Pwony me 1

Lubanga Lwongi me Doko Lareme

Lubanga mitto ni in i bed lareme. In kong kare mo ibitamo ni itwero bedo larem Ngat ma dit loyo ducu ki i wii polo ki lobo? Abraim, ngat ma okwo yam con, onongo kilwonge ni larem Lubanga. (Yakobo 2:23) Jo mukene ma kiloko pirgi i Baibul bene gunongo bedo larem ki Lubanga mit dok gunongo iye mot madwong. I komkareni dano ma tye i but lobo mapat-pat ducu gitye kadoko lurem Lubanga. In bene itwero bedo larem Lubanga.

Bedo larem Lubanga ber loyo bedo larem dano mo keken. Lubanga pe cwero cwiny lureme ma gigene. (Jabuli 18:25) Bedo larem Lubanga ber loyo bedo ki lonyo. Ka ngat ma olony oto, cente-ne cito bot jo mukene. Ento, jo ma gitye ka nongo mit pa bedo ki larem ki Lubanga gibedo ki lonyo madit ma ngati mo pe twero kwanyone woko.​—Matayo 6:19.

Jo mogo guromo temme me juki pwonyo lok i kom Lubanga. Kadi wa luremi mogo ki jo ma i otwu bene guromo timo man. (Matayo 10:36, 37) Kace jo mukene ginyeri nyo giburi, penye keni ni, ‘Anga ma an amito yomo cwinye​—dano nyo Lubanga.’ Tam pi man: Kace ngati mo owaco ni ijuk camo cam, in ibiwinye? Ngene kene ni ku! Cam mitte wek ibed kwo. Ento Lubanga twero weko i kwo matwal! Dong pe i wek ngat mo ojuki pwonyo kit ma itwero doko kwede larem Lubanga.​—Jon 17:3.