Ribbe pa Dini Tika Lubanga Cwako?

ENTO, jo ma gicwako ribo woro gineno lok man i yo mukene. Eboo Patel, ma ocako Interfaith Youth Core openyo ni “Nyuta dini ma pe nyuto kica . . . , ma pe paro pi kabedo murumowa . . . , ma pe paro pi gwoko welle.”

Ada, dini me Buda, Katoli, Purutanti, Hindi, Cilam ki dong mogo mapol ata i kine mukene guribo cinggi wek giti kacel me lweny i kom can, ilo malo twero pa dano, kwanyo owic, nyo lok i kom kabedo murumowa. Dini mapat pat dong gucokke kacel me nyamo kit me medo niango i kingi kun gicuko cwinygi kekengi. Gin gikwero kwergi ki cwinyo kandol, wero wer, lega, ki dong timo jami mukene.

Tika ribbe pa dini ducu bigiko tele i kin luye? Tika ribbe pa dini aye yo ma Lubanga tye ka tic kwede me kelo lobo maber?

NOTE PA DINI OKELO ADWOGI ANGO?

Dul mo acel madit ma ribo dini owaco ni etye ki lumemba ma gia ki i dini makato 200 ki dok ni gitye ka tic i lobbe ma romo 76. Miti pa dul man tye me “ilo malo note ma ri pi kare malac i kingi.” Ento meno pe otimme wacel. Me labolle, ma lubbe ki jo ma gucako dul man, pen cikgi kicoyo ki diro wek dini ki gurup mapat pat pe gubed ki koko mo keken. Pingo? Tyen lok acel aye ni tamgi opokke woko ka ce omyero kilok i kom Lubanga i cik man. Pi meno, pe kiloko i kom Lubanga wacel.

Ka Lubanga dong kiweko woko, ci niye dong bibedo me kony nining? Medo i kom meno, dul ma kit meno ma ribo dini kacel-li pat ki dul ma gimiyo kony bot dano nining? Pi meno, dul ma ribo dini ma kiloko i kome malo-ni, waco ni pe ebedo dul dini ento dul ma kelo note.

TIKA NYUTO KIT MABECO AYE GIN MA PIRE TEK LOYO?

Dano mo muywek, ma rwomme tye Dalai Lama, dok cwako ribbe pa dini owaco ni: “Dini ma gingene loyo gitito lok i kom mar, paro pi jo mukene, ki dong timo kica.” En omedo ni: “Gin ma pire tek loyo aye ni omyero wanyut kit magi nino ducu.”

Ada, kit mogo calo mar, kica, ki dong weko bal pigi tek adada. Yecu omiyo cik mo ma pire tek ni: “Kit gin ducu ma wumito ni dano gutim botwu, wun bene wutim botgi kit meno.” (Matayo 7:12) Ento, tika timo jami mabeco aye gin ma nyuto niye me ada?

Ma lubbe ki jo ma gubedo ka waco ni gitiyo pi Lubanga i karene, lakwena Paulo otito ni: “An abedo cadengi kun angeyo ni gumoko matek i kom Lubanga, ento kadi bed gumoko, ci pe gucungo i ngec kikome.” Pekogi onongo tye kwene? Paulo owacci, onongo “pe gingeyo kit ma Lubanga kwano kwede dano ni kite atir, ento gubedo ka yenyo ni gitwero nongo kit ma atir pigi kengi.” (Jo Roma 10:2, 3) Pienni onongo gipe ki ngec matir ma lubbe ki ngo ma Lubanga mito ni gutim, mit komgi kacel ki niyegi konye odoko pe.​—Matayo 7:21-23.

KIT MA BAIBUL NENO KWEDE RIBBE PA DINI

Yecu owaco ni, “Gitye ki gum [yomcwiny] jo ma kelo kuc.” (Matayo 5:9) Yecu otimo jami ma en opwonyo kun pe cwako tim gero ki dok onywako kwena me kuc ki dano ma gia ki i dini mapat pat. (Matayo 26:52) Jo ma gujolo kwena man gunote kacel i twec me mar. (Jo Kolocai 3:14) Miti pa Yecu mono onongo tye mere me kubo kin dano ma gia ki i kwo mapat pat wek gubed ki kuc i kingi? En tika oribbe ki dini mukene-ni i jami ma gitimo?

Lutela dini pa Luparicayo ki Lucadukayo onongo gidag Yecu adada​—mumiyo guyenyo yo me neke woko. En odok iye nining? Yecu owaco ki lupwonnyene ni: “Wek gubedi; meno gin lutowang ma gipeyo lutowang wadigi.” (Matayo 15:14) Yecu okwero mako lirem kacel ki jo magi.

Lacen, kicako kacokke i Korint, lobo Grik, boma ma onongo ngene adada pi bedo ki dul mapat pat me wibye kacel ki dini mapol. Lukricitayo ma i kabedo meno onongo myero gutim gin ango? Lakwena Paulo ocoyo botgi ni: “Pe wuribbe kun wubedo kacel ki jo ma pe guye Yecu.” Pingo? Paulo otito ni: “Dong tam pa Kricito ki pa Belial twero rwatte? Gin ango ma dano ma oye Yecu twero nywako gin ki ngat ma pe oye?” I ngeye, en ominigi tira man: “Pi meno dong wua woko ki i kingi, wupokke woko kwedgi.”​—2 Jo Korint 6:14, 15, 17.

Man nyuto ka maleng ni Baibul pe cwako ribbe pa dini. Ento iromo penye kekeni ni, ‘Ngo ma twero kelo note me ada?’

KIT ME KELO NOTE ME ADA

Kampuni me gedo gitye ki lutic mapol. Tika gitwero cobo ticgi ka tamgi opokke woko i kom pulan ma myero guti kwede?

Man aye gin ma tye ka timme i kareni i kom dul ma giribo wi dini mapat pat. Kadi bed ni giloko i kom ribbe kacel ki bedo ki niango i kingi, ento tamgi opokke woko i kom kit ma myero gidong kwede niyegi. Macalo adwogine, kit ma myero gukwo kwede kacel ki gin ma myero gupwony tye ka medde ki kelo apokapoka madit adada.

Baibul tye ki cik pa Lubanga ma gubedo calo pulan. Watwero kwo i yo ma Baibul cwako. Jo ma gujolo pwony me Baibul gujwayo cwiny me apokapoka ma lubbe ki rangi del kom nyo dini. Dok bene, gupwonyo kit me tic kacel ma nongo kuc ki note tye i kingi. Lubanga otito man wacon, kun wacci: “Ada, i kare meno abimiyo rok ducu giloko leb matir, wek gin ducu gulwong nying Jehovah, dok guti bote ki cwiny acel.” Loko “leb matir,” ma obedo kit ma myero wawor kwede Lubanga-ni kelo note.​—Jepania 3:9, NW; Icaya 2:2-4.

Lucaden pa Jehovah gilwongi me bino i Ot me Ker macok kwedi wek inen in kikomi kuc kacel ki note ma tye i kingi.​—Jabuli 133:1.