Baibul Tye ki Kwena pa Lubanga Piwa

Jehovah ominiwa Baibul. Man obedo mic mamwonya adada ma tye ki bukke 66 matinotino. Ento itwero pennye ni: ‘Baibul ocako oo botwa nining? Anga ma oweko kicoyo?’ Me gamo lapeny magi, kong dong wanyam kit ma kwena pa Lubanga ma tye i Baibul oo kwede botwa.

1. Dano aye ma ocoyo Baibul, dong pingo wawaco ni Baibul oa ki bot Lubanga?

Co ma romo 40 mapatpat aye ma gucoyo Baibul dok gutero mwaki ma romo 1,600 cakke i mwaka 1513 K.M.P. me o i mwaka 98 K.M. Luco Baibul gua ki i kabedo mapatpat, dok jo mogo i kingi onongo gitye lukwat, lumak rec, kacel ki luker. Kadi bed kit meno, lok ducu ma i Baibul rwatte. Man twere nining? Man twere pien Lubanga aye oweko kicoyo Baibul. (Kwan 1 Jo Tecalonika 2:13.) Luco Baibul magi pe gucoyo tamgi. Me ka meno, “cwiny maleng aye mumiyo dano guloko lok ma oa ki bot Lubanga.”a (2 Petero 1:21) Lubanga otiyo ki cwiny mere maleng me tugo cwiny co magi me coyo tamme.—2 Temceo 3:16.

2. Nongo Baibul yot lakwene?

“Rok ducu ki kaka ki leb-gu ki jo mapatpat ducu” gitwero nongo adwogi maber ki i kwena maber ma tye i Baibul. (Kwan Niyabo 14:6.) Lubanga oweko Baibul tye nonge i leb mapol adada loyo buk mo keken i tekwaro pa dano. Cokcok dano ducu ma i wi lobo-ni gitwero kwano Baibul. Man tye ada kadi bed gitye kwene nyo giloko leb mene.

3. Jehovah ogwoko Baibul nining?

I kare ma kicoyo Baibul, kicoyo i kom jami ma pe rii. Onongo gitiyo ki bukke adola ma kiyubo ki pyen nyo togo. Ento co ma gimaro Baibul onongo gikobo coc me Baibul ki cinggi kore ki kore. Luloc ki lutela dini mogo gutute matek me rwenyo kopi me Baibul ma onongo tye i kare meno, ento jo mukene guketo kwogi ka mading wek gigwok Baibul. Jehovah pe oye ni gin mo nyo ngat mo keken ogenge ki lok kwedwa. Baibul waco ni: “Lok pa Lubanga bedo matwal.”—Icaya 40:8.

NONG NGEC MATUT

4. Baibul nyuto ngat ma oweko kicoyo

Tuk VIDIO. Ci kwan 2 Temceo 3:16, dok wunyam lapeny magi.

VIDIO: Lok me Baibul Obedo pa Anga?—Bute Manok (2:48)

• Ka dano aye ma gucoyo Baibul, ci pingo kilwongo ni Lok pa Lubanga?

• Tika itamo ni pore me ye ni Lubanga ocwalo tamme i wi jo ma gucoyo Baibul?

5. Baibul obwot ki i cing jo ma gimito rwenyone woko

VIDIO: Gutero Baibul Calo Gin ma Pire Tek—Bute Manok (William Tyndale) (6:17)

• Kit ma dong iniang tute pa dano me gwoko Baibul, tika mitini me kwanone odongo? Pingo?

Kwan Jabuli 119:97, ci wunyam lapeny man:

• Gin ango ma otugo cwiny jo mapol me keto kwogi ka mading wek gigony Baibul dok gipok i leb mapol?

6. Buk ma kicoyo pi dano ducu

Baibul obedo buk ma kigonyo dok kipoko i leb mapol loyo buk mo keken i tekwaro pa dano. Kwan Tic pa Lukwena 10:34, 35, ci wunyam lapeny magi:

• Pingo Lubanga mito ni kigony Lokke i leb mapol dok kipok i wel madwong?

• Gin ango ma ogudo cwinyi loyo i kom Baibul ma lubbe ki gin ma wanyamo i pwony man?

WOT WIYE WIYE

Baibul obedo Lok pa Lubanga, dok en oneno ni tye nonge bot dano ducu.

Ngo ma ipwonyo?

• Tyen lokke ngo ka kiwaco ni Lubanga otiro dano me coyo Baibul?

• Ngo ma gudo cwinyi loyo madok i kom kit ma Baibul oloyo kwede ki i cing jo maraco, leb mapatpat ma kigonyo iye, ki dong kit ma kipoko kwede?

• Iwinyo nining i kom Lubanga, i nge pwonyo kit ma en otute kwede me lok kwedi?

TIM KWED

Kwan kit ma Baibul oo kwede botwa cakke ki i coc macon nio wa i kare-ni.

“Kit ma Baibul Oo Kwede Botwa” (Awake!, Novemba 2007)

Nen kit ma Baibul oloyo kwede ki i kom jami adek ma onongo twero rwenyone woko.

“Kit ma Baibul—Obwot Kwede” (Wi Lubele Nam. 4 2016)

Nen kong kit ma dano guketo kwogi ka mading me gonyo Baibul.

Gutero Baibul Calo Gin ma Pire Tek (14:26)

Baibul kikobo dok kigonyo tyen mapol adada. Pingo watwero bedo ki gen ni kwena ma iye pe olokke?

“Tika Kiloko Lok ma i Baibul?” (Pwony ma tye i jw.org)