Medde ki Loko Lok pa Lubanga ki Tekcwiny

¹ Wan macalo Lukricitayo wangeyo ni pe dano ducu bijolo lok me kwena ma wapwonyo-ni. (Mat. 10:14) Ento pe waweko cwiny manok ma jo mukene gitye kwede-ni gengowa me medde ki tito lok me kwena maber-ri. (Car. 29:25) Gin ango ma twero konyowa me medde ki tito lok pa Lubanga ki tekcwiny?

² Lakwena Paulo obedo ki pwoc madit tutwal pi “gin mo maber makato, en aye ngeyo Rwotwa Yecu Kricito.” Man oweko en oloko “ki teko.” (Pil. 3:8; 1 Tec. 1:5) Kadi bed ni jo mukene onongo gineno kwena ma en tito-ni calo gin me mingo ma konye pe, ento en onongo ngeyo ni meno obedo “teko pa Lubanga me laro jo ma tye ki niye.” (Rom. 1:16) Pi meno, kadi bed ni en orwatte ki adegadega, en omedde ki ‘lok ki tekcwiny kun tiyo ki teko pa Jehovah.’—Tic 14:1-7; 20:18-21, 24.

³ Ka ma Tekowa a Iye: Paulo pe obedo ka miyo caden ki tekcwiny pi tekone kene. I kare ma Paulo onongo tye ka lok i kom en ki Cira, en ocoyo ni: ‘Kadi bed waneno can, dok bene gitimo tim me lewic i komwa i Pilipi, Lubanga omiyo botwa tekcwiny me tito botwu lok me kwena maber ka maleng.’ (1 Tec. 2:2; Tic 16:12, 37) I kare ma Paulo onongo tye i buc i Roma, en okwayo ni jo mukene omyero guleg pire wek Lubanga okonye me medde ki tito lok me kwena maber-ri ‘ki tekcwiny i kit me lokke.’ (Ep. 6:18-20) Paulo oloko lok pa Lubanga ki tekcwiny pien en ojenge i kom Jehovah ento pe i kom tekone kene.—2 Kor. 4:7; Pil. 4:13.

⁴ Meno bene rom aroma i kare-ni. Omego mo ma onongo pe mito nyuto ni en ebedo Lacaden pa Jehovah ki i katicce dok bene onongo pe miyo caden bot lutic luwote olego pi lok man ci ocako miyo caden. Latic lawote mo kong okwero winyo lokke woko, ento i kare ma owinyo lok i kom gen me nicer ci otugi ye cako kwano Baibul cut. Nicakke i kare meno, omego-ni ocako tic ki kare mo keken me miyo caden. I kabedo me ticce manyen, en okonyo dano 34 me nongo batija i yo nge mwaki 14. Wan bene omyero wabedu labongo akalakala mo ni Jehovah bimiyowa teko me medde ki ‘tito lokke ki tekcwiny.’—Tic 4:29.