Ti ki Kare ma Itye Kwede i Yo Maber
1 Miti ma watye kwede me yomo cwiny Jehovah miyo kwowa pol kare cung i tiyo tic me cwiny. Lokke wacciwa ni omyero ‘kong waket cwinywa i kom kerre’ ki bene ni omyero ‘wapwo gin maber kato.’ (Mat. 6:33; Pil. 1:10) Wan watwero tic ki karewa i yo maber nining me tito pi Ker-ri labongo balo kare tutwal i tic ma pigi pe tego?—Ep. 5:15-17.
2 Ket Tic me Ker-ri Obed me Acel: Yub kit me tic ki kareni wek pe ibal kare i timo jami ma pigi pe tek. Jo mukene gicako dwe manyen ki ngolo te nino dwe ki cawa ma nongo gin guyubo me tiyo ticgi me pwony i kalendagi. Ci gigwokke tutwal me neno ni jami mukene pe obino balo yubgi meno woko. Watwero tic en ki yo acel-li bene me yubo cawa me cito i kacokke, kwano Baibul, ki me cito i gure madongo. Jo mapol gicako dok gigiko ninogi ki kwano Baibul. Yub kare me timo jami ma pigi tek obed tye pat, dok pe iwek jami mukene ma pigi pe tek obed kabalo yubbi.—Latit. 3:1; 1 Kor. 14:40.
3 Pe i Ti ki Jami me Lobo Tutwal: I lobbe mukene, jami macalo tuko, galo wang, mato yamo, ki jami mukene ma dano timo tye mapol ma pe yenye. Dano mapol gineno telebijon nyo gitiyo ki kompiuta pi cawa malac. Ento ka wabedo ka lungo wiwa i kodi jami me lobo calo galo wang ki neno telebijon gini, ci adwogine bedo cwercwiny keken. (1 Jon 2:15-17) Pi meno, Ginacoya cuko cwinywa ni omyero pe wati ki jami me i lobo man tutwal. (1 Kor. 7:31) Ka ce wabilubo pwony man me ryeko-ni, ci nongo wanyuto bot Jehovah ni worone obedo gin me acel i kwowa.—Mat. 6:19-21.
4 Kare dong odong manok tutwal pi lobo-ni. Jo ma giketo lok me Ker-ri bedo me acel i kwogi gibedo ki yomcwiny dok gibinongo mot pa Lubanga. (Car. 8:32-35; Yak. 1:25) Pi meno, watiyu ki kare ma wa tye kwede-ni maber.