Lapwony Madit Otiyo Pi Jo Mukene

TIKA cwinyi bedo yom ka ngat mo otimmi gin mo maber?— Jo mukene bene cwinygi bedo yom ka ngat mo otimigi gin mo maber. Wan ducu cwinywa bedo yom. Lapwony Madit onongo ngeyo meno, dok kare ducu en obedo ka timo jami pi dano. En owacci: ‘Abino, pe ni wek kitii pira, ento wek atii pi dano.’​—Matayo 20:28.

Dong ngo ma omyero watim ka wamito ni wabed calo Lapwony Madit?— Omyero watii pi jo mukene. Omyero watim jami mabeco botgi. Tye kono ni, dano mapol pe gimaro timo man. Ki lok ada, pol pa dano gimito ni jo mukene aye guti pigi kare ducu. Lulub kor Yecu bene kare mo gubedo ki kodi cwiny meno. Ngat acel acel i kingi onongo mito ni ebed ladit nyo ngat ma pire tek loyo.

I nino mo acel, Yecu onongo tye ka wot ki lupwonnyene. I kare ma guo i Kapernaum, ma tye cok ki Nam me Galilaya, gin ducu gudonyo i ot mo acel. Ci, Yecu openyogi-ni: “Wubedo ka laro lok ango i wangayo kekenwu-ni?” Ento guling alinga, pien onongo gubedo ka laro lok kekengi i wangayo pi ngat ma rwomme dit loyo i kingi.​—Marako 9:33, 34.

Yecu onongo ngeyo ni pe pore pi lapwonnye mo keken me tamone ni en aye edit ma loyo. Dong, kit ma wapwonyo kwede i dul me acel me buk man, en oweko latin matidi ocung i nyimgi ci owaccigi ni myero gumwolle calo latin matidi meno. Ento pe gupwonyo gin mo. Ma en dong cok to, Yecu opwonyogi ki gin mo acel ma wigi pe owil iye matwal. Ngo ma en otimo?—

I kare ma gin ducu gitye ka cam, Yecu oa malo ki i kabedone, okwanyo taulo, otweyo i pyere. I ngeye, okwanyo becen ci oonyo pii iye. Lulub kore nen calo gubedo ki ur i kom gin ma en mito timone. Yecu ogungo piny kun lwoko tyengi ducu ma wanggi neno. I nge meno, en odunyo tyengi ki taulo. Tam kong lok meno! Ka onongo itye kunnu kono? Onongo ibiwinyo nining?—

Lulub kore gutamo ni pe pore pi Lapwony Madit-ti me tic pigi i yo ma kit man. Lewic omakogi adada. Petero onongo pe obiye ni Yecu oti tic ma lapiny tutwal-li pire. Ento Yecu owacci pire tek ni omyero eti tic man.

Wan pe walwoko tyen luwotwa i kare-ni. Ento man onongo kitimo i kare ma Yecu pud tye i lobo. Ingeyo pingo?— I lobo ma Yecu ki lupwonnyene gukwo iye, dano onongo giruko war ma pe umo tyengi ducu. Ma ka gitye ka wot i gudo ma tye ki apwa, ci miyo tyengi kwor ki apwa. Lwoko apwa ki i tyen welo ma obino ka lim i paco onongo obedo kit me nyutu kica botgi.

Ento i nino man, pe tye lalub kor Yecu mo keken ma omine me lwoko tyen lawote. Mumiyo Yecu otimo en kikome. Yecu opwonyo lulub kore pwony mo ma pire tek adada ki timo man. Onongo mitte ni myero gunong pwony ki i iye. Kadiwa wan i kare-ni bene myero wanong pwony ki i iye.

Mono ingeyo ngo ma pwony man obedo?— I kare ma Yecu odok cen i kabedone, en otito ni: “Wuniang gin ma atimo i komwu? Wulwonga ni Lapwony dok ni Rwot; meno ber, pien atye kit meno. Ka an a Rwotwu ki Lapwonywu, alwoko tyenwu, wun bene myero wulwok tyenwu kekenwu.”​—Jon 13:2-14.

Kany, Lapwony Madit onyutu ni emito ni lulub kore guti pi luwotgi. En onongo pe mito ni gutam pigi kengi. En onongo pe mito ni gin gutam ni pigi tek tutwal ma jo mukene aye kare ducu myero oti pigi. En onongo mito ni gumine kengi me tic pi jo mukene.

Meno mono pe obedo pwony mo maber adada?— Tika ibibedo calo Lapwony Madit-ti kun itiyo pi jo mukene?— Wan ducu watwero timo jami pi jo mukene. Man bimiyo cwinygi bedo yom. Ma pud dong ber loyo aye ni bimiyo cwiny Yecu gin ki Wonne bedo yom.

Pe tek me tic pi jo mukene. Ka ineno mot, inongo ni tye jami mapol ma iromo timone pi jo mukene. Kong itam: Tika tye gin mo ma iromo timone me konyo mamani? Ingeyo maber ni en timo jami mapol piri ki pi jo mukene me otwu. Iromo konye?— Pingo pe ipenye?

Gwok nyo iromo twomo pii i cawa me tedo. Nyo coko jami i nge tyeko cam. Lutino mukene giyweyo dok gidunyu dye ot nino ducu. Gin mo keken ma iromo timone, nongo itye ka tic pi jo mukene, kit ma Yecu otimo kwede.

Tika itye ki omegini ki lumegini matino ma iromo tic pigi? Wi myero opo-ni, Yecu, ma en Lapwony Madit-ti, otiyo bene wa pi lulub kore. Ka itiyo pi omegini ki lumegini matino, ci nongo itye ka poro Yecu. Ngo ma itwero timone pigi?— Gwok nyo itwero pwonyogi kit me lwoko komgi. Nyo iromo konyogi ki ruko bongo i komgi. Nyo itwero konyogi ki peto kabuto. Tika iromo tamo i kom gin mo keken mapat ma itwero timone pigi?— Gibimarii ka itimo jami magi, kit ma lulub kor Yecu gumarre kwede-ni.

Wa i gang kwan bene itwero tic pi jo mukene. Twero bedo lutino kwan luwoti nyo lapwonnyi. Ka buk opoto ki i cing ngat mo, bedo me kica ka ikonye ki kwanyone. Iromo dyere me dunyo kor bao nyo konyo lapwony ki timo gin mo mapat. Kadi wa konyo ngat mo ki kalam nyo pencil nyutu cwiny me kica.

I kine mogo, inongo ni dano pe gipwoyo tic ma watiyo pigi. Itamo ni man mono myero ogengwa ki timo jami mabeco?— Pe! Dano mapol pe gupwoyo Yecu pi tic mabeco ma en otimo. Ento meno pe ogenge ki timo jami mabeco.

Pi man, omyero wamedde ki tic pi jo mukene. Omyero wiwa opo i kom Yecu Lapwony Madit, kun kare ducu watemme me lubu lanene.