Tim Ber Imi Bot Lador Wi Cukul
Karatac Me Lagam Pi Pwony Ma Kipwonyo Nicakke I Nino Dwe 5 Me Sektemba Nio Wa I Nino Dwe 31 Me Oktober, Mwaka 2005.
KA MA KIKWANYO PWONY KI IYE: New World Translation of the Holy Scriptures [bi12], The Watchtower [w], Benefit From Theocratic Ministry School Education [be], “All Scripture Is Inspired of God and Beneficial” (Me Mwaka 1990) [si], ki dong Reasoning From the Scriptures (Me Mwaka 1989) [rs].
GIN ME ATIMA: Ngat acel acel omyero obed ki karatac me lapeny ma nongo kiketo i Ticwa me Ker. Nyamo lapeny magi omyero onyut ber pa pwony ma nongo kipwonyo i Cukul me Tiokraci i dwe aryo ma nongo okato. Lador wi cukul twero penyo lapeny mukene me wek lok mogo ma pigi tego oniange maber ka cawa pud tye, me wek tyen lok me lagam mogo onen, nyo me wek kimi lagam i kom kit ma kitwero keto kwede pwony moni-ni i tic. Pe kono tye ni lagam ducu nongo dong kiketo i karatac me lagam; pi meno lagam mo keken ma a ki bot lwak ma nongo rwatte ki niangowa me kare-ni omyero kiye, kadi bed ni lokke nongo pe i karatac me lagam. Ka jo me kacokke pud peya onyamo lapeny man, ci karatac me lagam-mi omyero pe kimi ki jo me kacokke gukwan, ento lador wi cukul twero tic kwede me ngeyo lok ma pigi tego ma myero en owek jo me kacokke guniang. Nyamo lapeny magi omyero pe okat dakika 30.
NGEC BOT LADOR WI CUKUL: Ka itye ka doro nyamo lapeny magi, bedo ber ka iweko ngat mo ma kwano Watchtower i kare me cokke okwano ginacoya ma nongo kicimogi i lapeny acel acel ki i wi abam. Pol kare, omyero itim man ma nongo peya ipenyo lapeny ma kicoyo piny. Ento ma lubbe ki cawa manok ma nongo kimiyo pi nyamo lapeny magi, ber iti ki ryekoni me neno ka kitwero kwano nyo lok wiye wiye i kom ginacoya mogo ma giboco.
Namba ma kicoyo ki coc ma opyelle ma kikwongo ketone ka dong kiketo ka ma pwony moni-ni oa ki iye-ni, nongo nyuto cabit moni ma pwony ma nongo lapennye kiketo-ni omyero kipwony i iye. Cabit-ti kicako kwanone cakke ki i nge nyamo lapeny ma okato.
DIRO ME LOK
1. Wan watwero timo gin ango wek Lok pa Lubanga ma wapwonyo-ni ogud cwiny jo ma wapwonyogi? (Mat. 13:19) [1, be pot 258 para. 1-2, ki bok] Omyero wayelle me gudo cwiny dano, man weko dano moni twero bedo ki cwiny me nyikke cok bot Lubanga. Bedo me kony tutwal ka watemo niang ngo ma tye i cwinygi. Ka dong omyero walok matek i kom kit mabeco mogo calo mar ki lworo Lubanga-gu. Gudo cwiny dano i yo ma kit man obedo gin ma pire tek me konyo dano wek guti miti pa Jehovah.
2. Gin ango ma twero konyowa me ngeyo tam ma tye i cwiny dano moni, ento gin ango ma myero wiwa pe owil iye? [2, be pot 259 para. 1-2] Lapeny mogo calo “In mono itamo ningo i kom. . . ?” nyo “Ngo ma miyo in iye ni. . . ?” miyo latin kwan moni tamo tam dok konyo lapwonye me ngeyo ngo ma tye i cwinye. Ka lapwony tye ka penyo lapeny, en omyero ogwokke mada pe me weko latin kwan ocak winyone calo dong kitye ka penye pi gin mo marac doki. Lapwony ma niang keto cwinye me winyo lok pa latin kwanne wek enge kit ma en winyo kwede ma lubbe ki lok doge, ka dong tamo kit yo maber ma en myero emi kwede lagam ma nongo cung i Baibul ma twero weko latin kwan-ni bedo ki cwiny me lubone. (Car. 16:23)
3. Ka watye ka pwony, pingo pire tek ni omyero walok matek tutwal i kom kit pa Jehovah mabeco mapat pat? [3, be pot 260 para. 1] Loko lok matek pi kit Jehovah, calo ber, kica, ki mwolo, tugo cwiny dano me maro Lubanga. Ka waweko jo ma winyowa ginongo kare me tamo tam matut i kom kit Jehovah, ci konyogi me nyikke cok bot Lubanga ki me bedo ki wat macok ki en. Kodi nyamo lok ma gudo cwiny kit man pol kare weko dano gijolo lokwa ki cwinygi ducu, kit ma kicweyowa i cal pa Lubanga-ni. (Acak. 1:27)
4. Wan watwero konyo lutino kwanwa me Baibul nining me ngeyo kakwene ki i kwogi ma mito ayuba? [5, be pot 260 para. 4–pot 261 para. 1] Omyero wawek gunge maber ni kit ma gin gikwo kwede pire tek tutwal bot Lubanga. Ni kitgi twero kelo yomcwiny nyo cwer cwiny bot Lacwec. (Jab. 78:40-42; Car. 27:11) Watwero konyo lutino kwanwa me Baibul me ngeyo adwogi maber ma bino pi lubo cik pa Lubanga ki dok pe me neno bedo ki winy calo yec mapek ento calo yo acel me nyuto lworowa pi Jehovah. (Jab. 19:11; Ic. 48:17)
5. Gin ango ma watwero timone me konyo lutino kwanwa me Baibul ki jo ma giwinyowa wek gungi tyen lok ma miyo gin gitimo gin moni? [7, be pot 262 para. 2-3] Ka watye ka pwony, omyero wacuk cwiny lutino kwanwa nyo jo ma giwinyowa me penye kekengi ni: ‘Pingo an mono amito timo gin eni? Cwiny ma otera i timo gin eni mono obedo cwiny ma obino pi bedo ki pwoc pi jami ducu ma Jehovah otimo pira? Ada, romo bedo ni atye ka lubo cik pa Lubanga, ento atye ka lubone ki cwiny ango?’ (Jab. 37:4) Omyero wacuk cwiny lutino kwanwa me Baibul nyo jo ma giwinyowa me lega bot Jehovah pi nongo teko ki niye me bedo ki lworo pi nyinge. (Jab. 86:11)
PWONY ME 1
6. ‘Yenyo’ Jehovah tyen lokke ngo, dok wan watwero nyuto ni watye ka yenye nining? (Ibru. 11:6) [1, w03 8/15 pot 25 para. 2; pot 26 para. 1-2; pot 27 para. 2] ‘Yenyo’ kwako keto tek, nyo ‘diyo cwiny’ i lubo miti pa Lubanga. (Luka 11:8; 1 Jon 5:14) Wan watwero nyuto ni watye ka tute me yenyo cwak pa Jehovah ka watiyo tic mo keken ma watwero timone ma mako tic me cwiny ki cwinywa ducu. Man kwako yubbe maber pi cokke, yelle matek me dongo dirowa i tic me tito kwena, jalo kwowa me bedo i kin jo ma gitiyo pi cawa malac.
7. ‘Lanen me aluba ma obedo lok me ada’ obedo gin ango, dok luelda giromo nyuto ni gin gilubo lok man nining? (2 Tem. 1:13, 14) [3, w03 1/1 pot 29 para. 3–pot 30 para. 1] I 1 Temceo 6:3, Paulo onyuto ni ‘lok me ada-ni’ obedo lok pa ‘Rwotwa Yecu Kricito.’ Kit ma lok pa Yecu rwatte ki ‘Ginacoya ducu ma yam kicoyo pi teko pa Lubanga, dok konyo me pwony-nyi,’ ‘lok me ada-ni’ nongo dong i atir-re obedo pwony ducu me Baibul. (2 Tem. 3:16, 17) Luelda omyero gulub Lok pa Lubanga ka gitye ka pwony i kacokke, dok omyero pe guti ki ryeko pa dano mamwa nyo tamgi kengi. (2 Tem. 4:2) Cik acel-li omyero kilub kadi wa i kare me pwonyo jo ma woko ma pe gubedo jo me kacokke. (2 Tem. 4:5)
8. “Bible Canon” obedo gin ango, dok gin ango-gu ma nyuto ni buk moni-ni ada obedo but bukke me Baibul? [4, si pot 299 para. 5-6] “Bible Canon” obedo bukke me Baibul ma kiyerogi ki i kin bukke mukene ata-ni ma kiye ni cwiny pa Lubanga aye ada omiyo kicoyogi. Jami ma onongo nyuto ni buk moni-ni obedo but buk nyo Bible Canon obedo jami calo: Lok ma tye i iye omyero obed i kom lok pa Jehovah ma mako lobo, omyero olok dano me doko jo ma wore, omyero owek dano gubed ki woro i kom nyinge ki ticce kacel ki yubbe pi lobo. Buk meno omyero obed ki lanyut ma nyuto ni cwiny pa Lubanga aye omyero obed ni oweko kicoyo lok ma tye i iye. Pe omyero obed i kom lok me kwiya piny nyo woro ginacweya-gu, ento omyero obed i kom mar ki tic pa Lubanga.
9. Pingo But coc pa Muratori me cencwari me aryo K.M., pire tek tutwal me moko ni buk moni-ni obedo but Ginacoya ma kicoyogi i leb Grik? [6, si pot 302 para. 19] But coc man macon ma onongo tye i leb Latin-ni, kicoyo i iye ni Luka obedo buk me adek me Jiri, ma man nyuto ni coc-ci onongo kong oloko i kom Matayo ki Marako. Coc man bene kicoyo i iye ni Jon obedo “buk me angwen me Jiri.” But coc macon man bene loko i kom waraga ma lakwena Paulo ocoyo bot kacokke ki dok ma en ocoyo bot jo mogo. Bukke mukene me Baibul ma kiye ni obedo but Bible canon wa i kare-ni bene coc-ci oloko i komgi.
10. Twero ango ma Ginacoya miyo i kom gonyo lok me Baibul i leb mapat pat, dok gonyo Baibul i leb mukene ma otimme i kare macon okonyo i yo ango? [8, si pot 307 para. 9] Lok pa Lubanga bot Luicrael ni “Wupake wun rok ducu kacel ki lwakke” ki dok lok pa Yecu ni kwena maber me Ker-ri kibititone i wi lobo ducu, me bedo caden bot rok ducu, nyuto kamaleng ni rwatte me gonyo Baibul. (Nwo. 32:43; Mat. 24:14) Coc macon ma kigonyogi nyuto ni kiketo tek me gonyo ginacoya me leb Ibru labongo lokone.
KWANO BAIBUL I CABIT KI CABIT
11. 2 Luker 13:21 mono cwako tim me woro jami pa nyo kom dano maleng ma dong oto woko? Man obedo lok i kom tango ma otimme ma lubbe ki cogo pa lanebi acel pa Lubanga. Kit ma Elica onongo oto dok onongo ‘pe ngeyo gin mo’ i kare ma tango man timme kwede-ni, cer man omyero obed ni otimme pi teko pa Lubanga Jehovah kun nongo tiyo ki cwiny mere maleng. (Latit. 9:5, 10) Pire tek bene me ngeyo ni Ginacoya pe owaco ni kiworo cogo pa Elica. [1, w05 8/1 “Jehovah’s Word Is Alive—Highlights From the Book of Second Kings” (Lok pa Jehovah Obedo Gin Makwo—Lok ma Pigi Tego ma Oa Ki i Buk pa Luker me Aryo)]
12. Tika Kejekia onongo omoko wat ki lobo Ejipt? (2 Luker 18:19-21, 25) Pe. Lok pa Larabcake-ni onongo obedo goba, kacel ki lokke ni ‘Jehovah aye omiye twero’ me bino-ni ducu. Kabaka Kejekia ma obedo lagen-ni onongo gire ojenge i kom Jehovah aye. [2, w05 8/1 “Jehovah’s Word Is Alive—Highlights From the Book of Second Kings” (Lok pa Jehovah Obedo Gin Makwo—Lok ma Pigi Tego ma Oa Ki i Buk pa Luker me Aryo)]
13. Kadi bed ni buk macon pa jo Aciria pe tuco atir atir kit ma Jehovah oloyo kwede Cenakerib, ento lok ango ma inongo ni pire tek ma kicoyo i iye? (2 Luker 19:35, 36) Coc macon pa Cenakerib ma onongo kicoyo i “Oriental Institute Prism” ki “ Taylor Prism,” waco ni: “Kejekia ma obedo Lajudaya pe oye bedo i te locca, ci omiyo arumo bomane madongo 46 kulu ma kigerogi ki cel ma lamal kacel ki gangi matino tino mapol ma onongo gitye i igi ka amayo (gi) woko . . . Aketo en kikome odoko mabuc i gang kal ma mere i Jerucalem calo winyo ma kiloro wiye i dero.” Cenakerib owaco ni “lworo kacel ki koyo pi dit pa locce” oketo kom Kejekia woko. Ento en pe owaco ni emako Kejekia nyo ni emayo Jerucalem kit ma en oloko kwede i kom mayo “boma madongo” ki “gangi matino tino.” Man rom ma en oye, ma weko miyo caden i lok ada ma tye i Baibul i kom neko mony pa Cenakerib. [3, w88 2/15 pot 28 para. 2]
14. Anga ma onongo obedo won Cealtiel? (1 Tek. 3:16-18) Tekwaro me Acel 3:17, kacel ki Matayo 1:12, giwaco ni Yekonia (Kabaka Yekoyakin) aye obedo won Cealtiel. Ento Luka ma obedo ngat acel ma ocoyo Jiri, owaco ni Cealtiel obedo “wod pa Neri.” (Luka 3:27) Nen calo Neri mere omiyo nyare bot Cealtiel me bedo dakone aye. Kit ma jo Ibru onongo gilwongo cog anyiragi ni lutinogi, tutwalle ka onongo gitye karyeyo jo me tekwarogi-ni, omiyo Luka owaco ni Cealtiel obedo wod pa Neri kakare. I yo acel-lu, Luka bene owaco ni Yucepu obedo wod pa Eli ma onongo gire i adane obedo won Maliam dako pa Yucepu aye. (Luka 3:23) [5, w92 7/15 pot 5-6]
15. I kare me loc pa Kabaka Caulo, likwayo pa Reuben, pa Gad, ki nucu kaka pa Manace, gunyuto lanen maber bot lutic pa Lubanga ducu me kare-ni nining? (1 Tek. 5:18-22) Ma lubbe ki cikke pa Jehovah bot kwarogi Abraim, gin gumedde anyim ki tekcwiny me nyayo wang kabedogi me kato Gilead woko. (Acak. 15:18) Kadi bed man okelo wo i kingi ki jo Agri, Luicrael magi gumedde ameda ki lweny kadi bed ni welgi onongo nok. Gin onongo gitye 44,760 keken. Ento i kare me lweny, gin gumako dano 100,000 kulu. Man pe onongo obedo wel mony pa jo Agri dong ducu, pien Baibul waco ni ‘polgi onongo kinekogi woko.’ Ngene kene ni likwayo pa Reuben, ki likwayo pa Gad, ka dok nucu kaka pa Manace pe onongo gitwero loyo lweny man pi tekogi kengi, ada pe obedo pi tekogi. Gin guketo gengi i kom Lubanga Jehovah me konyogi.