bedo ka lega bot Jehovah kun wapenye wek ominiwa ryeko me poko gin maber ki marac ka watye ka moko tam i kom gin mo. (Yak. 1:5) Cwiny luelda me kacokke bibedo yom me miyo kony ma a ki i Baibul wek ojingwa me moko tam matir. Ka waweko kwowa okelo deyo i kom Jehovah, ci wabibedo i “mar pa Lubanga . . . nio wa i kwo ma pe tum.”—Juda 21; 2 Pet. 3:13.