PWONY ME 07
Gin Ango ma Wangeyo i kom Jehovah?
Ka itamo i kom Lubanga Jehovah, ngo ma bino i wi? Tika itamo ni en rwomme lamal adada dok tye mabor kwedi, calo lakalatwe ma i yogo ka mo mabor ata? Nyo mono igoyo i wi ni en pe obedo ngat mo, ento obedo gin mo ma tye ki teko madwong calo lutkot? Gin ango ma wangeyo i kom Jehovah? Ki i Lokke Baibul, Jehovah onyuto kite mogo. En bene otito ni eparo piri.
1. Pingo pe watwero neno Lubanga?
“Lubanga en Cwiny.” (Jon 4:24) Jehovah pe tye ki kom calo kom dano. En tye ki kom me cwiny dok kwo i polo.
2. Kit pa Jehovah mogo obedo ngo?
Kadi bed pe watwero neno Jehovah, en tye ki kite ma weko jo ma gingeye gimare matek. Baibul waco ni: “Rwot [Jehovah] maro ngolo kop atir; pe bibwoto jo ma gigeno en.” (Jabuli 37:28) En bene ‘lakica adada dok timo ber bot dano,’ tutwalle dano ma gitye ka deno can. (Yakobo 5:11) “Rwot [Jehovah] tye cok ki jo ma cwinygi goro, en laro jo ma gitye ki arem madwong i cwinygi.” (Jabuli 34:18) Tika onongo ingeyo ni jami ma watimo twero yomo cwiny Jehovah nyo cwero cwinye? Ngat ma yero me timo jami maraco turo cwinye. (Jabuli 78:40, 41) Ento ngat ma yero me timo gin ma atir yomo cwinye.—Kwan Carolok 27:11.
3. Jehovah nyuto nining ni emarowa?
Kit pa Jehovah ma dong pire tek loyo ducu aye mar. Ki lok ada, Baibul pe waco ni Lubanga tye ki mar keken, ento ni, “Lubanga aye mar.” (1 Jon 4:8) Jehovah nyuto marre, pe ki i Baibul keken, ento bene ki i jami ma en ocweyo. (Kwan Tic pa Lukwena 14:17.) Me labolle, tam kong kit ma en ocweyowa kwede. En ominiwa kero me neno kala mapatpat, winyo wer mamwonya, ki bilo dek mamit. En mito ni wanong mit pa kwo.
NONG NGEC MATUT
Pwony gin ma Jehovah tiyo kwede me cobo tic madongo adada. I nge meno nen kit ma Jehovah nyuto kwede kite mamwonya.
4. Cwiny maleng obedo teko pa Lubanga
Kit macalo watiyo ki cingwa me cobo tic, Jehovah tiyo ki cwiny mere maleng. Baibul nyuto ni cwiny maleng pe obedo Lubanga, ento teko ma Lubanga tiyo kwede me cobo ticce. Kwan Luka 11:13 ki Tic pa Lukwena 2:17, ci wunyam lapeny magi:
Lubanga ‘bionyo’ cwiny mere maleng i kom jo ma gilege pire. Dong, itamo ni cwiny maleng obedo Lubanga, nyo teko pa Lubanga? Pingo iwaco kit meno?
Jehovah tiyo ki cwiny mere maleng me cobo tic madongo adada. Kwan Yubu 33:4 ki 2 Petero 1:20, 21, ci wunyam lapeny man:
I yo mapatpat ango ma Jehovah otiyo kwede ki cwiny mere maleng?
5. Jehovah tye ki kite mamwonya adada
Moses onongo dong otiyo pi Lubanga ki gen pi mwaki mapol, ento en onongo pud winyo calo omyero enge Lacwecce maber. Pi meno, Moses openyo Lubanga ni: “Nyutta kiti, wek angeyi.” (Nia 33:13) Jehovah ogamo lega pa Moses ki tite Kite mogo. Kwan Nia 34:4-6, ci wunyam lapeny magi:
Kit pa Jehovah mene ma en onyuto bot Moses?
Kit pa Jehovah mene ma yomo cwinyi loyo?
6. Jehovah paro pi dano
Luibru, jo pa Lubanga i kare macon, onongo gubedo opii i lobo Ejipt. Jehovah owinyo nining i kare ma jone onongo gitye ka deno can? Tuk DWAN MA KIMAKO ci ilubi, nyo kwan Nia 3:1-10. I nge meno wunyam lapeny ma lubo.
Tyeng magi nyutti gin ango ka odok i kom kit ma Jehovah winyo kwede i kom deno can?—Nen tyeng me 7 ki 8.
Tika itamo ni Jehovah tye ki miti kacel ki teko me konyo dano? Pingo iye, nyo pe iye?
7. Ginacweya nyuto kit pa Jehovah
Jehovah onyuto kite mapatpat i jami ma en ocweyo. Tuk VIDIO. I nge meno kwan Jo Roma 1:20, ci wunyam lapeny ma lubo.
Kit pa Jehovah mapatpat ango ma ineno i jami ma en ocweyo?
JO MOGO GIWACO NI: “Pe watwero neno Lubanga, pi meno pe watwero ngeyo en maber.”
In itamo ningo?
Pingo iwinyo kit meno?
WOT WIYE WIYE
Jehovah obedo Cwiny ma pe watwero neno. En tye ki kite mabeco mapol, tutwalle mar.
Ngo ma ipwonyo?
Pingo pe watwero neno Jehovah?
Cwiny maleng obedo gin ango?
Tit kong kit pa Jehovah mogo.
TIM KWED
Med ngecci i kom Jehovah kun ipwonyo kite angwen ma pigi tego loyo.
Nen kong jami ma moko ni Jehovah pe tye ka weng.
Nen kong pingo Baibul poro cwiny maleng ki cing Lubanga.
Onongo tek adada pi laco mo ma latowang me ye ni Lubanga paro pire. Nen kong gin ma oweko en oloko tamme.
“I Kare-ni Dong Awinyo Calo Atwero Konyo Jo Mukene” (Wi Lubele, Oktoba 1, 2015)