PWONY ME 53
Yer Galowang ma Yomo Cwiny Jehovah
Jehovah obedo “Lubanga ma layomcwiny.” (1 Temceo 1:11, NWT) En mito ni wabed ki yomcwiny dok wanong mit pa kwo. Dok cwinye bedo yom ka wakwanyo kare me yweyo wiwa i nge tic. I pwony man, wabineno kit ma watwero tic kwede ki cawa ma wakwanyo me yweyo wiwa i yo ma keliwa yomcwiny ki yengo—dok ma yomo cwiny Jehovah.
1. Gin ango ma myero watam iye ka watye ka yero galowang?
Gin ango ma imaro timone ka itye ka yweyo wii? Jo mogo gimaro bedo gang mot ka yweyo—kun gikwano buk, giwinyo wer, gineno filim, nyo gineno jami mogo ki i Intanet. Jo mukene gimaro timo jami kacel ki luwotgi—jami calo ito got, kwang, nyo tuku. Myero wanen ni kit galowang mo keken ma wayero “yomo cwiny Rwot.” (Jo Epeco 5:10) Pire tek ni wange man pien pol pa galowang ma dano gimaro opong ki jami ma Jehovah dag, jami calo tim gero, tim me tarwang, nyo tim jokjok. (Kwan Jabuli 11:5.) Gin ango ma bikonyowa me yero galowang ki ryeko?
Ka wayero lurem ma maro Jehovah, man bikonyowa me yero galowang maber. Kit ma waneno kwede i pwony mukato angec, “ngat ma bedo kacel ki jo maryek pwonnye doko ryek bene.” Ki tungcel ka wamaro bedo kacel ki jo ma pe gimaro cik pa Lubanga ci ‘kitwa biballe woko.’—Carolok 13:20.
2. Pingo pire tek ni watam i kom cawa ma wacwalo i galowang?
Kadi bed galowang ma wayero opore, omyero wagwokke pe me cwalo cawa malac tutwal i galowang. Ka pe, ci pe wabinongo cawa muromo me timo jami ma pigi tego loyo. Baibul cuko cwinywa ni ‘kare ma watye kwede myero wati kwede i yo maber.’—Kwan Jo Epeco 5:15, 16.
NONG NGEC MATUT
Nen kit ma itwero yero kwede galowang maber.
3. Gwokke ki galowang maraco
Pingo myero wayer galowang ki ryeko? Tuk VIDIO, ci wunyam lapeny ma lubo.
Pyem tuku lweny ma onongo timme i Roma rom ki galowang mogo me kare-ni nining?
Ki i vidio ma waneno-ni, gin ango ma Daniel opwonyo madok i kom galowang?
Kwan Jo Roma 12:9, ci wunyam lapeny man:
Tyeng man twero konyi me yero galowang maber nining?
Kodi jami mene ma Jehovah dag? Kwan Carolok 6:16, 17 ki Jo Galatia 5:19-21. I nge kwano ginacoya magi ki acel acel, wunyam lapeny man:
I kin jami ma kiloko iye i wang Baibul man, mene ma kimaro nyutone i galowang me kare-ni?
Kit me yero galowang ki ryeko
Pennye kekeni ni:
Gin ango? Tika kwako gin mo ma Jehovah dagi?
Cawa adi? Tika balo cawana ma myero atim kwede ki jami ma pigi tego loyo?
Anga? Tika weko aribbe ki jo ma pe maro Jehovah?
Pire tek ni wagwokke adada ki gin mo keken ma keto kwowa ka mading. Meno aye gin muweko myero wagwokke ki galowang mo keken ma pe opore piwa
4. Ti ki cawani maber
Tuk VIDIO, ci wunyam lapeny ma lubo.
Kadi bed ni omego ma i vidio-ni onongo pe tye ka neno gin mo marac, ento kit ma en onongo galo kwede wange ogude nining?
Baibul me New World Translation waco i Jo Pilipi 1:10 ni: “Wuket pi jami ma pigi tego loyo obed mukwongo.”
Dong wang Baibul man konyowa nining me moko cawa adi ma myero water i galowang?
5. Yer galowang mupore
Kadi bed galowang mogo pe yomo cwiny Jehovah, ento tye bene mogo mabeco. Kwan Latitlok 8:15 ki Jo Pilipi 4:8, ci wunyam lapeny man:
Galowang maber mene ma imaro?
Itwero nongo mit pa galowang mabeco
JO MOGO GIWACO NI: “Pe tye gin mo marac ki galowang ma nyuto tim gero, tim tarwang, ki tim jokjok, tek-ki pe atimo jami magi.”
In kono iwaco ningo?
WOT WIYE WIYE
Jehovah mito ni wayer dok wanong mit pa galowang mabeco.
Ngo ma ipwonyo?
Kodi galowang mene ma Lakricitayo myero ogwokke kwede?
Pingo myero wagwokke ki cawa ma wacwalo i galowang?
Pingo imito yero galowang ma yomo cwiny Jehovah?
TIM KWED
Nen anga ma myero omok tam piri i kom galowang.
Nen kit ma itwero moko kwede tam maber ka odok i lok kom galowang.
“Tika Jami ma Itimogi me Mato Yamo Giber?” (Wi Lubele, Oktoba 15, 2011)
I lok ma wiye tye ni “Aloyo Bene Cwiny me Apokapoka,” nen pingo laco mo otimo alokaloka i kom jami ma en galo ki wange.
Nen kit ma mego mo omoko kwede tam maber i kom galowang ma nyuto tim jokjok.