Pwony me 3

Mitte ni in Ipwony Lok i Kom Lubanga

Me bedo larem Lubanga mitte ni i pwony lok i komme. Luremi gingeyo nyingi dok gitiyo kwede? Gingeyo dok gitiyo kwede. Lubanga mito ni in inge dok iti ki nyinge bene. Lubanga nyinge Jehovah. (Jabuli 83:18, New World Translation; Matayo 6:9) Omyero in bene inge ngo ma en maro ki degi. Mitte ni inge angagi ma lureme ki lumone ne. Tero kare me ngeyo ngati moni. Baibul tito ni obedo yoo me ryeko me nongo cawa me pwonyo lok i kom Jehovah.​—Jo Epeco 5:15, 16.

Lurem Lubanga gitimo gin ma yomo cwinye. Tam kong pi luremi. Ka iterogi marac dok itimo jami ma gidegi, gitwero medde ki bedo luremi? Ngene kene ni ku! I kit yoo acel-lu, ka in imito bedo larem Lubanga, mitte ni itim gin ma yomo cwinye.​—Jon 4:24.

Dini ducu pe weko ibedo larem ki Lubanga. Yecu ma obedo larem Lubanga macok loyo, oloko pi yoo aryo. Yoo acel lac dok opong ki dano. Yoo meno tero dano i to. Yoo mukene-ni ding dok jo manoko aye tye ka wot iye. Yoo meno tero dano i kwo ma pe tum. Man tere ni ka imito bedo larem ki Lubanga, omyero i pwony yoo ma atir me woro en.​—Matayo 7:13, 14.