Dul Lok me Apar Wi Acel
‘Kong Wukwong Keto Cwinywu i Kom Kerre’
1. (a) Pingo Yecu ocuko cwiny luwiny lokke me keto Kerri ma okwongo pi oyot? (b) Dong kit lapeny ango ma omyero wapenye kwede?
I LOKKE ki i Galilaya, inge mwaka ma kato 1,900 i angec, Yecu ocuko cwiny luwiny lokke ni: “Kong, wukwong, keto cwinywu i kom kerre ki nongo kit matir ma [Lubanga] tye kwede.” Pingo man mitte me oyot? Onongo mono kare ma Kricito myero ogam iye twero me Ker pud pe tye cencwari mapol i anyim? Tye kit meno, pien Ker pa Meciya-ni aye obedo yo ma Jehovah binyuto kwede twero me locce mamalo loyo-ni kun cobo kwede yubbe madit pi lobo. Dong onongo ngat mo keken ma nongo pwoyo dit pa lok man biketo Ker man bedo gin ma okwongo i kwone. Ka meno otimme ada i cencwari ma okwongo, ci man dong pe bitimme makato kombeddi, ma dong giketo Kricito i kom ker macalo Kabaka ni! Dong lapeny tye ni, kwo-na mono nyuto ni an aketo Ker pa Lubanga macalo gin ma okwongo?—Matayo 6:33.
2. Jammi ango ma pol pa dano guketo iye komgi?
2 Kombeddi, dano milion mapol ata i wi lobo ducu i ada, dong gitye ka keto Kerri tye ma okwongo. Gitye ka nyuto cwakgi pi loc me Kerri ki keto pi tiyo mitti pa Jehovah calo gin ma pire tek loyo i kwogi, kit ma dong gutyeko dyere woko bote ni. Ki tung cel kono, pol pa dano gitye ki miti me yenyo jammi me kom mamwa. Dano giyenyo cente ki jammi ma cente twero wilo-ne. Nyo giketo tekogi ducu i pwonye i ticgi. Yo me kwogi nyuto ni tamgi ducu ojenge i tic me komgi, ki mitti matek me jammi me kom, ki yomcwiny. Ka giye i kom Lubanga, ci nongo gikete bedo me aryo.—Matayo 6:31, 32.
3. (a) Kit Lonyo ango ma Yecu ocuko iye cwiny lupwonyene me yenyo, dok pingo? (b) Ngo ma weko pe ber me paro tutwal pi jammi mapol me kom?
3 Bot lupwonyene kono,Yecu ociko kuman ni: “Pe wukan lonyo piwu kenwu i lobo,” kit ma jammi magi ducu pe tye mo ma rii nakanaka. En owaco ni, “Ento wukan lonyo piwu kenwu i polo” ki tic bot Jehovah. Yecu otito bot lupwonyene me gwoko wangi labongo “bal mo” ki keto tamgi ki tekogi ducu pi timo miti pa Lubanga. En owaco botgi ni: “Pe wutwero tic pi Lubanga ka dok wutiyo pi lim bene.” Ento jammi mogo ma mitte kono, calo cam, bongo, ki kabedo? Yecu ociko ni, “pe wubed iye ki par mapol.” En owiro tamgi i kom winyi ma Lubanga pitogi. Yecu ojingo cwiny lulub kore me nongo pwony i kom ature ma Lubanga rukugi. Ci lutic ma dano ma ryek pa Jehovah pirgi pe tek makato kit jammi magi ducu? Yecu owaco ni “kong wukwong keto cwinywu i kom kerre, ki nongo kit ma atir ma en tye kwede, ci jami magi ducu gibimedo botwu.” (Matayo 6:19-34) Gin ma itiyo nyuto ni in icwako lok man?
Pe I wek Ada me Ker Oto Woko
4. Ka dano keto tamme ducu pi jammi me kom, adwogi ango ma en twero bedo kwede?
4 Rwatte me paro pi jammi ma oromo me gwoke wa. Ento doko rac ka dano moni dok paro pi jammi mukato kare, pien twero kelo peko mapol. Kadi bed ni en waco ni en eye i kom Kerri, ka i cwinye, en keto jammi mukene me bedo ma okwongo, ci bineko ada me Kerri woko. (Matayo 13:18-22) Me laporre, i kare mo, lalonyo mo ma pud tidi openyo Yecu ni: “Lapwony maber, atim ango wek alim kwo ma pe tum?” En onongo obedo ngat ma kwone atir dok tero dano i yo maber, ento onongo maro jammi-ne tutwal. Onongo en pe twero pokke ki jammi magi me wek ebed lalub kor Kricito. Pi meno en oweko kare me bedo ki Kricito i Kerre me polo okate. Yecu owaco i kare meno ni: “Bibedo tek mada bot jo ma lulonyo me donyo i ker pa Lubanga!”—Marako 10:17-23.
5. (a) Gin ango ma Paul ocuko iye cwiny Temceo pi bedo ki jammi ma romo, dok pingo? (b) Catan tiyo ki “maro lim” pi bolowa i owicce nining?
5 Inge mwaki mapol, lakwena Paul bene ocoyo waraga bot Temceo, ma onongo bedo i Epeco, boma mulony pi tic biacara. Paulo opoyo wiye ni: “Pien wan yam pe wakelo gin mo i lobo kany, dok bene pe wabitwero tero gin mo ka wa a ki i lobo. Ento ka watye ki cam ki ginaruka, ja[m]mi magi romowa gire.” Tic me nongo “cam ki ginaruka” pi in obedo gin ma rwatte. Ento Paulo ociko ni: “Ento jo ma mito bedo lulonyo gimiyo Catan bitogi ci gipoto i bal, ka dong gimoko i owic pa Catan pi mit-gi mapol me mingo ma tye ka unogi, miyo girwenyo dok gito woko matwal.” Catan tiyo ki diro. Ma okwongo, en twero bito dano i gin matidi. Lyeto madit romo lubo man, kare mukene nyo tic ma dok ber ber ma mucarane gwok dwong loyo, ento ma nongo mitte ni i tii ki kare ma nongo con iketo pi jammi me cwiny. Ka pe wagwokke, “maro lim” twero neko mitti me Ker ma pire tekki woko. Paulo oketo kit man: “Pien maro lim en aye acakki me gin maraco ducu.”—1 Temceo 6:7-10.
6. (a) Me loyo moko i owic me maro jammi, myero watim gin ango? (b) Gen ango ma watwero bedo kwede kadi bed peko me lim tye oguro lobo ducu kombeddi?
6 Pi mar-ne pi omine ma obedo Lakricitayo, Paulo omiyo tam bot Temceo ni: “Leng yo ki ja[m]mi meno” dok ni “Lweny lweny maber me niye.” (1 Temceo 6:11, 12) Yelle matek mitte me wek pe kijwerwa kacel ki kwo me mitti me jammi me lobo matek tutwal ma orumowa ni. Ento ka wayelle matek kun walubo niyewa, ci Jehovah pe bibwotowa. Kadi bed wel jammi odong malo dok peko me nongo tic onya, en bineno maber ni wabedo ki jammi ma i ada mitte. Paulo ocoyo ni: “Pe wubed jo ma maro lim; jami ma wutye kwede myero oromwu, pien Lubanga yam oloko ni ‘Pe abiboli, pe abibwoti ata.’ En meno gin mumiyo cwinywa tek, kun wawaco ni, ‘Rwot en lakony mera, pe abibedo ki lworo; ngo kono ma dano twero timo i koma?’” (Jo Ibru 13:5, 6) Dok Kabaka Daudi bene ocoyo ni: “Yam abedo latin, ento man dong adit; pud peya aneno gibwoto dano ma kite atir, kadi ki lutinone bene pe aneno ka gilego kwon alega.”—Jabuli 37:25.
Lupwonnye ma Yam Con Gumiyo Labol
7. Cik ango ma Yecu omiyo bot lupwonnyene ma mako pwony, pingo onongo rwatte?
7 Inge miyo ki lupwonnyene pwony ma oromo, Yecu ocwalogi kapwony woko i Icrael pi tito lok me kwena maber kun waco ni: “Ker me polo dong onyiko cok.” Man onongo obedo kwena me yom ic pud dong ya! Yecu Kricito ma en aye Meciya dok Kabaka, onongo tye i kin-gi. Cakke ma lupwonnyene gumine me timo mitti pa Lubanga, Yecu ocuko cwinygi me geno ni Lubanga bigwokogi. Pi meno en owaco ni “Pe wuwot ki gin mo kadi ki odoo, kadi kicaa, kadi kwon, kadi lim, dok pe wubed ki kanyi aryo. Ot ma wubidonyo iye, wubed kunnu, nio ka wubia, wucito giwu.” (Matayo 10:5-10; Luka 9:1-6) Jehovah onongo bineno ni jammi ma mitte pirgi ononge ki bot utmego-gi me Icrael ma jolo welle onongo obedo kit me te kwarogi.
8. (a) Ma dong Yecu cok ki to, pingo dok omiyo cik manyen me pwony? (b) Ngo ma pud myero obed me acel i kwo pa lupwonnye pa Yecu?
8 Lacen, ma Yecu onongo dong cok ki to, en opoyo wi lupwonnyene ni i anyim gin bitiyo tic ma nongo piny dok olokke woko. Macalo adwogi me jemo pa luloc i kom ticgi, jologi macalo welle i Icrael dong bibedo tek. Ka dok bene, gin onongo dong gicok ki tero kwena me Kerri i lobo pa Lurok. Pi meno onongo dong bimitte ni ‘Myero guwot ki kicaa lim ki opiro bene kit meno.’ Ento kadi bed kit meno, gin myero kong gukwong keto cwinygi i kom Ker pa Jehovah ki kit ma atir, ka weko Lubanga bimiyo botgi mot me nongo cam ki ginaruka.—Luka 22:35-37.
9. Paulo oketo Kerri ma okwongo i kwone kun nongo jammi ma mitte me kwone pire kene nining, dok tam ango ma en omiyo ma kwako lok man?
9 Lakwena Paul obedo lanen maber calo ngat ma olubo tam pa Yecu. Paul ocibo kwone ducu i kom dog tic-ci. (Tic pa Lukwena 20:24, 25) Ka en ocito ka pwony i kabedo mo, en onongo bedo latic ma kwiri pien onongo ngeyo yubo kema, ma omiyo onongo en nongo jammi ma mitte me kwone pire kene. En pe obedo ka geno ni jo mukene aye myero ogwokke. (Tic pa Lukwena 18:1-4; 1 Jo Tecalonika 2:9) Kadi bed kit meno, en cwinye obedo yom me yee gwok ki mot ka jo mukene gunyuto margi i yo ma kit meno. (Tic pa Lukwena 16:15, 34; Jo Pilipi 4:15-17) Paulo ocuko cwiny Lukricitayo, pe me weko tic ma i pacogi pi tic me pwony, ento kono do me yubo dog ticgi mapat pat i yo ma rwatte maber. En ocikogi me tic matek me maro jo odigi ki me nywako jammi ki jo mukene. (Jo Epeco 4:28; 2 Jo Tecalonika 3:7-12) En ocikogi bene me keto gengi i kom Lubanga, pe i kom jammi, dok me tic ki kwogi i yo ma nyuto ni giniang matut i jammi ma pire tek loyo i kwogi. Ma lubbe ki pwony pa Yecu, meno onongo tyene ni omyero guketo cwinygi kong ma okwongo i Ker pa Lubanga ki kit ma atirre.—Jo Pilipi 1:9-11.
Ket pi Ker Man Obed ma Okwongo i Kwoni
10. Keto pi Kerri ma okwongo tyen lokke ngo?
10 Wan ducu ki acel acel watwero nywako lok man me kwena maber me Ker nio wa i rwom ango ki jo mukene? Man, cung nucu nucu, i kit ma watye kwede, ki i kom dit me pwocwa. Niang ni Yecu pe owaco ni: ‘Ket Kerri ma okwongo ka dong pe itye ki kit tic mo me atiya.’ Pi ngeyo dit me Kerri, en onyuto mitti pa wonne kun waco ni: “Wuket cwinywu i kom kerre.” (Luka 12:31) Kadi bed ni polwa omyero oti pi gwoko kwowa ki kwo pa jo me odiwa, ka watye ki niye, kwowa bijenge i timo tic me Ker ma Lubanga omiyowa. Kitung cel nongo bene watiyo tic me gwoko paciwa.—1 Temceo 5:8.
11. (a) Labol pa Yecu onyuto nining ni dano ducu pe twero tiyo tic ma rom i tito lok me kwena me Kerri? (b) Jammi ango ma miyo timo tic-ci pe bedo marom?
11 Jo mukene i kinwa twero miyo kare mapol ma kato pa jo mukene i tito lok me kwena maber me Kerri. Ento i carolokke me wit ngom ma pati-pati, Yecu onyuto ni jo ducu ma cwinygi tye calo ngom maber binyako nyig. I rwom ma lakwene? Kit ma dano acel acel tye kwede tye pat pat. Mwaka, yot kom, tic ma i paco gubedo lok ma miyo pe bedo marom. Ento ka pwoc ada tye ci gin maber twero timme.—Matayo13:23.
12. Plan me atima me cwiny ango ma kicuko cwiny bulu me tamo pire?
12 Bedo ber ka watye ki tam ma bikonyowa me medo nywako ticwa me Kerri. Jo matino omyero gutam matut i kom lanen maber pa Temceo, Lakricitayo ma onongo bulu ma obedo lamit kom. (Jo Pilipi 2:19-22) Ngo ma twero bedo ber ma loyo donyo i tic me pwony man cut inge tyeko kwangi me cukul? Jo muteggi bene binongo mot ka gugoyo plan me atima i yo me cwiny.
13. (a) Anga ma myero omok gin ma wan ki komwa watwero timone i tic me Kerri? (b) Ka i ada waketo Kerri ma okwongo, nongo wanyuto gin ango?
13 Meka ka bedo ka cayo jo mogo ma watamo ni gitwero timo maber makato, omyero niye omi wamedde me dongo yo me ticwa pi Lubanga i yo ma oromo, i kit ma nongo wan kikomwa watye kwede. (Jo Roma 14:10-12; Jo Galatia 6:4, 5) Kit macalo otimme i kom Yubu, Catan opyem ni mitiwa madit ocung i jammi, bedo ki kwo ma mit, ber bedowa ki ni mitiwa me tic pi Lubanga pe tye atir. Ento ka ada waketo Kerri kong ma okwongo, nongo wanyuto ni Laraci obedo twon lagoba. I ticwa ki i lokwa, wan nongo wanyuto marwa matut pi Jehovah, i kom locce ma malo twal, ki marwa pi dano wadiwa.—Yubu 1:9-11; 2:4, 5; Carolok 27:11.
14. (a) Pingo yub ka kiryeyo woko piny pi pwony konyo? (b) Lucaden mapol ginywako tic me pwony i yo mapat pat mene?
14 Yub ma nongo waketo woko piny, twero konyowa me timo jammi mapol makato tic labongo yub. Jehovah kikome bene “onyuto kare” me tyeko yubbe. (Nia 9:5; Marako 1:15) Ka twere, bedo ber me nywako tic me pwony-nyi i kare ma nongo kiyubo kicel nyo makato i cabit ki cabit. Lucaden pa Jehovah alip mia mapol i lobo ducu gudoko jo ma tiyo macalo okjilari paina, ma gitiyo pi kine ka cawa aryo nino acel acel i pwonyo lok me kwena maber-ri. Jo alip mia mapol mukene calo regular painia ma gitiyo pi cawa aryo ki nucu nino ki nino. Cipecal painia ki miconari gicwalo kare malac ma loyo i nywako tic-ci. Wan bene watwero kwanyo kare me nywako gen me Kerri ki ngat mo keken ma biwinyo i cawa mo keken. (Jon 4:7-15) Mitiwa myero obed me nywako tic meno i yo ma oromo i kit ma watye kwede, pien Yecu owaco con ni: “Dong lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”—Matayo 24:14; Jo Epeco 5:15-17.
15. Ma kemme ki ticwa, pingo waneno tam ma i 1 Jo Korint 15:58 ni rwatte mada?
15 Lucaden pa Jehovah gitye ka tiyo tic man ma guribbe i but lobo ducu, labongo paro pi rok nyo ka ma gitye iye. Giketo i tic tam ma kimiyo i Baibul ni: “Wucung matek ma pe wuyengnge, kun wumedde bene ki tic pa Rwot nino ducu, kun wuniang ni, i Rwotwa yellewa-ni pe me nono.”—1 Jo Korint 15:58.
Nyammo wi Lok ma Kineno
• I kare ma Yecu owaco ni kong kikwong ‘keto cwiny i kom kerre,’ en onongo tye ka nyuto ni omyero kiket jammi ango me aryo?
• Tamwa omyero obed nining pi bedo ki jammi ma mitte ki pi luotwa? Kony ango ma Lubanga bimiyowa?
• Kit tic ango me Ker ma watwero nywakone?
[Cal ma tye i pot karatac 107]
I lobo ducu, Lucaden pa Jehovah kombeddi dong gitye ka pwonyo lok man me kwena maberri, ma peya agikki obino