Dul Lok me Abicel

Lok mo Madit ma Wan Ducu Myero Wagam

1, 2. (a) Catan okelo kit lok madit ango i Eden? (b) I atir-re, en onongo tye ka wacci ngo i lokke ma en owaco-ni?

IN ITYE i lok mo ma pire tek ma loyo ma okemo dano ducu. Kama ibiyero me cung iye bicimo kit ma anyimmi bibedo kwede pi nakanaka. Lok man kikelo i kare ma jemo ocakke i Eden. I kare ca Catan openyo Kawa ni: “Lubanga mono owacci, ‘Pe wucam yat ducu ma tye i poto-ni?’” En ogamo ni, pi yat acel Lubanga owaco ni: “Pe wubicamo . . . wek pe wuto.” Ci Catan odoto Jehovah cut pi bwola, kun wacci, kwo pa Kawa nyo pa Adam pe ocung i kom winyo dog Lubanga. Catan okok ni Lubanga tye ka kano jammi mabeco ki bot ginacweyane—kit me keto cik pi kwogi pirgi kengi. Catan orido ni: “Pien Lubanga ngeyo ni, ka wucamo, ci wangwu biyabbe woko, ci wubidoko calo Lubanga, miyo wungeyo gin maber ki marac.”—Acakki 3:1-5.

² I atir-re, Catan onongo tye ka wacci dano bibedo maber makato ka gimoko tamgi pirgi kengi me kaka bedo ka lubo cik pa Lubanga. Pi meno, en opyem pi kit yo ma Lubanga loyo kwede loc. Man okelo lok ma pire dit makato ducu i kom loc madit pa Lubanga pi kabedo ducu, twerone me loc. Lapeny ma kikelo aye ni: Mene maber pi dano, yo me loc pa Jehovah nyo mono yo me loc ma pe jenge i kom en? Ka kany, Jehovah onongo oromo neko Adam ki Kawa cut, ento meno pe kono yam otyeko lok me loc madit-ti maber. Lubanga omiyo dano onya pi kare malac, ma oweko en twero nyuto maber gin ma bedo ki locken i kome ki i kom cikke kelo.

3. Kit lok me aryo ango ma Catan okelo?

³ Lweny pa Catan i kom twero me loc pa Lubanga pe ogik ki gin ma otimme i Eden-ni keken. En okelo akalakala i gen pa jo mukene i kom Jehovah. Man odoko lok mukene madit ma en dok okelo me aryo. Pyemme ogudo wa lutino pa Adam ki Kawa ki lutino pa Lubanga me cwiny, kadi wa Wod me kayo me amara pa Jehovah bene. Me labolle, i kare pa Yubu, Catan opyem ni jo ma gitiyo bot Jehovah gicung tung bot Lubanga, pe pi maro Lubanga ki yo me locce, ento pi rwot ineka aye. En opyem ni ka kiketogi i peko, gin ducu gibipoto woko i timo mittigi me kom.—Yubu 2:1-6; Niyabo 12:10.

Gin ma Jammi ma Otimme Con Onyuto

4, 5. Jammi ma otimme con nyuto gin ango i kom dano pi bedo ki locken i kwogi?

⁴ Gin ma pire tek i lok me loc madit man aye ni: Lubanga pe ocweyo dano me kwo maber labongo locce. En ocweyogi me jenge i kom cikke ma tye atir ma konyogi. Lanebi Jeremia oye ni: “Ai Rwot, angeyo ni dano pe loyo kwone kene nio i agikkine; pe tye ngat mo ma tye ki twero me loyo kwone. Ai Rwot, pwony lwakwa.” (Jeremia 10:23, 24) Pi meno Lok pa Lubanga cuko cwinywa ni: “Gen Rwot ki cwinyi ducu, pe ibed ka jengnge i kom niang ma itye kwede.” (Carolok 3:5) Kit macalo Lubanga oyubo dano me lubo cikke ma mako jammi ma nen ka gimito medde ki kwo, en bene oketo cik ma mako kit, ma ka kilubo weko dano ducu ribbe kacel.

⁵ Lubanga ongeyo atir kamaleng ni, dano pe bitwero bedo ka lone kengi maber matwal labongo locce. I temmegi me bedo labongo loc pa Lubanga, dano gucako kit loc me wibye, cato wil, ki dini mapat pat. Apokapoka ma obino pi jammi magi okelo yoko wic i kin dano, ma adwogine okelo tim gero, lweny, ki to. “Dano dong oloyo dano lawote pi keto awano i kome.” (Latitlok 8:9, NW) Meno aye jammi ma obedo ka timme i kare ducu me kwo pa dano. Kit ma kitito kwede i Lok pa Lubanga, jo maraco ki lugoba gumedde “ki bedo marac makato.” (2 Temceo 3:13) I cencwari me 20 man, ma dano dong guo i kit me cayan ki kit tet me yubo jammi i rwom ma lamal-li, aye dano dong guneno iye can marac loyo. Lok pa Jeremia 10:23 dong onyute maber atika—pe kicweyo dano me loyo kwogi pirgi kengi.

6. Lubanga cokcokki bityeko lok me nongo locken ki bote nining?

⁶ Adwogi maraco ma obino motmot pi nongo locken ki bot Lubanga dong onyuto kicel ma dok pe binwone ni loc pa dano pe twero bedo maber matwal. Loc pa Lubanga aye yo acel keken me yomcwiny, ribbe, yot kom ki kwo maber. Dok Lok pa Lubanga nyuto ni diyo cwiny pa Jehovah i kom loc pa dano ma pe jenge i kome-ni dong cok gik. (Matayo 24:3-14; 2 Temceo 3:1-5) Cok cokki en bingolle i yub pa dano kun kelo locce i wi lobo. Lok pa lanebi mo me Baibul waco ni: “Dok i kare pa luker meno [loc pa dano ma tye i kare-ni] Lubanga me polo biketo ker mukene [i polo] ma ri nakanaka ma pe gitwero balone, kadi dit me locce bene pe gibiweko i cing rok mukene [dano pe dong biloyo lobo matwal]. Ker meno manyen-ni bituro ker magi [ma i kare ni] ducu ngidogi woko matinotino, ci tyekogi woko ducu, en aye dong bicung bedo matwal.”—Daniel 2:44.

Bwot me Donyo i Lobo Manyen pa Lubanga

7. Ka loc pa Lubanga otyeko te loc pa dano, anga-gi ma bibwot?

⁷ Ka loc pa Lubanga bityeko loc pa dano, anga-gi ma bibwot? Baibul gamo ni: “Jo ma cwinygi atir [jo ma gicwako twero me loc pa Lubanga] gibibedo i lobo, ki jo ma gin lugen ma pe gitye ki bal mo gibibedo iye matwal; ento jo maraco [jo ma pe gicwako twero me loc pa Lubanga] gibityekogi woko ki i lobo meno, ki jo ma gungayo wang Rwot pi bal me nek bene gibiputogi macalo giputo doo.” (Carolok 2:21, 22) I kit yo acel-li, lacoc me Jabuli owaco ni: “Odong kare manok, ci dano marac dong bibedo pe matwal . . . Jo ma kitgi atir gibicamo lobo, dok gibibedo iye matwal.”—Jabuli 37:10, 29.

8. Lubanga binyuto ber pa locce madit nining?

⁸ Ka kijwero te yub pa Catan, Lubanga bikelo lobone manyen, ma bijuko tim bwami, lweny, can, deno peko, two, ki to ma guromo piny dok gudiyo dano pi mwaki alip mapol ata-ni. Baibul tito jammi mabeco ma tye ka kuro dano ma luwiny i yo ma mwonya ni: “En [Lubanga] bijwayo pig wanggi woko ducu. To bene dong bibedo pe, kadi kumo nyo koko nyo arem, pien gin macon dong ducu gurwenyo woko matwal.” (Niyabo 21:3, 4) Lubanga bicung pi (cwako nyo nyuto ber me) Twerone me bedo laloc madit loyo, ma tere ni, bedo Lalocwa kun tiyo ki gamente me Kerre me polo i te loc pa Kricito.—Jo Roma 16:20; 2 Petero 3:10-13; Niyabo 20:1-6.

Kit ma Gudok Kwede i Lok-ki

9. (a) Jo ma gumedde ki bedo ki gen i kom Jehovah guneno lokke nining? (b) Nua onyuto genne nining, dok wan watwero nongo jammi mabeco ki i lanenne nining?

⁹ Cakke wa i kare macon, co ki mon me niye ma gubedo ka nyuto gen-gi i kom Jehovah macalo laloc madit gubedo tye. Gin gungeyo ni kwogi ojenge i kom lubo ki winyo doge. Nua obedo ngat ma kit meno. Pi meno Lubanga owaco bot Nua ni: “Agikki pa dano ducu dong obino i nyima . . . Pa yeya meri.” Ci Nua oye tela pa Jehovah. Kadi bed kicikogi, jo mukene me kare maca gumedde ameda ki kit me kwogi me kare ducu calo gin mo ma pat pe obitimme. Ento Nua ogedo twon yeya madit atika dok omako tic me tito kit ma atir pa Jehovah bot jo mukene. Lok man omedde ki waco ni: “Nua otimo kumeno; ocobo ducu macalo Lubanga ocike.”—Acakki 6:13-22; Jo Ibru 11:7; 2 Petero 2:5.

10. (a) Abraim ki Cara gucwako loc madit pa Jehovah nining? (b) Watwero nongo kony ki i lanen pa Abraim ki Cara i yo ango?

¹⁰ Abraim ki Cara bene gubedo lanen maber atika pi cwako loc madit pa Jehovah, gutimo jammi ducu ma en ocikogi kwede. Onongo gikwo i Ur pa Kaldaya, boma mulony. Ento i kare ma Jehovah owaco ki Abraim me cito i lobo mukene mo ma en pe ngeyo, Abraim “ocako wot, macalo Rwot ocike.” Labongo akalakala Cara onongo obedo i kwo ma maber—ki paco, lurem, ki wadigu. Kadi bed kit meno, en omine bot Jehovah ki bot cware ci ocito i lobo me Kanaan, kadi bed en onongo pe ngeyo kit kwo ma tye ka kurogi kunnu.—Acakki 11:31–12:4; Tic pa Lukwena 7:2-4.

11. (a) I kit kwo ango ma Moses ocwako iye loc madit pa Jehovah? (b) Lanen pa Moses romo konyowa nining?

¹¹ Moses obedo ngat mukene ma ocwako loc madit pa Jehovah bene. Dok en otimo man i kare ma kwo onongo tek, orwatte wang ki wang ki Parao me Ejipt. Pe ni Moses onongo cwinye tek ateka. Pe kumeno, en obedo ki akalakala ka etwero lok maber. Ento en owinyo Jehovah. Pi cwak pa Jehovah ki kony pa Aron, Moses otito lok pa Jehovah bot Parao teretere. Kadi wa jo Icrael mogo guloko marac i kom Moses. Kadi bed kit meno, Moses otimo jammi ducu ma Jehovah ocikke ki gen, pi meno, kilaro Icrael ki i Ejipt kun kitiyo ki en.—Nia 7:6; 12:50, 51; Jo Ibru 11:24-27.

12. (a) Gin ango ma nyuto ni geno Jehovah mito gin makato timo jammi ma Lubanga dong oketo woko i coc? (b) Bedo ki pwoc i gen ma kit man twero konyowa me keto 1 Jon 2:15 i tic nining?

¹² Jo ma onongo gitye ki gen i kom Jehovah pe gutamo ni jammi ma Lubanga ocoyo piny keken aye onongo mitte me aluba. I kare ma dako pa Potipar otemo bito Yucepu me timo abor kwede, onongo pe tye cik mua ki bot Lubanga ma okwero tim abor. Ento, Yucepu ongeyo pi yub me nyom ma Jehovah ocako ki i Eden. En onongo ngeyo ni buto ki dako pa laco mukene pe yomocwiny Lubanga. Yucepu onongo pe mito ni etem me neno ka kwene ma Lubanga biweko en ebedo calo Luejipt. En ocwako yo pa Jehovah ki bedo ka lwodo kit ma Lubanga obedo ka tic kwede ki dano con ka dong otemo ki tekke me keto i tic jammi ma en oniang ni obedo mitti pa Lubanga.—Acakki 39:7-12; Jabuli 77:11, 12.

13. Kinyuto ni Larac-ci lagoba nining i lok ma mako (a) Yubu? (b) Lujudaya adek-ki?

¹³ Kadi bed kiterogi i yo marac atika, jo ma gingeyo Jehovah pe giweko en woko. Catan opyem ni ka Yubu orwenyo jammi-ne mapol-li nyo lonyone, kadiwa en—ma Jehovah oloko ki cwak ma malo atika i kome-ni—biweko Lubanga woko. Ento Yubu onyuto ni Larac-ci lagoba, kadi bed Yubu kikome onongo pe ngeyo pingo peko onongo ogure. (Yubu 2:9, 10) Pud dok aye, inge cencwari mapol, pi temme me nyuto atir pa lokke, Catan omiyo akemo omako kabaka me Babilon ci oburo bulu adek ma Lujudaya ki to i keno malyet atika ka pe guryebbe piny i nyim cal ma kabaka ocibo. Ma dong gunongo ni gitye i dic me yero bedo ki winy i kom cik pa kabaka ki winyo cik pa Jehovah i kom woro cal, gin gumiyo ongene maber atika ni gin gitiyo pi Jehovah dok ni en aye Lalocgi Madit ma loyo. Gengi i kom Lubanga pire pud dong obedo tek ma kato kwogi me kare meno ya!—Daniel 3:14-18.

14. Twere nining pi wan macalo dano ma luroc me nyuto ni wan ada wageno Jehovah?

¹⁴ Dong mono omyero wamok i agikki-ne ni lanen magi me bedo ki gen i kom Jehovah ni, nyuto-ni ngat moni myero obed labongo roc nyo ka ngat mo ocer i bal nongo dongo opoto matwal? Pe kumeno wacel! Baibul tito botwa ni i kare mogo Moses opoto. Kadi ocwero cwiny Jehovah, ento en pe okwero Moses. Lukwena pa Yecu Kricito bene gubedo ki goro. Pi tamo i kom roc alaka, cwiny Jehovah bedo yom ka pe wacayo mitine akaka i kit yo mo keken. Ka watimo tim marac pi goro, pire tek ni myero wakun bal ada dok pe wabed ka nwoyo-ne. I yo ma kit man wanyuto ni wan ada wamaro jammi ma Jehovah waco ni ber dok wakwero jammi ma en nyuto ni rac. Pi niyewa i dit me gitum me kok, watwero bilo mit me bedo maleng i nyim Lubanga.—Amoc 5:15; Tic pa Lukwena 3:19; Jo Ibru 9:14.

15. (a) Anga i kin dano ducu aye ogwoko genne labongo roc bot Lubanga, dok gin ango ma man onyuto? (b) Gin ma Yecu otimo-ni konyo wan nining?

¹⁵ Kadi bed kit meno, twero bedo ni winy labongo roc i loc madit pa Jehovah pe dong twere pi dano? Lagam pi lok man onongo obedo calo “mung me dini’ pi mwaki ma romo 4,000. (1 Temceo 3:16) Adam, kadi kicweye labongo roc, pe omiyo lanen maber me mine bot Lubanga. Anga ma onongo twero? Ada pe tye ngat mo i kin likwayone. Dano ma otimo meno aye Yecu Kricito keken. (Jo Ibru 4:15) Gin ma Yecu otimo onyuto ni Adam, ma okwo ma piny pud tye maber mukato, onongo oromo gwoko genne labongo roc ka onongo omito. Bal onongo pe obedo i kit me cwec pa Lubanga. Pi meno Yecu Kricito aye obedo lanen ma wan watemme me lubone, pe inyuto winyo cik maleng keken ento bene me minne bot Jehovah, Laloc Madit ma loyo ducu.—Nwoyo Cik 32:4, 5.

Lagammi Piri Keni Tye Ningo?

16. Pingo myero wabed ma wangwa twolo i tamwa i kom loc madit pa Jehovah kare ducu?

¹⁶ Wan ki acel acel, wakemme ki lok me loc madit ma loyo ducu man. Ka watito atir kamaleng ni watye tung bot Jehovah, Catan tugi kemme me lweny kwedwa. En tye ka keto lyeto i kabedo ducu dok tye ka medde me timo meno ni o wa i agikki me yub man. Myero wabed ma pe waweko kiyo piny. (1 Petero 5:8) Kitwa nyuto tung ka ma wacung iye i lok man me loc madit pa Jehovah-ni ki i lok me aryo me gwoko genne-wa i kom Lubanga i kare me atematema. Wan pe waromo ye neno genne ma pe i lobo-ni calo gin maber pien ni tye i kabedo ducu. Gwoko gene mito ni watemme me keto yo pa Jehovah matir i tic i jammi ma mako kwowa ducu.

17. Ngo ma tye ma make ki acakki me goba ki kwalo kwo ma weko wakwero timogi?

¹⁷ Me labolle, pe watwero poro Catan, ma obedo “won goba.” (Jon 8:44) Myero wabed ki ada i jammi ducu ma watimo. I yub me kare pa Catan-ni, jo matino pol kare pe gitiyo ki ada bot Lunyodogi. Ento bulu ma Lukricitayo gikwero timo man, pi meno ginyuto ni adot pa Catan ni jo pa Lubanga gibikwero gennegi i kare me atematema, obedo lok goba. (Yubu 1:9-11; Carolok 6:16-19) Ki bene tye tic biacara mogo ma romo nyuto ni ngat moni tye bot “won goba” me ka bedo tung bot Lubanga me ada. Wakwero magi. (Mika 6:11, 12) Kwalo kwo bene pe kitwero cwakone matwal, kadi bed ni gin moni dong oloyo ngati moni tutwal. Nyo kadi ka ngat ma kikwanyo jamine-ni olony. (Carolok 6:30, 31; 1 Petero 4:15) Kadi bed ni jammi magi obedo gin ma dano mapol gitimo kama wakwo iye nyo jammi ma kikwanyo-ni titidi mo, kwalo kwo pe rwatte ki cik pa Lubanga.—Luka 16:10; Jo Roma 12:2; Jo Epeco 4:28.

18. (a) I kare me agikki me Loc me Mwaki Alip Acel pa Kricito, kit atematema ango ma bibino i kom dano ducu? (b) Kit ango ma omyero wapwony kombeddi?

¹⁸ I kare me Loc me Mwaki Alip Acel pa Kricito, kibitweyo Catan ki jogine i bur ma tere pe gik, pe gibiromo keto lyeto i kom dano. Pud dong bibedo twon yweyo madit ya! Ento ma lubo mwaka alip acel, kibigonyogi pi kare matidi mo. Catan kacel ki jo ma lubbe gibiketo dic i kom dano ma dong kilonyogi ma gitye ka gwoko gennegi bot Lubanga. (Niyabo 20:7-10) Ka bibedo mot ki tung botwa me bedo kwo i kare meno, wabitimo gin ango i lok kom loc madit ma loyo-ni? Kit ma dano ducu bibedo labongo roc mo, kit tic ma pe binyuto gen bibedo pi akaka, ma bikelo to matwal. Pire tek botwa me pwonnye i kit me jolo tira mo keken ma Jehovah miyowa kombeddi, kadi bed woto ki i Lokke nyo ki i dulle pud dong ya! Ka wabitimo meno, ci wanyuto miinewa bote macalo Laloc Madit ma loyo ducu.

Nyammo wi Lok ma Kineno

• Lok ango ma pire tek ma wan ducu wabigamo? Ocako makowa nining?

• Jammi ango ma ocung kamaleng i kit ma co ki mon me kare macon gunyuto kwede gennegi bot Jehovah?

• Pingo pire tek pi wan me woro Jehovah ki kitwa nino ducu?