Nyut Miti i Kom Dano—Ki Bedo Lakica
1 Wi dako mo acel ma onongo cwinye dag Lucaden tutwal po i kom karene me acel me rwatte ki Lucaden pa Jehovah ni: “Wiya pe po tutwal i kom gin ma waloko iye, ento gin ma wiya po iye maber aye kica ma en onyuto i koma, ki jol maber kacel ki mwolo ma en onongo tye kwede. Man omiyo cwinya ocako marre mada.” Lok man nyuto ni pire tek tutwal botwa me nyuto miti i kom jo ma watito botgi kwena maber.—Pil. 2:4.
2 Mar Lakica: Yo acel ma wanyuto kwede mar bot jo mukene en aye me bedo ki kica. (1 Kor. 13:4) Dano ma lakica, bedo ki miti i kom ber bedo pa jo mukene, yenyo yo me konyogi ki i pekogi. Tye kono gire ni tic me pwony obedo tic me kica. Ento miti ma watye kwede i kom dano pe nen i pwonyogi keken. Kit ma watero kwede jo mukene calo bedo maber kwedgi, bedo lurem, kit ma wawinyo kwede lokgi, jami ma waloko ki kit ma waloko kwede ki gin ki kit ma wanenogi kwede—binyuto ni wan kara waparo pi dano.—Mat. 8:2, 3.
3 Bedo ki cwiny i kom dano bimiyo wabedo ki miti me konyogi. I kare mo ma omego mo ma obedo painia onongo tye ka pwony i doggola ki doggola, dato mo otugi ryemme aryema i kare ma en dato-ni ongeyo nga ma omego-ni obedo. En owaco ni en onongo etye i wi madara i jokon ka loko gulop manyen i kare ma omego-ni odwongo doggola. Omego-ni owacce ni “pe ber me timo man in keni,” ci dato-ni oye ni en odony. Omego-ni okonye me loko gulop-pi ci oa ocito gire giwote. I kare ma wod pa dato-ni obino kalimme i yo nge kare mo manok, ci en owacce gin ma otimme. Lok man ogudo cwinye tutwal ci oweko en oyenyo omego-ni wek emiye pwocce. Man oweko guloko lok mapol ma omiyo en awobi-ni oye kwano Baibul.
4 Ka watye ki kica, ci nongo wanyuto mar ma Jehovah tye kwede i kom dano dok bene waketo deyo i kom kwena me Ker-ri. Pi meno, ‘wanyutu berwa kenwa macalo wan lutic pa Lubanga pi kicawa.’—2 Kor. 6:4, 6.