PWONY ME 11
Itwero Nongo Adwogi Maber Loyo ki i Kwano Baibul Nining?
Go kong ni imito puru poto mo madit adada dok pe ingeyo ka ma myero icak ki iye. Wek tic madit man pe obwoyi woko, itwero poko iye i katala matinotino wek obed yot. Man bene tye ada ka odok i lok me kwano Baibul. Itwero pennye ni, ‘Aromo cako kwan madit kit man nining?’ I pwony man, wabinyamo jami mogo mayot ma itwero timone ma bikonyi me nongo mit pa kwano Baibul.
1. Pingo omyero wakwan Baibul nino ducu?
Ngat ma kwano Baibul, nyo “cik pa Rwot [Jehovah],” bibedo ki yomcwiny kun bene cobo ticce kakare. (Kwan Jabuli 1:1-3.) Me cakone, tem kwanone pi dakika mo manok keken nino ducu. Ka iwoto ki ngi ki Lok pa Lubanga, ci ibicako nongo mit pa kwano Baibul.
2. Ngo ma bikonyi me nongo adwogi maber ki i kwano Baibul?
Me nongo adwogi maber loyo ki i kwano Baibul, mitte ni kong wacung manok dok watam i kom gin ma watye ka kwanone. Pe mitte ni wakwan keken ento bene wabed “ka lwodone.” (Yocwa 1:8) Ka itye ka kwan, pennye kekeni ki lapeny calo magi: ‘Ginacoya man tita ngo i kom Lubanga Jehovah? Atwero ketone i tic i kwona nining? Atwero tic ki tyeng magi me konyo jo mukene nining?’
3. Itwero nongo cawa me kwano Baibul nining?
Tika iyelle me nongo cawa me kwano Baibul? Pol pa wan bene wakemme ki ariya meno. Tute matek me ‘tic ki kare ma itye kwede i yo maber.’ (Jo Epeco 5:16) Itwero timo man ki keto cawa mo nino ducu ma itiyo kwede me kwano Baibul. Jo mogo giketo cawa me kwano Baibul odiko con. Jo mukene giyero cawa mo i dyeceng, gwok nyo i cawa me cam me dyeceng. Jo mukene gikwano Baibul otyeno ma peya gucito i kabuto. Cawa mene ma inongo ber loyo piri?
NONG NGEC MATUT
Pwony kit ma itwero weko kwano Baibulli bedo mamit. Nen kit me yubbe maber wek inong adwogi maber loyo ki i kwanni me Baibul.
Kit macalo watwero pwonnye me maro camo cam mapatpat, watwero bene pwonnye me maro kwano Baibul
4. Ngo ma itwero timo wek inong mit pa kwano Baibul?
Pe twero bedo yot me cako kwano Baibul. Ento, itwero pwonnye me nongo mit pa kwano Baibul kit macalo itwero pwonnye me maro cam mo ma onongo yam peya icamo. Kwan 1 Petero 2:2, ci wunyam lapeny man:
Itamo ni kwano Baibul nino ducu twero konyi nining me nongo mitte?
Tuk VIDIO ci inen kit ma bulu mogo gucako nongo kwede mit pa kwano Baibul. I nge meno, wunyam lapeny ma lubo-ni.
I vidio man, ariya ango ma bulu magi guloyo?
Gin ango ma okonyogi me medde ki kwano Baibul nino ducu?
Ngo ma gutimo ma oweko kwano Baibulgi obedo mamit?
Tam mogo ma twero konyi me cako kwano Baibul:
Yer Baibul ma kigonyo kakare dok tiyo ki leb me kare-ni. Tem kong Baibul me New World Translation ka iniang leb Muno maber.
Cak ki kwano but Baibul ma cwinyi maro loyo. Pi tam mukene, nen chart ma wiye tye ni “Cak Kwano Baibul.”
Co piny jami ma dong ikwano. Ti ki chart me “Gwok Rekod me Kwano Baibulli” ma nonge i buk man.
Ti ki JW Library® app. Man romo konyi me kwano ki winyo dwan ma kimako me Baibul ki ka mo keken, kun itiyo ki cim nyo tet mo mukene.
Ti ki lamed ngec ma i New World Translation. Tye ki mep, chart, ki nyig kwayilok ma twero weko inongo mit pa kwano Baibul.
5. Yubbe maber pi kwanni me Baibul
Kwan Jabuli 119:34, ci wunyam lapeny man:
Pingo pire tek ni ilegi ma peya icako kwano Baibul piri keni nyo yubbe pi kwan ki lapwonnyi?
Itwero nongo adwogi maber loyo ki i kwanni me Baibul nining? Ka iwoto ki yubo pwony ma i buk man, tem tic ki yo man:
Kwan paragraf ma tye i pot karatac mukwongo me pwony meno.
Yab wang ginacoya ducu ma kiketogi dok ikwangi, kun itemo niang kit ma gikubbe kwede ki pwony meno.
Ngol te lok ma gamo lapeny acel acel; man bikonyi ka wutye ka nyamo pwony meno ki lapwonyi.
Tika onongo ingeyo?
Lucaden pa Jehovah dong gutiyo ki Baibul mapatpat. Ento, Baibul ma wamaro loyo obedo New World Translation of the Holy Scriptures pien kigonyo kakare, niang iye yot, dok tiyo ki nying Lubanga.—Nen pwony ma tye i jw.org ma wiye tye ni “Tika Lucaden pa Jehovah Gitye ki Baibul ma Megi?”
JO MOGO GIWACO NI: “Kwano Baibul obedo gin matek adada. Pe atye ki cawa nyo kero me timone.”
In kono itamo ningo?
WOT WIYE WIYE
Wek inong adwogi maber ki i kwano Baibul, ket cawa me kwanone, leg wek iniang gin ma itye ka kwano, dok iyubbe maber pi kwan ki lapwonyi.
Ngo ma ipwonyo?
Gin ango ma bikonyi me nongo adwogi maber loyo ki i kwano Baibul?
Cawa mene ma itwero ketone me kwano Baibul?
Pingo pire tek ni iyubbe pi kwanwu me Baibul ki lapwonyi?
TIM KWED
Wot wiye wiye i tam mogo ma twero konyi me nongo adwogi maber ki i kwano Baibul piri keni.
“Kit me Nongo Adwogi Maber ki i Kwano Baibul” (Wi Lubele Nam. 1 2017)
Nen yo adek mapatpat me kwano Baibul.
“Kwano Baibul Twero Konya Nining?—Bute me 1: Ngeyo Baibulli Maber” (Pwony ma tye i jw.org)
Nen kit me nongo mit pa kwano Baibul.
“Kwano Baibul Twero Konya Nining?—Bute me 2: Wek Kwano Baibulli Obed Mamit” (Pwony ma tye i jw.org)
Nong tam ma twero konyi ki bot jo ma gukwano Baibul pi mwaki mapol.