JIRI MA MATAYO OCOYO

1 Man buk ma tito lok* kom Yecu Kricito. En wod* pa Daudi ki wod pa Abraim:

17 Kwari pa Kricito ducu nicakke ki i kom Abraim nio i kom Daudi obedo 14, dok nicakke ki i kom Daudi nio wa i kare ma kiterogi i Babilon obedo 14, ki dong nicakke i kare ma kiterogi i Babilon nio wa i kom Kricito obedo 14.

18 Man aye gin mutimme ma pud peya kinywalo Yecu Kricito: l kare ma minne Maliam dong oye me nyomme ki Yucepu, ento ma peya gucako bedo kacel, kinongo ni Maliam ogamo ic pi teko pa cwiny maleng. 19 Ento, kit macalo cware Yucepu onongo kite atir dok pe mito leyo wi Maliam i nyim lwak, en omoko tamme me keto kenygi woko i wi mung. 20 Ento, ma en dong otyeko tamo lok magi ducu, nen! lamalaika pa Jehovah* onyutte bote i wang lek ci owacce ni: “Yucepu, wod pa Daudi pe ilwor tero dakoni Maliam gang, pien en ogamo ic pi teko pa cwiny maleng. 21 En binywalo latin laco dok ibicako nyinge ni Yecu,* pien en bilaro dano ki i balgi.” 22 Jami magi ducu otimme me cobo lok ma Jehovah otito kun tiyo ki lanebine, ni: 23 “Nen! Anyaka ma peya obedo ki laco biyac ci binywalo latin laco, dok kibicako nyinge ni Immanuel,” ma te lokke gonnye ni, “Lubanga Tye Kwedwa.”

24 I nge meno, Yucepu oco ki i wang nino dok otimo gin ma lamalaika pa Jehovah owacce, ci otero dakone gang. 25 Ento en pe orwatte kwede i buto nio ka dong onywalo latin laco, ci Yucepu ocako nyinge ni Yecu.

2 Ma dong kinywalo Yecu i Beterekem ma i Judaya i kare me loc pa kabaka Kerode,* nen! lutyet* mogo ma gua ki Tung Kunyango gubino i Jerucalem, 2 ci gupenyo ni: “Latin ma kinywalo me bedo kabaka pa Lujudaya-ni tye kwene? Pien waneno lakalatwene i kare ma watye Tung Kunyango, ci dong wabino ka wore.”* 3 I kare ma Kabaka Kerode ki jo ducu ma i Jerucalem guwinyo lok man, lworo omakogi matek. 4 Pi meno, Kerode ocoko lulamdog madito* ki lupwony cik pa lwak ducu kacel ci openyo ka kwene ma onongo kibinywalo iye Kricito.* 5 Ci gugamo ni: “Ki i Beterekem ma i Judaya, pien man aye gin ma lanebi yam ocoyo: 6 ‘Ento in, Beterekem ma i lobo Juda, in pe itidi tutwal i wang luloc me Juda, pien ngat ma bibedo laloc bia ki i in, dok en bikwayo jona, ma gin aye jo Icrael.’”

7 I nge meno, Kerode olwongo lutyet-ti i mung ci otemo niang ki botgi awene kikome ma lakalatwe-ni onen kwede botgi. 8 Lacen ma Kerode tye ka cwalogi i Beterekem, en owaccigi ni: “Wucit wuyeny latin meno maber, ci ka wunonge, wudwokka lokke wek an bene acit awore.” 9 Ka dong gutyeko winyo lok pa kabaka, gumedde ki wotgi, ci nen! lakalatwe ma guneno ma onongo gitye Tung Kunyango dok otuc ci ocako telo nyimgi nio wa i kabedo ma latin-ni onongo tye iye. 10 I kare ma guneno lakalatwe-ni, cwinygi obedo yom adada. 11 Ma dong gudonyo i ot, guneno latin kacel ki minne Maliam, ci guryebbe piny, guworo latin-ni. Dok bene gugonyo yecgi ci gumine mot ma gubino kwede—jabu, odok makur* ki odok murra. 12 Ento, kit macalo Lubanga onongo ocikogi i wang lek ni pe gudok bot Kerode, gin gudok i lobogi kun gitiyo ki yo mukene.

13 Ma lutyet-ti dong gua, nen! lamalaika pa Jehovah onen bot Yucepu i wang lek, ci owacce ni: “A malo, ikwany latin kacel ki minne ci wuring woko i lobo Ejipt, dok wubed kunnu nio wang ma awacci ni wudwog cen, pien Kerode dong cok yenyo latin man wek enek woko.” 14 Pi meno, Yucepu oa malo okwanyo latin ki minne i dyewor meno ci gucito i Ejipt. 15 Gubedo kunnu nio wa i kare ma Kerode oto. Man ocobo lok ma Jehovah owaco kun tiyo ki lanebine, ni: “Alwongo woda woko ki i Ejipt.”

16 I kare ma Kerode oniang ni lutyet-ti gutuko ki wiye, kiniga omake matek! Ci ocwalo dano oweko kineko lutino awobe ducu ma i Beterekem ki kabedo murumo ngete, nicakke ki i kom lutino me mwaka aryo dok kwede piny, ma lubbe ki kare ma en oniang ki bot lutyet-ti. 17 Man ocobo lok ma Lubanga owaco kun tiyo ki lanebi Jeremia, ni: 18 “Dwan mo owinnye i Rama, dwan me kumo ki koko matek. Lakeri aye obedo ka kok pi lutinone, dok okwero woko ni pe kikwe cwinye, pien lutinone dong gipe.”

19 Ma Kerode dong oto, lamalaika pa Jehovah onen bot Yucepu i wang lek ki i Ejipt 20 ci owacce ni: “A malo, ikwany latin ki minne ci wudok cen i lobo Icrael, pien jo ma onongo gitye ka yenyo latin-ni me aneka dong guto woko.” 21 Pi meno, en oa malo okwanyo latin ki minne ci gudok cen i lobo Icrael. 22 Ento ma Yucepu owinyo ni Arkelao aye tye ka loyo Judaya i nge to pa wonne Kerode, Yucepu obedo ki lworo me cito kunnu. Dok kit macalo Lubanga onongo ocike i wang lek ni pe ocit kunnu, Yucepu ocito i lobo Galilaya. 23 Ci ocako bedo i boma ma kilwongo ni Najaret, wek lok ma Lubanga owaco kun tiyo ki lunebine ocobbe kakare, ni: “Kibilwonge ni Lanajaret.”*

3 Lacen, Jon Labatija obino i tim me Judaya ci ocako tito kwena, 2 kun waco ni: “Wunguti, pien Ker me polo dong onyiko cok.” 3 Ki lok ada, Jon aye obedo ngat ma lanebi Icaya yam oloko i kome i kare ma owaco ni: “Dwan mo malongo owinnye i tim kun waco ni: ‘Wuyub yo pa Jehovah! Wuwek yone obed atir.’” 4 Jon onongo ruko bongo ma kiyubo ki yer kinaga dok tweyo pyere ki del. En onongo camo bonyo ki moo kic ma i tim. 5 I kare meno, jo me Jerucalem ki Judaya ki dong kabedo ducu ma orumo Kulu Jordan onongo gicito bote. 6 En obatijagi* i Kulu Jordan, dok gubedo ka tuco balgi ka maleng.

7 I kare ma Jon oneno Luparicayo ki Lucadukayo mapol gitye ka bino ka ma en tye ka batija iye dano, en owaccigi ni: “Wun lutino twol uyu, anga ma ocikowu me ngwec woko ki i nino me akemo pa Lubanga? 8 Pi meno, dong wuti tic* ma nyuto ni wungut i kom balwu. 9 Pe wutam ki i cwinywu ni, ‘Wan lutino pa Abraim.’ Pien awaco botwu ni Lubanga twero weko kadi wa gweng magi gilokke gidoko lutino pa Abraim. 10 Nen! latong dong kiketo woko i te yat. Dok yat mo keken ma pe nyako nyige mabeco kibitongo woko ci kibolo i mac. 11 An abatijawu ki pii ka wungut i kom balwu, ento ngat ma tye ka bino i ngeya tek loya woko dok pe apore me lunyo war tyene. En bibatijawu ki cwiny maleng, dok ki mac. 12 Gin me kworo ngano dong tye i cinge, en biyweyo laro moyone maber dok bicoko nganone ci keto i dero, ento biwango cunge woko ki mac ma pe kitwero nekone.”

13 Lacen Yecu oa ki i Galilaya obino i Jordan bot Jon, wek Jon obatija en. 14 Ento Jon otemo genge woko kun waco ni, “In aye myero ibatija an, ento pingo in aye dok ibino bota?” 15 Yecu ogamo ni: “Wek dong obed kit meno pi kombeddi, pien man biweko wacobo gin ducu ma tye atir.” Ci Jon oye lokke. 16 Ma Jon dong otyeko batija* en, cutcut Yecu oa malo ki i pii, ci polo oyabbe, dok Jon oneno cwiny pa Lubanga ma nen calo akuri, kun tuk bino piny ka wi Yecu. 17 Ci dwan mo owinye ki i polo kun wacci: “Man aye Woda me amara, ma cwinya yom i kome.”

4 Lacen, cwiny maleng otero Yecu i tim, ci ki kunnu, Larac* obedo ka bite. 2 Ma dong Yecu orii kec pi nino 40 dyeceng ki dyewor, kec ocako neke. 3 Ci Labit Dano obino bote dok owacce ni: “Ka in i wod pa Lubanga, wac ki gweng magi gulokke gudok ginacama.”* 4 Ento en ogamo ni: “Yam kicoyo ni: ‘Dano pe kwo ki ginacama keken, ento dano kwo ki lok ducu ma a ki i dog Jehovah.’”

5 I nge meno, Larac otere i gang maleng,* ci ocibe i wi cel* me ot pa Lubanga 6 dok owacce ni: “Ka in i wod pa Lubanga, pye piny ki i wi cel, pien yam kicoyo ni: ‘En biciko lumalaikane piri me gwoki,’ dok ‘Gibitingi ki cinggi wek pe iyok tyeni i kom got mo.’” 7 Ento Yecu owacce ni: “Yam bene kicoyo ni: ‘Pe wutem Jehovah Lubangawu.’”

8 Larac dok otere i wi got mo mabor adada ci onyutte ker ducu me lobo-ni ki deyogi. 9 Dok owacce ni: “Abimini jami magi ducu ka iryebbe piny kicel ci imiya woro.” 10 Ci Yecu owacce ni: “A icit cen Catan! Pien yam kicoyo ni: ‘Myero wuwor Jehovah Lubangawu, dok wuti pire keken.’” 11 I nge meno, Larac oa woko ki bote, ci nen! lumalaika gubino ci gucako konyo Yecu.

12 Lacen ma Yecu owinyo ni kimako Jon* woko, en ocito i Galilaya. 13 I ngeye, ma en oa ki i Najaret, ocito obedo i Kapernaum, i dog nam ma tye i lobo me Jabulon ki Naputali, 14 wek lok ma lanebi Icaya otito ocobbe kakare, ni: 15 “In Galilaya pa lurok, ma tye i lobo Jabulon ki lobo Naputali, i yo ma cito i dog nam, loka Kulu Jordan! 16 Jo ma onongo gubedo i colpiny guneno dero madwong, dok dero oryeny i kom jo ma gibedo i lobo ma tye i te tipo to.” 17 Nicakke i kare meno, Yecu obedo ka tito kwena kun waco ni: “Wunguti, pien Ker me polo dong onyiko cok.”

18 I nino mo ma Yecu onongo tye ka wot i dog nam me Galilaya, en oneno omege aryo, Cimon, ma bene kilwongo ni Petero, ki ominne Anderiya. Onongo gitye ka bolo obwogi i nam, pien gubedo lumak rec. 19 Yecu owaccigi ni: “Wubin wulub kora, ci abiweko wudoko lumak dano.” 20 Cutcut guweko obwogi ci gulubo kore. 21 Ma en owoto anyim manok, dok oneno omege aryo mukene, Yakobo ki ominne Jon, ma gin awobe pa Jebedayo. Onongo gubedo i yeya kacel ki wongi Jebedayo, ka yubo obwogi, ci Yecu olwongogi. 22 Cutcut, guweko yeya kacel ki wongi ci gulubo kore.

23 I nge meno, en owoto orumo lobo Galilaya ducu kun pwonyo i kacokke pa Lujudaya dok tito kwena maber me Ker pa Lubanga. En ocango bene kit two ki kit goro ducu ma tye i kom dano. 24 Dok nyinge oywek i lobo Ciria ducu, ci kikelo bote jo ducu ma gitye ki kit two ki arem mapatpat, jo ma gitye ki cen maraco, jo ma gitye ki two alili, ki dong jo ma gitye ki two akweya, ci en ocangogi woko ducu. 25 Pi meno, lwak dano mapol ma gua ki i Galilaya, Dekapoli,* Jerucalem, Judaya, ki dong loka Jordan gulubo kore.

5 I kare ma Yecu oneno lwak, en oito i wi got ci obedo piny; dok lupwonnyene* gubino bote. 2 Ci en ocako pwonyogi kun waco ni:

3 “Jo ma gingeyo ni gimito tira pa Lubanga* gitye ki yomcwiny, pien Ker me polo meggi.

4 “Jo ma gikumo gitye ki yomcwiny, pien kibikweyo cwinygi.

5 “Jo mamwol gitye ki yomcwiny, pien gibileyo lobo.

6 “Jo ma gitye ki miti matek* pi gin matir gitye ki yomcwiny, pien kibicobo mitigi.*

7 “Jo ma lukica gitye ki yomcwiny, pien kibinyuto botgi kica.

8 “Jo ma cwinygi leng gitye ki yomcwiny, pien gibineno Lubanga.

9 “Jo ma gikelo kuc gitye ki yomcwiny, pien kibilwongogi ni lutino* pa Lubanga.

10 “Jo ma kiunogi pi timo gin ma atir i wang Lubanga gitye ki yomcwiny, pien Ker me polo meggi.

11 “Wutye ki yomcwiny ka dano gingalowu dok giunowu dok giwaco kit lok ducu maraco gobagoba i komwu pira. 12 Lunebi ma gukwo yam con bene kiunogi kit meno. Pi meno, wubed ki yomcwiny madwong pien mot madit tye ka kurowu i polo.

13 “Wun aye kado me lobo, ento ka kado odoko bot, gin ango ma dok kitwero timone wek odok mit? Konnye nongo dong pe ento kionyo woko me anyona pa dano.

14 “Wun aye dero me lobo. Gang ma kiyubo i wi got pe twero kanne. 15 Dano gicwinyo laput ci pe giumo ki aduku,* ento giketo i wi okar mac, wek omeny piny pi jo ducu ma gitye i ot. 16 I yo acel-lu, wuwek derowu oryeny wek dano gunen ticwu mabeco ci gumi deyo bot Wonwu ma tye i polo.

17 “Pe wutam ni abino ka kwanyo Cik pa Moses ki Coc pa Lunebi. An pe abino ka kwanyogi, ento abino ka cobogi. 18 Ada awacciwu ni, kit macalo polo ki lobo pe twero rweny-nyi, i yo acel-lu, kadi wa nukuta matidi loyo nyo but nukuta mo pe birweny woko ki i Cik nio wang ma jami magi ducu ocobbe. 19 Dong ngat ma turo cik mo i kin cik magi matino-ni dok pwonyo jo mukene bene me timo meno, kibilwonge ni ngat matidi loyo* ki i Ker me polo. Ento ngat ma lubogi dok pwonyogi, kibilwonge ni ngat madit* i Ker me polo. 20 Pien awacciwu ni, ka pe kitwu atir makato kit pa lupwony cik ki Luparicayo, ci pe wubidonyo i Ker me polo matwal.

21 “Wuwinyo ni yam kiwaco bot kwariwa ni: ‘Pe ineki, ento ngat ma oneko dano kibitere i nyim lukiko me ngolo kop.’ 22 Ento awacciwu ni, ngat ma medde ki bedo ki akemo i kom ominne kibitere i nyim lukiko me ngolo kop; dok ngat ma yeto ominne ki leb macilo kibitere i nyim Lukiko Madit Loyo; ki ngat ma waco ni, ‘In laming ma konnye pe!’ kibibole woko i mac me Geena.*

23 “Dong, ka ce itye ka kelo motti me atyera i wi keno tyer* ci wi opo ni omeru tye ki lok mo i komi, 24 kong iwek motti i nyim keno tyer* ci idok cen, mukwongo kong iyub wat i kin in ki omeru. Ka dong i ngeye, idwog ityer motti.

25 “Yub wat oyotoyot ki ngat ma odoti ma pud wutye i yo me cito i nyim lukiko. Ka pe, ngat ma odoti-ni bitero lok i nyim langolkop, dok langolkop bimiyi i cing lagwok mabuc, ci kibiboli woko i buc. 26 Ada awacciwu ni, pe ibia woko ki i buc nio wang ma iculo banyani ducu.

27 “Wuwinyo ni yam kiwaco ni: ‘Pe itim abor.’* 28 Ento an awacciwu ni, ngat mo keken ma bedo ka neno dako mukene ki miti me bedo kwede, nongo dong otyeko timo abor woko kwede ki i cwinye. 29 Dong, ka ce wa­ngi ma lacuc aye weko ipoto i bal, kol ci ibol woko. Pien bedo ber ka irwenyo dul komi mo acel ma loyo ka kibolo komi kulu i Geena. 30 Dok ka ce cingi ma lacuc aye weko ipoto i bal, tong ingun ci ibol woko. Pien bedo ber ka irwenyo dul komi mo acel ma loyo ka kibolo komi kulu i Geena.*

31 “Dok yam kiwaco bene ni: ‘Ngat ma omoko tamme me keto kenye woko, myero omi waraga me keto keny bot dakone.’ 32 Ento an awacciwu ni, laco ma oketo kenye kun dakone pe otimo tim tarwang,* weko bedo yot bot dakone me timo abor. Dok ngat ma onyomo dako ma kenye oket kit meno nongo otimo abor.

33 “Medo i kom meno, wuwinyo bene ni yam kiwaco bot kwariwa ni: ‘Pe ikwong kwong labongo cobone, ento myero icob kwongeni ducu bot Jehovah.’ 34 Ento an awaco botwu ni: Pe wukwong kwong mo keken, kadi ki nying polo, pien meno komker pa Lubanga, 35 nyo ki nying lobo, pien meno kom laten tyen Lubanga, nyo kadi ki nying Jerucalem, pien meno gang pa Kabaka madit. 36 Dok pe ikwong kwong ki wii, pien pe itwero loko yer wii mo acel doko matar nyo macol. 37 Ento wuwek lokwu ni ‘Eyo’ obed eyo, ki ‘Pe’ obed pe, pien lok makato meno nongo oa ki bot larac-ci.

38 “Wuwinyo ni yam kiwaco ni: ‘Wang kiculo ki wang, dok lak kiculo ki lak.’ 39 Ento an awaco botwu ni: Pe ijem i kom ngat ma kite rac. Ento ka ngat mo odongo lemi tung lacuc, lokke lemi tung lacam bene. 40 Dok ka ngat mo mito teri i nyim lukiko wek egam kanyini, miye kotini bene. 41 Ka ngat mo ma tye ki twero mito ni itimme tic mo kun iwoto kwede pi mairo acel, wot kwede kadi pi mairo aryo. 42 Mi kony bot ngat ma mito ni ikonye, dok pe ikwer miyo den* bot ngat ma mito.

43 “Wuwinyo ni yam kiwaco ni: ‘Mar lawoti dok ikwer lamoneni.’ 44 Ento an awaco botwu ni: Wumedde ki maro lumonewu dok wuleg pi jo ma unowu, 45 wek ­wunyut ni wun lutino pa ­Wonwu ma tye i polo. Pien en weko ceng­nge ryeny i kom jo maraco wa ki jo mabeco, dok weko kot cwer bot jo ma kitgi atir ki jo ma kitgi pe atir bene. 46 Dong mot ango ma wutamo ni wubinongo ka wumaro jo ma gimarowu keken? Lujog mucoro kono pe gitimo gin acel-li? 47 Dok ka wumoto omegiwu keken, nongo wutimo gin ango maber makato jo mukene? Lurok kono pe gitimo gin acel-li? 48 Myero marwu obed labongo roc mo kit macalo Wonwu ma tye i polo pe ki roc.

6 “Wugwokke wek jami mabeco ma wutimo pe obed mere me nyutte bot dano wek gunenwu; ka pe ci pe wubinongo mot mo ki bot Wonwu me polo. 2 Dong ka itye ka miyo kony bot lucan, pe ikut bila kit ma lugoba gitimo kwede i kacokke ki dong i gudi-gu, wek dano gupakgi. Ada awaco botwu ni, dong gutyeko nongo motgi woko. 3 Ento ka itye ka miyo kony bot lucan, pe iwek cingi ma lacam onge gin ma cingi ma lacuc tye ka timo, 4 wek kony ma imiyo obed i mung. Ka itimo kit meno ci Woru ma neni ki i kabedo mukanne aye biculli.

5 “Dok bene ka wutye ka lega, pe myero wutimme calo lugoba, pien gimaro lega ma gucung acunga i kacokke ki dong i kabedo ma gudi madongo orwatte iye wek dano gunengi. Ada awaco botwu ni, dong gutyeko nongo motgi woko. 6 Ento ka imito lega, dony i otti ci ilor doggola, ka dong ileg bot Woru ma tye i polo. Ci Woru ma neni ki i kabedo mukanne aye biculli. 7 Ka wutye ka lega, pe wubed ka nwoyo en lok acel-li keken kit macalo lurok gitimo kwede, pien gitamo ni Lubanga biwinyogi pi lwak lok mapol ma giduro-ni. 8 Dong pe myero wubed calo gin, pien Wonwu ngeyo gin ma wumito kadi ma nongo pud peya wulege.

9 “Pi meno, dong wuleg kit man, ni:

“Wonwa ma tye i polo, wek nyi­ngi obed maleng. 10 Ker meri obin. Wek mitini otimme i lobo, kit ma timme kwede i polo. 11 Miniwa cam* ma mitte pi nino ma tin; 12 dok iwek banyawa,* kit macalo wan bene watimo kwede kica bot lubanyawa. 13 Pe iwek kibitwa, ento larwa ki bot larac.’

14 “Pien ka wutimo kica bot dano pi balgi, Wonwu ma tye i polo bene bitimiwu kica; 15 ento ka pe wutimo kica bot dano pi balgi, Wonwu ma tye i polo bene pe bitimiwu kica pi balwu.

16 “Ka wutye ka rii kec, pe wubed ma wujul calo lugoba, pien gibedo ma wanggi okwor wek dano onen ni gitye ka rii kec. Ada awaco botwu ni, dong gutyeko nongo motgi woko. 17 Ento ka itye ka rii kec, wir moo i wii dok ilwok wangi maleng, 18 wek dano pe gunen ni itye ka rii kec, ento Woru ma tye i polo aye onen. Ci Woru ma neni ki i kabedo mukanne aye biculli.

19 “Pe wukan lonyowu i lobo, ka ma kwidi ki nyal gibalo woko ki ka ma lukwo gitwero turo ci gikwalo woko. 20 Me ka meno, wukan lonyowu i polo, ka ma kwidi ki nyal pe balo, dok lukwo pe gitwero turo ci gikwalo woko. 21 Pien ka ma lonyoni tye iye, aye ka ma cwinyi bene bedo iye.

22 “Tara me kom aye wang. Dong ka ce iciko wangi i kom gin acel keken,* ci komi ducu bibedo maleng.* 23 Ento ka ce wa­ngi pe yeng ki jami,* ci komi ducu bibedo i colpiny. Ka dero ma tye i ii-ni odoko col, ci komi bibedo col atika!

24 “Pe tye dano mo ma twero tic pi ludito aryo; pien en bikwero ngat acel ci maro mukene-ni, nyo en bimoko i kom ngat acel ci cayo mukene-ni. Pe wutwero tic pi Lubanga ki pi Lim bene.

25 “Pi meno awaco botwu ni: ‘Wuwek bedo ki par mapol pi kwowu ki komwu kun wuwaco ni, ‘Wabicamo gin ango?’ nyo ni, ‘Wabimato gin ango?’ nyo ni, ‘Wabiruko gin ango?’ Kwo pe pire tek loyo cam dok kom pe pire tek loyo ginaruka? 26 Kong wunen winyi ma gituk malo i dan polo; pe gicoyo kodi nyo gikayo kac nyo gigwoko cam i dero. Kadi bed kit meno, Wonwu ma tye i polo pitogi. Wun pe piwu tek katogi woko? 27 Anga i kinwu ma twero medo kare me kwone kadi matidi mo pi bedo ki par mapol? 28 Dok pingo wutye ki par pi gin­aruka? Kong wutam i kom ature ma i tim ki kit ma gidongo kwede; pe gitiyo tic dok pe giwiyo uci; 29 ento awaco botwu ni kadi bed Solomon orukke ki deyone ducu, en pe orukke oo i rwom pa ature magi. 30 Ka Lubanga ruko ature ma i tim kit meno, ma tin nen mwonya ci orwone kibolo woko i mac, ci en pe birukowu makato, wun ma niyewu ­nok-ki? 31 Dong pe wubed ki par mapol kun wuwaco ni, ‘Wabicamo gin ango?’ nyo, ‘Wabimato gin ango?’ nyo, ‘Wabiruko gin ango?’ 32 Pien magi ducu gubedo jami ma lurok gitye ka yenyone ki miti matek. Dok Wonwu me polo ngeyo maber ni wumito jami magi ducu.

33 “Pi meno, wumedde ki keto pi Ker-ri ki gin ma atir i wang Lubanga wek obed mukwongo, ci jami magi ducu kibimedo botwu. 34 Dong pe wubed ki par mapol pi nino ma diki, pien nino ma diki bibino ki parre. Nino acel acel tye ki pekone muromo.

7 “Wuwek ngolo kop i kom jo mukene, wek Lubanga pe ongol kop i komwu; 2 pien kit ma wungolo kwede kop i kom jo mukene, en aye kit ma kibingolo kwede kop i komwu, dok kit ma wutero kwede jo mukene, en aye kit ma kibiterowu kwede.* 3 Dong pingo ineno cung bao ma tye i wang omeru ento pe ineno dul yat ma tye i wangi? 4 Nyo itwero waco bot omeru nining ni, ‘Wek akwany cung bao ma tye i wangi-ni woko,’ ma kun nongo dul yat tye i wangi? 5 In lagoba! Kong ikwong kwanyo dul yat ma tye i wangi woko, wek inen piny maber ka dong ikwany cung bao ma tye i wang omeru.

6 “Pe wumi gin maleng bot gwogi nyo wubol tikowu me wel bot opego, wek pe gunyon ki tyengi ci gulokke i komwu guwanwu.

7 “Wumedde ki lega, ci kibimiyowu; wumedde ki yenyo, ci wubinongone; wumedde ki dwongo doggola, ci kibiyabone botwu. 8 Pien jo ducu ma lego kibimiyo botgi, dok jo ducu ma yenyo gibinongo, dok jo ducu ma gidwongo doggola, kibiyabo botgi. 9 Anga i kinwu ma ka wode olege mugati ci miye gweng? 10 Nyo ka wode olege rec, ci miye twol? 11 Dong ka wun jo maraco bene wungeyo miyo mot mabeco ki lutinowu, ci Wonwu ma tye i polo pe bimiyo jami mabeco bot jo ma lege?

12 “Pi meno, jami ducu ma wumito ni dano gutim botwu, wun bene myero wutim botgi. Man aye gin ma Cik ki Lok pa Lunebi pwonyo.

13 “Wudony ki i doggola mading, pien doggola malac ma yone wot iye yot-ti tero dano i to, dok jo mapol gitye ka lubone. 14 Ento doggola mading ma yone wot iye tek-ki tero dano i kwo, dok jo manok keken aye gitye ka nongone.

15 “Wugwokke ki lunebi ma lugoba ma gibino botwu ma gurukke calo romi, ento ki i igi nongo gitye calo orudi mager. 16 Wubingeyogi ki ticgi.* Dano pe pwono nyig olok nyo oduro ki i kom yat okuto. 17 I yo acel-lu, yadi mabeco ducu ginyako nyiggi mabeco, ento yadi maraco ducu ginyako nyiggi maraco bene. 18 Yat maber pe twero nyako nyige maraco, nyo yat marac pe twero nyako nyige mabeco. 19 Yadi ducu ma pe ginyako nyiggi mabeco kibitongogi woko ci kibologi i mac. 20 Kit meno bene, wubingeyo lunebi ma lugoba magi ki ticgi.

21 “Pe dano ducu ma gilwonga ni, ‘Rwot, Rwot,’ gibidonyo i Ker me polo. Ento ngat ma tiyo gin ma Wora ma i polo mito aye bidonyo. 22 Jo mapol gibiwaco bota i nino meno ni: ‘Rwot, Rwot, yam pe watito lok calo lunebi i nyingi, dok pe waryemo cen i nyingi, dok pe watimo tango mapol i nyingi?’ 23 Ento abiwaco botgi ni: ‘Onongo pe angeyowu! Wua woko ki bota, wun lutim jami maraco!’

24 “Dong, ngat mo keken ma winyo lok ma awaco botwu-ni dok keto i tic, bibedo calo laco maryek ma ogero ode i wi got. 25 Ci kot ocwer matek, pii opong, dok yamo magwar okodo i kom ot meno, ento pe opoto, pien gutine onongo ocung i kom got. 26 Ki tungcel, ngat mo keken ma winyo lok ma awaco botwu-ni ento pe keto i tic, bibedo calo laco ma laming ma ogero ode i wi kweyo. 27 Lacen kot ocwer matek, pii opong, dok yamo magwar okodo i kom ot meno, ci ot-ti opoto piny dok oballe woko kwicikwici.”

28 I kare ma Yecu dong otyeko lokke, lwak gubedo ki ur madit adada i kom kit ma en pwonyo kwede, 29 pien obedo ka pwonyogi calo ngat ma tye ki twero, ento pe calo lupwony cikgi.

8 I kare ma Yecu olor piny ki i wi got, lwak dano mapol gulubo kore. 2 Ci nen! ladobo mo obino orumo conge piny i nyime kun waco ni: “Rwot ka imito, ci itwero lonya.” 3 Pi meno, Yecu ocwalo cinge, ci ogude kun wacce ni: “Amito! Abilonyi woko.” Cutcut dobone ocang woko. 4 Ci Yecu owaco bote ni: “Nen ni pe iwaco lok man bot ngat mo, ento cit inyutte bot lulamdog dok imi gityer ma lubbe ki Cik pa Moses, wek gunen ni ada icang woko.”

5 I kare ma Yecu odonyo i Kapernaum, ladit wi mony mo obino bote ma tye ka bako doge 6 kun waco ni: “Ladit, laticca obuto i ot ki two akweya, dok tye ka neno can malit.” 7 Yecu owaco bote ni: “Ka ao kunnu, ci abica­nge woko.” 8 Ci ladit wi mony-nyi ogamo ni: “Ladit, an pe apore me joli i pacona, ento wac mere awaca keken ni kome ocang ci laticca bicang woko. 9 Pien an bene atye i te twero, dok atye ki lumony ma aloyogi. Ka awaco ki ngat acel ni, ‘Citi!’ en cito, ka awaco ki ngat mukene ni, ‘Bin!’ en bino, dok ka awaco ki laticca ni, ‘Tim kit man!’ en timo.” 10 Ma Yecu owinyo lok pa ladit wi mony man, en obedo ki ur matek dok owaco bot lwak ma gulubo kore ni: “Ada awaco botwu ni, pud peya anongo ngat mo ma tye ki niye matek kit man i lobo Icrael. 11 Ento awaco botwu ni jo mapol gibia ki tung kunyango ki dok tung kupoto ceng ci gibibedo ka cam i wi meja kacel ki Abraim, Icaka ki Yakobo i Ker me polo; 12 kun lutino me Ker-ri kibibologi woko i colpiny. Meno aye ka ma gibikok kun gikayo iye lakgi.” 13 Ci Yecu owaco ki ladit wi mony-nyi ni: “Iromo cito. Pi niye matek ma inyuto, wek otimme kit ma ilego kwede-ni.” Ci laticce ocang woko i cawa meno kikome.

14 Lacen, ma Yecu obino i gang pa Petero, oneno maro Petero obuto piny ma tye ki lyeto. 15 Pi meno Yecu ogudo cinge ci lyetone oket woko dok oa malo ocako tedo pigi. 16 Ento i wi otyeno meno, dano gukelo bot Yecu jo mapol ma gitye ki cen maraco; ci en oryemo cen magi ki lok mo manok keken, dok ocango jo ducu ma onongo komgi lit. 17 Man otimme me cobo lok ma Lubanga otito kun tiyo ki lanebi Icaya, ni: “En kikome aye okwanyo twowa dok otingo aremwa.”

18 Ka Yecu oneno lwak ma gugure i ngete, en ociko lupwo­nnyene ni gungol loka nam. 19 Ci lapwony cik mo obino bote dok owacce ni: “Lapwony, abilubo kori ka mo keken ma icito iye.” 20 Ento Yecu owacce ni: “Too gitye ki borogi dok winyi me polo gitye ki odigi, ento Wod pa dano pe tye ki ka mo ma myero opyel iye wiye.” 21 Ci lapwonnye acel owacce ni: “Rwot, wek kong acit ayik wora.” 22 Yecu owacce ni: “Medde ki lubo kora, dok iwek jo muto aye guyik danogi ma guto.”

23 I kare ma Yecu odonyo i yeya, lupwonnyene gulubo kore. 24 Ci nen! nam ocako twagge magwar ma oweko yeya ocako pong woko ki pii; ento Yecu onongo onino woko. 25 Pi meno, lupwonnyene gucito gucoye, kun giwacce ni: “Rwot, larwa, dong wacok to woko!” 26 Ento en owaccigi ni: “Pingo wutye ki lworo, wun jo ma niyewu nok-ki?” Ci oa malo ojuko yamo ki nam, ci nam ogiko twagge woko. 27 Man oweko lupwonnyene gubedo ki ur dok guwaco ni: “Man kit dano ango, ma wa yamo ki nam winyo lokke-ni?”

28 Ka Yecu dong oo i loka nam tungcel, i lobo pa Lugadareno, co aryo ma gitye ki cen maraco gua ki i limu,* ci gurwatte ki Yecu. Co magi onongo giger adada ma oweko dano onongo gilworo wot i yo meno. 29 Ci nen! gucako dangnge, kun giwaco ni: “Imito gin ango ki botwa, in Wod pa Lubanga? Ibino kany ka pwodowa ma pud peya karene oromo?” 30 Lwak opego mapol onongo gitye ka cam cok ki kabedo meno. 31 Pi meno, cen maraco-ni gucako bako doggi bot Yecu kun giwaco ni: “Ka ce imito ryemowa, cwalwa i kom lwak opego-ni.” 32 Yecu owaccigi ni: “Wuciti!” Ci gua woko ki i kom co aryo-ni gudonyo i kom opego. Cutcut lwak opego magi ducu guringo ki malo i wi tera ci gupoto i nam, guto woko i pii. 33 Ento lukwat guringo woko, gucito wa i boma, dok gutito jami ducu ma otimme kadiwa gin ma otimme i kom co aryo ma onongo gitye ki cen maraco-ni. 34 Ci nen! jo ducu ma i boma gubino ka rwatte ki Yecu, dok ma gunene, gubako doggi bote ni myero oa woko ki i kabedogi.

9 Dong ma Yecu odonyo i yeya, en ongolo loka nam ci ocito i boma* ma onongo bedo iye. 2 Ci nen! onongo kitye ka kelo bote laco mo ma kome okwe woko, ma kitingo ki kitanda. Ma Yecu oneno niyegi, en owaco ki laco ma tye ki akweya-ni ni: “Bed ki tekcwiny, latinna! Balli dong kityeko wekone woko.” 3 Dong lupwony cik mogo gucako bedo ki tam i cwinygi ni: “Dano man tye ka yeto Lubanga.” 4 Ma Yecu oniang gin ma tye i cwinygi, en owaco ni: “Pingo wutye ka tamo jami maraco ki i cwinywu? 5 Gin ango ma yot loyo, wacone ni, ‘Balli dong kityeko wekone woko,’ nyo ni, ‘A malo icak wot’? 6 Kadi bed kit meno, wek wunge ni Lubanga omiyo ki Wod pa dano twero i lobo me timo kica pi bal—” ci owaco ki laco ma tye ki akweya-ni ni: “A malo, ikwany kitandani, idok gangi.” 7 Ci laco-ni oa malo odok cen gange. 8 Ka lwak guneno gin ma otimme-ni, gubedo ki lworo matek, dok gumiyo deyo bot Lubanga, ma omiyo twero ma kit meno bot dano.

9 I ngeye ma Yecu oa ki kunnu, en oneno laco mo ma nyinge Matayo ma obedo i opic me jogo mucoro, ci owacce ni: “Bin ibed lalub kora.” Pi meno, en oa malo ci ocako lubo kore. 10 Lacen ma gitye ka cam i ot, nen! lujog mucoro ki lubalo mapol gubino ci gucako cam kacel ki Yecu ki lupwonnyene. 11 Ento ma Luparicayo* guneno man, guwaco bot lupwonnye pa Yecu ni: “Pingo lapwonywu camo kacel ki lujog mucoro ki lubalo?” 12 Ma Yecu owinyo lokgi, en owaco ni: “Jo ma komgi yot pe gimito daktar, ento jo ma komgi lit aye gimito. 13 Pi meno, dong wuciti wuniang tyen lok me ginacoya ma waco ni: ‘Amito kica, ento pe gityer.’ Pien an abino ka lwongo lubalo ento pe jo ma kitgi atir.”

14 Lacen, lupwonnye pa Jon Labatija gubino bot Yecu ci gupenye ni: “Pingo wan ki Luparicayo warii kec ento lupwonnyeni pe girii kec?” 15 Yecu owaco botgi ni: “Lurem lanyom pe gibedo ki tyen lok mo keken me kumo ka lanyom pud tye kwedgi. Ento kare bibino ma kibikwanyo lanyom woko ki botgi, ci dong gibirii kec. 16 Pe tye ngat mo ma dabo bongo manyen i kom bongo macon, pien kiraka biyec woko ki i kom bongo meno ci bongone biyec makato kit macon. 17 Dok dano pe giketo kongo vino manyen i kicaa* vino macon. Ka guketo, kicaa meno bimwoc woko ci vino biony dok kicaa balle woko. Ento dano giketo kongo vino manyen i kicaa vino manyen, wek gin aryo-ni ducu pe guballe.”

18 Ma Yecu pud tye ka waco lok meno botgi, nen! laloc mo obino orumo conge i nyime, ci owacce ni: “Twero bedo ni kombeddi nyara dong oto woko, ento bin iket cingi i kome, ci en bicer woko.”

19 Yecu oa malo, dok en kacel ki lupwonnyene gulubo kor laco meno. 20 Ci nen! dako mo ma remo obedo ka mol ki i kome pi mwaka 12 obino ki i nge Yecu ci ogudo dog bongone, 21 pien en obedo ka waco ki i cwinye kekene ni: “Ka agudo kadi bongone keken, abicang woko.” 22 Yecu olokke ci onene, dok owacce ni: “Bed ki tekcwiny nyara! Niyeni ocangi.” Dok cakke i cawa meno, dako-ni ocang woko.

23 Ma dong Yecu odonyo i ot pa laloc-ci, oneno lukut nyamulere ki lwak ma gitye ka woo ki koko, 24 ci owaccigi ni: “Wukat woko, pien latin anyaka man pe oto ento onino anina.” Man oweko lwak gunyere matek. 25 Cutcut ma lwak gukato woko, en odonyo i ot, omako cing latin anyaka-ni, ci anyaka-ni oa malo. 26 Lok man ongene i kabedo meno ducu.

27 Ma Yecu oa ki kunnu, co aryo ma wanggi oto gulubo kore, kun gidange ni: “Wod pa Daudi, kica omaki i komwa ba!” 28 Ka Yecu dong odonyo i ot, lutowang aryo-ni gubino bote, dok Yecu openyogi ni: “Wutye ki niye ni atwero yabo wangwu?” Gin gugamo ni: “Waye, Rwot.” 29 Ci ogudo wanggi kun waco ni: “Wek otimme i komwu ma lubbe ki niyewu.” 30 Cutcut wanggi oyabbe woko. Ento Yecu ocikogi matek kun waco ni: “Wunen ni ngat mo pe ongeyo lok man.” 31 Ento ma gukato woko, guweko lok kome ongene i kabedo meno ducu.

32 I kare ma co magi gitye ka a, nen! kikelo bot Yecu laco mo ma te lebbe oto dok tye ki cen. 33 Ma dong en oryemo cen woko ki i kom laco meno, laco-ni ocako lok. Man oweko lwak gubedo ki ur dok guwaco ni: “Ma naka yam gin ma kit man peya onen i lobo Icrael.” 34 Ento Luparicayo gubedo ka waco ni: “En ryemo cen ki twero pa ladit wi cen.”

35 I nge meno, Yecu owoto orumo boma ki caro ducu kun pwonyo i kacokkegi dok tito kwena maber me Ker pa Lubanga. En ocango bene kit two ki kit goro ducu ma tye i kom dano. 36 I kare ma oneno lwak, kica omake i komgi, pien onongo kiunogi dok pe kigwokogi, calo romi ma lakwatgi pe. 37 Ci owaco bot lupwonnyene ni: “Kac dwong, ento lutic nok. 38 Pi meno, wuleg Won poto wek ocwal lutic ka kac.”

10 Pi meno, Yecu olwongo lupwonnyene 12 ci omiyo botgi twero i kom cen maraco, wek guryem cen dok gucang kwai two ki kit goro mapatpat ducu.

2 Nying lukwena 12 magi aye: Cimon, ma kilwongo ni Petero, ki ominne Anderiya; Yakobo ki ominne Jon, ma gin awobe pa Jebedayo. 3 Pilipo ki Bartolomayo; Tomaci ki Matayo ma lajog mucoro; Yakobo wod pa Alipayo; Tadayo; 4 Cimon Lakananayo* ki Juda Lakeriot, ma lacen oketo lok roro i kom Yecu.

5 Yecu ooro co 12 magi, kun cikogi ni: “Pe wucit bot lurok, dok bene pe wudony i boma mo keken pa Lucamaria; 6 ento wumedde ki tito kwena bot romi murwenyo me Icrael. 7 Ka wutye ka wot, wutit lok kun wuwaco ni: ‘Ker me polo dong onyiko cok.’ 8 Wucang lutwo, wucer jo muto, wucang ludobo dok wuryem cen. Kimiyo botwu nono, wun bene wumi nono. 9 Pe wuting cente me jabu nyo ryal nyo mola i del pyerwu. 10 Pe wuting kicaa me keto ginacama pi wotwu, nyo bongo mukene,* nyo war, nyo odoo, pien opore pi latic me nongo cam.

11 “I boma nyo caro mo keken ma wudonyo iye, wuyeny ngat ma opore, ci wubed bote nio wang ma wua ki kunnu. 12 Ka wudonyo i ot, wumot* jo me ot meno. 13 Ka gupore me winyo kwena maber, wek kuc ma wulego pigi obed i komgi; ento ka pe gupore, wek kuc meno odwog cen botwu. 14 Ka ngat mo pe ojolowu nyo owinyo lokwu, wuteng apwa woko ki i tyenwu ka wutye ka a ki i ot nyo boma meno. 15 Ada awaco botwu ni, can ma bipoto i kom Codom ki Gomora i Nino me Ngolo Kop pe bibedo marac tutwal ka kiporo ki can ma bipoto i kom boma meno.

16 “Nen! Atye ka cwalowu macalo romi i kin orudi; pi meno wubed ryek calo twol ento wubed labongo bal mo calo akuri. 17 Wubed ma wugwokke, pien dano gibiterowu i nyim lukiko me ngolo kop dok gibigoyowu i ot cokkegi. 18 Dok kibiterowu i nyim luloc ki luker pira, me bedo caden botgi ki bot jo me rok mukene. 19 Ento ka kiterowu i nyimgi, pe wubed ka paro kit ma myero wulok kwede nyo gin ma wubiwacone, pien wubingeyo gin me aloka i cawa meno; 20 pien pe wun aye nongo wutye ka lok, ento cwiny pa Wonwu bikonyowu me lok. 21 Medo i kom meno, dano bimiyo ominne me aneka, ki won latin bene bimiyo latinne, dok lutino gibijemo i kom lunyodogi ci gimiyo lunyodogi me aneka. 22 Dok jo ducu bikwerowu pi nyinga, ento ngat ma ociro nio wa i agikki aye kibilarone. 23 Ka kitye ka unowu i boma acel, wuring woko i boma mukene; pien ada awacciwu ni, pe wubityeko tito kwena i boma ki caro ducu ma i Icrael, ma nongo Wod pa dano peya obino.

24 “Ngat ma kitye ka pwonyone pe dit kato lapwonye, dok opii pe dit kato laditte. 25 Dong rwatte ki ngat ma kipwonyo-ni me bedo calo lapwonye, ki opii me doko calo laditte. Ka dano gulwongo rwod ot ni Beeljebul,* ci wang ma gulwongo jo me ode bene kit meno! 26 Pi meno, pe wulworgi, pien pe tye gin mo ma kiumo ma pe kibiyabone, dok pe tye mung mo ma pe kibingeyone. 27 Gin ma awaco botwu i colpiny, wutit woko i dyeceng, ki gin ma wuwinyo kikwilo akwila, wutit lokke ki i wi ot. 28 Dok pe wulwor jo ma gineko kom ento pe gitwero neko kwo;* ento wulwor ngat ma twero neko kwo kacel ki kom i Geena.* 29 Aribe aryo pe kicatogi pi nyig cente acel ma welle tidi? Kadi bed kit meno, mo acel i kingi pe poto piny ma Wonwu pe ongeyo. 30 Dok en ngeyo kadi wa wel yer wiwu ducu. 31 Pi meno, pe wulwor; pien piwu tek kato pi aribe mapol.

32 Dong ngat mo keken ma ye an i nyim dano, an bene abiye en i nyim Wora ma tye i polo. 33 Ento ngat ma kwera woko i nyim dano, an bene abikwere woko i nyim Wora ma tye i polo. 34 Pe wutam ni abino me kelo kuc i lobo; an pe abino me kelo kuc, ento pala lucwan. 35 Pien abino ka kelo apokapoka i kin latin awobi ki wonne, anyaka ki minne, ki dong ci-wod ki daane. 36 Ki lok ada, lumone pa dano bibedo jo ma i pacone. 37 Ngat ma maro wonne nyo minne makato an pe opore me bedo lalub kora; dok ngat ma maro wode nyo nyare makato an pe opore me bedo lalub kora. 38 Dok ngat ma pe ye deno can kun tingo yatte* dok lubo kwede kora pe opore me bedo lalub kora. 39 Ngat ma tute me gwoko kwone birwenyone arwenya, ento ngat ma rwenyo kwone pira binongone.*

40 “Ngat ma jolowu, jolo an bene; dok ngat ma jolo an, jolo Ngat ma oora bene. 41 Ngat ma jolo lanebi pien ni obedo lanebi binongo mot pa lanebi, dok ngat ma jolo dano ma kite atir pien ni kite atir binongo mot pa dano ma kite atir. 42 Dok ada awacciwu ni, ngat ma miyo pii mangic me amata bot ngat acel i kin jo matino magi pien ni obedo lapwo­nnyena, pe birwenyo motte.”

11 Ma dong Yecu otyeko ciko lupwonnyene 12, en oa ki kunnu ci ocito ka pwonyo dano ki dong tito kwena i boma mapatpat.

2 Ento i kare ma Jon owinyo pi tic pa Kricito ki i buc, en ooro lupwonnyene bote 3 me penye ni: “In aye Ngat ma kiwaco ni ­bibino-ni, kece omyero dok wakur ngat mukene?” 4 Yecu odokkigi iye kit man ni: “Wucit wutit bot Jon gin ma wutye ka winyo ki ma wutye ka neno: 5 Lutowang dong gitye ka neno piny dok lungolo gitye ka wot, ludobo kitye ka lonyogi dok luding it gitye ka winyo lok, jo muto kitye ka cerogi dok lucan kitye ka tito botgi kwena maber. 6 Ngat ma pe bedo ki akalakala* mo i koma tye ki yomcwiny.”

7 I kare ma lupwonnye pa Jon gua me dok cen, Yecu ocako lok i kom Jon bot lwak, ni: “Gin ango ma wucito ka nenone i tim? Tika wucito ka neno lagada ma yamo tye ka yengone? 8 Dong gin ango ma wucito ka nenone? Wucito ka neno laco ma oruko bongi mabeco?* Nen, jo ma giruko bongi mabeco gibedo i odi pa luker. 9 Pingo dong wucito kunnu? Ka neno lanebi? Kakare, awacciwu ni, wucito ka neno ngat madit kato lanebi. 10 Man aye ngat ma yam kicoyo lok i kome ni: ‘Nen! Atye ka cwalo lakwenana me telo nyimi, ma biyubo yoni ma peya ibino!’ 11 Ada awaco botwu ni, pe tye ngat mo ki i kin dano ma kinywalogi ma dit kato Jon Labatija. Ento ngat matidi tutwal i Ker me polo dit kato Jon. 12 Nicakke ki i kare ma Jon Labatija ocako ticce, dano gitye ka tute ki kerogi ducu me donyo i Ker me polo, dok jo ma gitute matek gibidonyo* iye. 13 Pien Lunebi ki Cik gubedo ka tito pi gin ma bitimme i anyim nio wa i kare ma Jon obino; 14 dok kadi bed wumito ye lokka nyo pe, Jon aye ‘Elia ma lunebi guwaco ni bibino-ni.’ 15 Dong ngat ma ite tye me winyo lok, myero owiny.

16 “Abiporo yalwak man ki angagi? Yalwak man rom ki lutino matino ma gubedo i cuk dok gilwongo luwotgi, 17 kun giwaco ni: ‘Wakuto nyamulere piwu, ento pe wumyelo; wakok matek, ento pe wudongo korwu ki cwercwiny.’ 18 I yo acel-lu bene, Jon obino ma pe camo dok pe mato kongo, ento dano giwaco ni, ‘En tye ki cen marac.’ 19 Wod pa dano obino ma camo dok mato kongo, ento dano giwaco ni, ‘Nen! En laco ma laworo dok lamero, larem lujog mucoro ki lubalo.’ Kadi bed kit meno, ryeko nen woko ka maleng ki ticce.*

20 Ci Yecu ocako lok ki cwercwiny i kom boma ka ma en otimo iye pol pa tangone, pien jo ma kunnu pe gungut i kom balgi, 21 kun waco ni: “Can i wiwu, wun jo Korajin! Can i wiwu, wun jo Betecaida! pien ka onongo tic madito ma kitimo botwu kitimogi i Turo ki Cidon, kono onongo jo meno gungut ma guruko bongo cola dok gubedo i buru. 22 Ento awaco botwu ni, can ma bipoto i kom Turo ki Cidon i Nino me Ngolo Kop pe bibedo marac tutwal ka kiporo ki can ma bipoto i komwu. 23 Dok wun jo me Kapernaum, tika wutamo ni kibimedo rwomwu malo wa i dan polo? Pe! Kibidwokowu piny wa i Lyel;* pien ka onongo tic madito ma kitimo botwu-ni aye kitimogi i Codom, kono onongo boma meno pud tye wa i kare-ni. 24 Ento awaco botwu ni, can ma bipoto i kom Codom i Nino me Ngolo Kop pe bibedo marac tutwal ka kiporo ki can ma bipoto i komwu.”

25 I cawa meno Yecu owaco ni: “Apaki i nyim dano ducu Wora, Rwot me polo ki lobo, pien ikano jami magi woko ki bot jo maryek ki jo ma tye ki ngec, ento inyutogi bot lutino matino. 26 Ada Wora, pien meno aye kit ma imito ni otimme kwede. 27 Wora dong otyeko miyo bota jami ducu. Pe tye ngat mo ma ngeyo Wod maber makato Won; dok pe tye ngat mo ma ngeyo Won maber makato Wod ki dong jo ma Wod mito nyuto botgi anga ma Won obedo. 28 Wubin bota, wun jo ducu muol ki ma yec onurowu, ci abimiyo wunongo yweyo.* 29 Wuting ayokona* dok wunong pwony ki bota, pien an lakica dok amwol bene ki i cwinya, ci wubinongo yweyo. 30 Pien ayokona* tingone yot, dok yecca pe pek.”

12 I kare mo, Yecu ki lupwonnyene onongo gitye ka kato ki i dye poto bel i nino me Cabat.* Kec ocako neko lupwo­nnyene, pi meno gucako jako wit bel, ci gumwodo. 2 Ma Luparicayo guneno, guwaco bot Yecu ni: “Nen! Lupwonnyeni gitye ka timo gin ma cik pe ye ni kitim i nino me Cabat.” 3 En owaccigi ni: “Pe wukwano gin ma Daudi ki jo ma gitye kwede gutimo i kare ma kec obedo ka nekogi? 4 En odonyo i ot pa Lubanga ci gucamo mugati me aketa i nyim Lubanga, gin ma cik onongo pe ye ni en nyo jo ma tye kacel kwede gucam, ento kono lulamdog keken. 5 Nyo pe wukwano ki i Cik ni i nino me Cabat lulamdog ma i ot pa Lubanga gituro cik me Cabat ento gimedde ki bedo labongo bal? 6 Dong awacciwu ni, gin mo madit kato ot pa Lubanga tye kany. 7 Ento, ka onongo wuniang tyen lok me ginacoya ma waco ni: ‘Amito kica, ento pe gityer’ kono onongo pe wungolo kop i kom jo ma balgi pe. 8 Pien Wod pa dano aye Rwot me Cabat.”

9 I nge a ki i kabedo meno, en odonyo i kacokkegi, 10 ci nen! laco mo ma bade okang* onongo tye kunnu! Pi meno gupenyo Yecu ni, “Cik ye ni kicang dano i nino me Cabat?” Gupenyo kit meno pien onongo gimito mako bal i kome. 11 En owaco botgi ni: “Ka ngat mo i kinwu tye ki romo acel keken ci romo meno opoto i bur i nino me Cabat, en pe biywayo romo meno woko? 12 Dong dano pe pire tek loyo romo? Pi meno, cik ye ni kitim gin maber i nino me Cabat.” 13 Ci en owaco bot laco meno ni: “Rye badi.” Laco-ni oryeyo bade ci bade ocang woko, odoko calo bade mukene-ni. 14 Ento Luparicayo gukato woko dok gucako piro lok i kom Yecu wek kineke woko. 15 Ma Yecu ongeyo lok meno, en oa woko ki kunnu. Jo mapol bene gulubo kore, dok en ocangogi ducu. 16 Ento en ocikogi matek ni pe myero guwek lok i kome ongene, 17 wek lok ma Lubanga owaco kun tiyo ki ­lanebi Icaya ocobbe kakare, ni:

18 “Nen! Laticca ma an ayero, ma amaro, dok cwinya yom i kome! Abimiye cwiny mera maleng dok en binyuto bot rok ducu gin ma ngolo kop ma atir obedo. 19 En pe bidaa nyo bida­nge ki dwan malongo, dok ngat mo pe biwinyo dwanne i gudi madongo. 20 En pe bituro lagada mo ma otyer, dok pe bineko mac tara ma cok to, nio wang ma en okelo ngolo kop atir. 21 Ada, jo me rok ducu gibiketo gengi i kome.”*

22 I nge meno, kikelo bote laco mo ma tye ki cen marac, ma wa­nge oto dok te lebe bene oto, ci en ocange woko. Man oweko laco ma te lebe oto-ni ocako lok ki neno piny. 23 Pi meno, lwak gubedo ki ur dok gucako waco ni: “Man mono pe Wod pa Daudi?” 24 Ma Luparicayo guwinyo lok man guwaco ni: “Laco ­man ­ryemo cen ki twero pa Beeljebul,* ladit wi cen.” 25 I kare ma Yecu oniang gin ma gitye ka tamone, en owaco botgi ni: “Ker mo keken ma jone gilwenyo i kingi bitur woko, dok boma nyo ot mo keken ma jone gilwenyo i kingi pe bicung. 26 I yo acel-lu, ka Catan ryemo Catan, nongo en tye ka lweny i kome kekene, dong kerre bicung nining? 27 Dok bene, ka an aryemo cen ki twero pa Beeljebul, ci lupwonnyewu kono giryemo cen ki twero pa anga? Pi meno, lupwonnyewu aye gibibedo lungolkopwu. 28 Ento ka an aryemo cen pi teko pa cwiny pa Lubanga, ci Ker pa Lubanga ongukowu ma pe wungeyo. 29 Ngat mo twero turo ot pa laco ma kome tek ci yako jamine nining, ka pe kong otweyo laco ma kome tek-ki woko ka dong lacen ocako yako ode? 30 Ngat ma pe tye tung bota, nongo en lamonena, dok ngat ma pe coko dano kacel kweda, ketogi aketa.

31 “Pi meno awacciwu ni, kit bal ducu ki yet* ducu ma dano yeto kwede Lubanga, kibitimigi iye kica, ento ngat ma yeto cwiny pa Lubanga, pe kibitimme kica. 32 Me labolle, ngat ma loko marac i kom Wod pa dano, kibitimme kica; ento ngat ma loko marac i kom cwiny maleng, pe kibitimme kica matwal, kadi i kare man nyo i kare ma bibino anyim.

33 “Wuwek yatwu obed maber ci binyako nyige mabeco, nyo wuwek yatwu obed marac ci binyako nyige mutop bene; pien kingeyo kit ma yat moni tye kwede ki i nyige. 34 Wun lutino twol uyu, wutwero loko lok maber nining kun kitwu rac? Pien gin ma opong i cwiny dano aye doge bene loko. 35 Dano maber kwanyo jami mabeco ki i kin jami mabeco ma en ogwoko i cwinye, ento dano marac kwanyo jami maraco ki i kin jami maraco ma en ogwoko i cwinye. 36 Awacciwu ni, i Nino me Ngolo Kop,* kibingolo kop i kom dano pi lok ducu ma konye pe ma giloko; 37 pien lok ma iloko aye biweko kilwongi ni kiti atir nyo kingolo kop loyi.”

38 Me dok i lokke-ni, lupwony cik ki Luparicayo mogo guwacce ni: “Lapwony, wamito neno lanyut mo ki boti.” 39 En ogamo ni: “Jo me yalwak man ma kitgi rac dok pe gitye lugen* bot Lubanga gibedo ka yenyo lanyut, ento pe kibimiyo botgi lanyut mo mapat ki lanyut pa lanebi Yona keken. 40 Pien kit macalo Yona obedo kwede i i rec madit-ti pi nino adek dyeceng ki dyewor, Wod pa dano bene bibedo i lyel* pi nino adek dyeceng ki dyewor. 41 Jo Nineve gibicer kacel ki jo me yalwak man i Nino me Ngolo Kop dok gibiweko kop loyo yalwak man, pien gin gungut i kare ma guwinyo lok pa Yona. Ento nen! ngat madit kato Yona tye kany. 42 Kabaka ma dako me tung kupiny bicer kacel ki jo me yalwak man i Nino me Ngolo Kop dok biweko kop loyo yalwak man, pien en oa ki i agikki lobo ci obino ka winyo lok me ryeko pa Solomon. Ento nen! ngat madit kato Solomon tye kany.

43 “Ka cen marac oa ki i kom dano mo, en kato ki i kabedo ma pii pe iye kun yenyo ka yweyo ento pe nongo ka mo keken. 44 Ka dong waco ni, ‘Abidok cen i oda ka ma aa ki iye.’ Ka obino, nongo ot tye nono ento kiyweyo woko dok kideyo maber. 45 Ci en dong cito gamo cen abiro mukene ma giraco giloye, dok ka gudonyo i iye, gibedo kunnu; man weko laco-ni bedo marac ma loyo kit macon. Meno aye kit ma bitimme kwede bene i kom yalwak man marac-ci.”

46 Ma en onongo pud tye ka lok ki lwak, minne ki omegine gucung woko, kun gimito lok kwede. 47 Ci ngat mo owacce ni, “Nen! Mamani ki omegini gucung woko dok gimito lok kwedi.” 48 En owaco bot ngat ma oloko kwede-ni ni: “Anga ma mamana, ki omegina kono angagi?” 49 Dok en oryeyo bade tung bot lupwonnyene ci owaco ni: “Nen! Mamana ki omegina gin ene! 50 Pien ngat mo keken ma tiyo gin ma Wora ma i polo mito, en aye omera ki lamera ki mamana.”

13 I nino meno, Yecu oa woko ki i ot, ci ocito obedo i dog nam. 2 Dok lwak dano mapol adada gubino bote ma omiyo en odonyo i yeya ci obedo piny, dok lwak ducu gucung i dog nam. 3 Ci ocako pwonyogi jami mapol kun tiyo ki carolok. En owaco ni: “Nen! Laco mo ocito ka coyo kodi. 4 Ma en tye ka coyone, kodi mogo okir i teng yo, ci winyi gubino gucamogi woko. 5 Kodi mukene okir i kom got ka ma ngom tye iye manok, ci gutwi woko cutcut pien lobone onongo pe tut. 6 Ento i kare ma ceng oryeny, owangogi ci gutwo woko pien onongo lwitgi pe odonyo matut. 7 Kodi mogo opoto i kin okuto, ci okuto olot odiyogi woko. 8 Ento kodi mukene opoto i ngom maber, ci gucako nyako nyiggi tyen mapol makato ma kipito, mogo gunyako 100, mukene 60, ki mukene 30. 9 Ngat ma ite tye me winyo lok, owiny.”

10 Pi meno lupwonnyene gubino bote ci guwacce ni: “Pingo ipwonyogi kun itiyo ki carolok?” 11 En ogamo lokgi kun waco ni: “Wun kimiyo botwu mot me niang mung maleng me Ker me polo, ento pe kimiyo mot meno botgi. 12 Pien ngat ma tye ki gin mo, kibimedo bote ci en bedo ki jami mabup; ento ngat ma pe ki gin mo, kadi matidi ma en tye kwede-ni bene kibikwanyone woko ki bote. 13 Man aye oweko atiyo ki carolok me lok kwedgi; pien gineno, ento bedo calo pe guneno, giwinyo ento bedo calo pe guwinyo, dok bene pe giniang. 14 Lok pa lanebi Icaya tye ka cobbe i komgi. En owaco ni: ‘Ka me winyo, wubiwinyo gire, ento pe wubiniang te lokke, dok ka me neno, wubineno gire, ento pe wubiniang gin ma wuneno. 15 Pien cwiny jo man dong odoko nwang, itgi winyo lok ento pe gilubo, dok gumiyo wanggi woko, wek pe ginen ki wanggi nyo giwiny ki itgi. Pi meno, pe giniang dok bene pe gilokke gidwogo bota wek acanggi.’

16 “Ento wun, wutye ki yomcwiny pien wangwu neno piny dok itwu winyo lok. 17 Pien ada awaco botwu ni, lunebi ki jo mapol ma kitgi atir gubedo ki miti me neno jami ma wutye ka nenone ento pe guneno, ki me winyo jami ma wutye ka winyone ento pe guwinyo.

18 “Kong dong wuwiny te lok me carolok pa laco ma ocoyo kodi-ni. 19 Ka ngat mo owinyo kwena me Ker-ri ento pe oniang te lokke, larac-ci bino ci kwanyo kodi ma kicoyo i cwinye-ni woko; meno aye kodi ma okir i teng yo. 20 Dok kodi ma opoto i kom got, en aye ngat ma winyo lok meno ci cutcut jolo ki yomcwiny. 21 Ento kodi meno nongo pe orwako lwite matut i cwinye, mumiyo en bedo pi kare mo manok keken ento ka can nyo aunauna ocakke pi lok meno, en poto woko. 22 Dok kodi ma okir i kin okuto, en aye ngat ma winyo lok me Ker-ri, ento paro lok me kare man kacel ki teko pa lonyo me bwolo dano diyo lok meno woko, ci weko pe nyako nyige. 23 Dong kodi ma kicoyo i ngom maber-ri aye jo ma giwinyo lok me Ker-ri ci giniang maber, dok i ngeye ginyako nyiggi mapol, mogo ginyako 100, mukene 60, ki mukene 30.”

24 En dok omiyo botgi lapor mukene, kun waco ni: “Kiromo poro Ker me polo ki laco ma ocoyo kodi maber i potone. 25 I kare ma dano tye ka nino, lamonene obino ci ocoyo doo i kin ngano ma onongo kicoyo-ni, ci ocito woko. 26 I kare ma ngano otwi ci ongok, doo bene ocako nen. 27 Pi meno, lutic pa won poto gubino bote dok gupenye ni, ‘Ladit, in pe icoyo kodi maber i potoni? Ci pingo dok doo tye iye?’ 28 En ogamo ni, ‘Lamonena mo aye otimo man.’ Luticce guwacce ni, ‘Imito ni wacit waput doo woko?’ 29 En owaco ni, ‘Pe, pien ka wutye ka puto doo, wuromo puto ngano kacel ki doo. 30 Wuwek gin ducu gudong kacel nio wa i kare me kac, dok ka kare me kac oromo, abiciko lukac ni: Kong wukwong coko doo ci wutwegi i dul ki dul me awanga, ka dong wucok ngano wuter i derona.’”

31 En dok omiyo botgi lapor mukene, kun waco ni: “Ker me polo rom ki kodi karadali ma laco mo opito i potone. 32 Ki lok ada, man obedo nyig kodi matidi loyo kodi ducu, ento ka odongo, doko yat madit loyo ki i kin yadi ducu ma kicamo nyiggi, dok winyi me polo gibino ci giyubo odigi i jange.”

33 En dok omiyo botgi lapor mukene, ni: “Ker me polo rom ki tobi ma dako mo okwanyo ci orubo ki moko ngano ma cok romo adita adek,* nio ka moko ducu oyenyo ci okwot madit.”

34 Yecu oloko lok magi ducu bot lwak kun tiyo ki carolok. Ki lok ada, en kare ducu onongo loko botgi kun tiyo ki carolok, 35 man otimme me cobo lok ma Lubanga otito kun tiyo ki lanebine, ni: “Abilok ki carolok; Abitito jami ma okanne nicakke i acakki piny.”*

36 Ma en dong oweko lwak ocito, en odonyo i ot. Lupwonnyene gubino bote ci guwacce ni: “Tit botwa tyen lok me carolok i kom doo ma i poto-ni.” 37 En owaccigi ni: “Laco kodi maber-ri aye Wod pa dano; 38 poto aye lobo man. Kodi maber-ri aye lutino me Ker-ri, ento doo en aye lutino pa larac, 39 dok lamone ma ocoyo doo obedo Larac-ci. Kare me kac en aye kare me agikki me lobo man,* dok lukac gubedo lumalaika. 40 Dong kit macalo kicoko kwede ki doo ci kiwango woko ki mac, bitimme kit meno bene i kare me agikki me lobo man.* 41 Wod pa dano bicwalo lumalaikane, ci gibikwanyo woko ki i Kerre jami ducu ma miyo dano poto i bal kacel ki lutim maraco ducu, 42 dok gibibologi i ruk mac. Meno aye ka ma gibikok kun gikayo iye lakgi. 43 I kare meno, jo ma kitgi atir gibiryeny matar calo ceng i Ker pa Wongi. Dong ngat ma ite tye me winyo lok, myero owiny.

44 “Ker me polo rom ki lonyo ma kikano i poto, ma laco mo onongo ci dok okano; dok pi yomcwiny ma en tye kwede, en ocito ocato jami ducu ma en tye kwede ci owilo poto meno.

45 “Dok Ker me polo rom ki lacat wil ma tye ka yenyo tiko me wel. 46 I kare ma onongo tiko mo acel me wel, en ocito ci cutcut ocato jami ducu ma en tye kwede ci owilo ki tiko meno.

47 “Dok Ker me polo rom ki obwo ma lumak rec gubolo i nam ci ogwaro kit kwai rec mapatpat ducu. 48 I kare ma opong, guywayo wa i wi tera, ci gubedo piny, guyero rec mabeco guketo i aduku, ento maracone gubolo woko. 49 Meno aye kit ma bibedo kwede i kare me agikki me lobo man.* Lumalaika gibicito ci gipoko jo maraco ki i kin jo ma kitgi atir, 50 dok gibibolo jo maraco i ruk mac. Meno aye ka ma gibikok kun gikayo iye lakgi.”

51 En openyogi ni: “Tika wuniang lok magi ducu?” Guwacce ni: “Eyo.” 52 Ci en owaco botgi ni: “Dong kit macalo wuniang lok magi ducu-ni, myero wunge ni lapwony mo keken ma kipwonye ki lok madok i kom Ker me polo rom ki laco mo ma obedo won ot, ma kwanyo jami manyen ki macon ki ka ma en okano iye lonyone.”

53 I kare ma Yecu otyeko tittigi lapor magi, en oa woko ki kunnu. 54 Dok ma obino i lobo tugi, en ocako pwonyogi i kacokkegi, mumiyo gin gubedo ki ur kun giwaco ni: “Dano man onongo ryeko man ki kwene dok anga ma omiyo bote teko me timo tango magi? 55 Man pe obedo wod pa lapaa bao-ni? Minne pe nyi­nge Maliam, dok omegine pe Yakobo ki Yucepu ki Cimon ki Juda? 56 Dok lumegine ducu pe gibedo kacel kwedwa kany? Ci dong en onongo jami magi ducu ki kwene?” 57 Pi meno, gukwero ye lokke woko. Ento Yecu owaco botgi ni: “Dano kare ducu gipwoyo lanebi, ento jo ma i kabedone nyo ma i ode pe gipwoye.” 58 Dok en pe otimo tango mapol kunnu pien onongo gipe ki niye.

14 I kare meno, Kerode* ma obedo laloc me Galilaya, owinyo lok i kom Yecu 2 ci owaco bot luticce ni: “Man Jon Labatija. Kicere woko ki i kin jo muto, meno aye oweko en tye ki teko me timo tango magi ducu.” 3 Kerode onongo omako Jon ci otweyo woko i buc pi Kerodia, dako pa ominne Pilipo. 4 En otimo meno pien Jon onongo obedo ka waco ki Kerode ni: “Cik pe ye ni myero ibed ki ci-omeru.” 5 Ento, kadi bed ni en onongo mito neko Jon woko, en obedo ka lworo lwak, pien onongo giye ni Jon obedo lanebi. 6 Dong i kare ma kitye ka kwero nino nywal pa Kerode, nya pa Kerodia omyelo i nyim wele ci oyomo cwiny Kerode matek 7 mumiyo Kerode ocikke kun kwongnge akwonga me miyo bote gin mo keken ma en openyo pire. 8 Ci min anyaka-ni opiye, mumiyo en owaco ni: “Miya wi Jon Labatija i weer kany.” 9 Kabaka okumo matek, ento pi kwong ma okwongo ki pi welene, en ociko ni omyero kimiye. 10 Pi meno, Kabaka ocwalo dano oweko kinguno wi Jon woko ki i buc. 11 Ci kiketo wiye i weer dok kimiyo ki anyaka-ni, ka dong anyaka-ni otero bot minne. 12 Lacen, lupwo­nnyene gubino gukwanyo kome guyiko, ci gucito gutito lokke bot Yecu. 13 Ka Yecu owinyo lok man, en oito yeya ci oa woko ki kunnu dok ocito i kabedo ma dano pe iye wek ebed kene. Ento ma lwak guwinyo pire, gua ki i boma mapatpat ci gulubo kore kunnu kun giwoto ki tyengi.

14 Ma Yecu oo i wi tera, en oneno lwak dano mapol, dok kica omake i komgi, ci ocango lutwogi. 15 Ento ma dong oo otyeno, lupwonnyene gubino bote ci guwacce ni: “Man kabedo ma dano pe bedo iye dok piny tye ka yuto woko; ket lwak woko wek gucit i kin caro guwil cam pigi.” 16 Ento Yecu owaco botgi ni: “Pe mitte ni guciti; wun wuminigi gin mo me acama.” 17 Guwacce ni: “Pe watye ki gin mo mapat ki mugati abic ki rec aryo.” 18 En owaco ni: “Wukelgi bota kany.” 19 Ci owaco ki lwak ni gubed piny i wi lum. Ka dong okwanyo mugati abic ki rec aryo-ni, oilo wange malo i polo, olego,* dok i nge turo mugati, en omiyo bot lupwonnyene, ci lupwonnyene gumiyo bot lwak. 20 Gin ducu gucamo guyeng, ci gucoko cam mudong, oromo kikabo adita 12. 21 Dong jo ma gucamo cam meno onongo giromo co 5,000, ma pe kikwano iye mon ki lutino. 22 Dok i nge meno cutcut, en owaco ki lupwonnyene ni guit yeya gukwong cito loka nam tungcel, ento en odong wek eket lwak gudok cen paco.

23 I ngeye ma lwak dong guket, en ocito i wi got kene ka lega. Ma piny dong oyuto, en onongo tye kunnu kene. 24 Ento yeya onongo dong tye mairo* mapol me a ki i wi tera, dok pii onongo tye ka twago yeya matek pien yamo obedo ka kodo kun bino ki i nyimgi. 25 Ento, en obino botgi kwarpiny,* kun woto i wi nam ki tyene. 26 I kare ma lupwonnyene gunene kun woto i wi nam ki tyene, lworo omakogi matek, ci guwaco ni: “Man cen?” Dok gudange matek ki lworo. 27 Ento cutcut Yecu oloko kwedgi kun waco ni: “Wubed ki tekcwiny! Meno an; pe wubed ki lworo.” 28 Ci Petero owacce ni: “Rwot, ka meno in, ci lwonga wek abin boti kun awoto ki i wi pii.” 29 Yecu owacce ni: “Bin!” Pi meno, Petero oa woko ki i yeya ci owoto ki i wi pii kun cito tung bot Yecu. 30 Ento ma oneno yamo tye ka kodo matek, lworo omake. Dok ma ocako lwiny i pii, en odange ni: “Rwot lara ba!” 31 Cutcut Yecu ocwalo cinge omake ci owacce ni: “In ma niyeni nok-ki, pingo icako bedo ki akalakala?” 32 Ma dong gudonyo i yeya, yamo opye mot. 33 Ci jo ma tye i yeya gurumo conggi piny i nyime kun giwaco ni: “Ada, in Wod pa Lubanga.” 34 Gungolo loka nam ci gucung i Genecaret.

35 Ka jo ma i kabedo meno guniang i kom Yecu, gucwalo lok bot dano ducu ma i kabedo ma orumo lobo meno, ci gukelo bote jo ducu ma komgi lit. 36 Dok gubako doggi bote ni owek gigud kadi dog bongone keken, pi meno jo ducu ma gugudo dog bongone gucang woko.

15 I nge meno, Luparicayo ki lupwony cik mogo gua ki i Jerucalem ci gubino bot Yecu, dok gupenye ni: 2 “Pingo lupwonnyeni pe gilubo pwony pa kwariwa? Me labolle, pe gilwoko* cinggi ka gimito cam.”

3 Ci Yecu ogamo ni: “Pingo wuturo cik pa Lubanga pi lubo pwony pa kwariwu? 4 Me labolle, Lubanga yam owaco ni, ‘Wor babani ki mamani,’ ki dok ni, ‘Ngat ma loko lok maraco i kom* wonne nyo minne myero kinek woko.’ 5 Ento wun wuwaco ni, ‘Ka ngat mo owaco ki wonne nyo minne ni: “Gin ma myero akonyi kwede dong atyeko dyerone woko bot Lubanga,” 6 nongo dong pe mitte ni en owor lunyodone.’ Pi meno, wuweko lok pa Lubanga odoko gin ma konnye pe pi pwony pa kwariwu. 7 Wun jo ma lugoba, Icaya yam otito lok i komwu con i kare ma owaco ni: 8 ‘Jo magi giwora ki lok doggi keken, ento cwinygi pe i koma. 9 Woro ma gimiyo bota konnye pe, pien pwonygi jenge i kom cik pa dano.’” 10 Ci Yecu olwongo lwak cok bote dok owaccigi ni: “Wuwiny lokka dok wuniang te lokke maber: 11 Pe gin ma donyo ki i dog dano aye balo dano, ento gin ma kato woko ki i doge aye balle.”

12 Lupwonnyene gubino bote ci guwacce ni: “Tika ingeyo ni gin ma iwaco-ni ocwero cwiny Luparicayo matek?” 13 Yecu ogamo lokgi kun waco ni: “Kit ginapita mo keken ma Wora me polo aye pe opito, kibiputone woko. 14 Wuwek gubedi. Gin lutowang ma gipeyo lutowang luwotgi. Dong, ka latowang peyo latowang lawote, ci gin ducu gibipoto woko i bur.” 15 Petero ogamo ni: “Tit botwa tyen lok me carolok ma imiyo-ni.” 16 Yecu ogamo ni: “Kadi wa wun bene pud peya wutwero niang? 17 Pe wungeyo ni gin ma donyo ki i dog dano wok ki i iye ci kato woko? 18 Ento, gin ma katti woko ki i dog dano, nongo oa ki i cwinye, dok meno aye gin ma balo dano. 19 Pien, gin ma a ki i cwiny dano aye tam maraco ma weko gitimo jami calo: nek, abor, tim tarwang, kwalo kwo, bedo caden me goba, ki dong loko lok maraco. 20 Magi aye jami ma balo dano, ento cam ki cing ma pe kilwoko* pe balo dano.”

21 Ma Yecu oa ki kunnu, en ocito i lobo me Turo ki Cidon. 22 Ci nen! dako mo ma Lapoiniki* ma bedo kunnu obino bote kun dangnge ni: “Ai Rwot, Wod pa Daudi, kica omaki i koma ba! Nyara tye ki cen marac ma tye ka une matek.” 23 Ento Yecu pe ogamo dog dako-ni. Pi meno, lupwonnyene gubino bote ci guwacce ni: “Ryem dako-ni woko, pien en tye ka lubo korwa kun woto ki dangnge.” 24 En ogamo ni: “Pe kicwala bot ngat mukene mapat ki romi murwenyo me rok me Icrael.” 25 Ento dako meno obino orumo conge i nyime ci owacce ni: “Rwot, konya ba!” 26 Yecu owacce ni: “Pe pore me kwanyo mugati pa lutino me abola bot lutino gwogi.” 27 Dako-ni ogamo ni: “Ada Rwot, ento lutino gwogi bene gicamo ngidingidi cam ma poto ki i meja pa wegigi.” 28 Yecu ogamo ni: “In dako ma niyene tek; wek otimme boti kit ma imito.” Ci nyare ocang woko i cawa meno cutcut.

29 Yecu oa ki kunnu ci ocito cok ki Nam me Galilaya. Oito i wi got, ci obedo piny. 30 Lwak dano mapol gubino bote, kun gikelo lungolo, lugoro, lutowang, jo ma te lebgi oto, ki dong jo ma tye ki two mukene mapatpat. Gupyelogi piny ka tyen Yecu ci en ocangogi woko. 31 Pi meno, lwak gubedo ki ur madit i kare ma guneno jo ma te lebgi oto gucako lok, ki jo ma tye ki goro mapatpat gucang, ki lungolo gucako wot, ki lutowang gucako neno piny, ci gupako Lubanga pa Icrael.

32 Ento Yecu olwongo lupwo­nnyene ci owaccigi ni: “Kica tye ka maka i kom lwak, pien dong gubedo kany nino adek ma pe gucamo gin mo. Pe amito ni gudok ki kec, pien giromo wille woko i yo.” 33 Ento lupwonnyene guwacce ni: “Waromo nongo mugati ma romo pito lwak mapol kit man ki kwene ki i kabedo man ma tye kakene-ni?” 34 Ci Yecu owaccigi ni: “Wutye ki mugati adi?” Gugamo ni: “Abiro, ki rec matino mogo manok.” 35 I nge ciko lwak ni gubed piny, 36 en okwanyo mugati abiro-ni ki rec, ci i nge miyo pwoc, en oturogi, omiyo bot lupwonnyene, dok lupwonnyene gumiyo bot lwak. 37 Jo ducu gucamo guyeng, ci gucoko cam mudong opongo aduku abiro. 38 Jo ma gucamo cam meno onongo giromo co 4,000, ma pe kikwano iye mon ki lutino. 39 I ngeye, ma Yecu dong oketo lwak, en odonyo i yeya ci ocito i lobo me Magadan.

16 Ki kunnu, Luparicayo ki Lucadukayo* gubino bot Yecu, ci guteme kun gipenye ni onyut botgi lanyut mo ma oa ki i polo. 2 En ogamo lokgi ni: “Ka oo otyeno, wuwaco ni, ‘Piny bibedo maber pien dan polo nen makwar,’ 3 dok i odiko wuwaco ni, ‘Tin pinye bibedo marac dok kot bicwer, pien dan polo nen makwar ento obedo pol pol. Wungeyo poko kit ma piny bibedo kwede ki i neno dan polo, ento pe wutwero niang i kom lanyut me kare man. 4 Jo me yalwak man ma kitgi rac dok pe gitye lugen* bot Lubanga gibedo ka yenyo lanyut, ento pe kibimiyo botgi lanyut mo mapat ki lanyut pa Yona keken.” Ci en oa woko, owekogi gudong kenyu.

5 Lacen, lupwonnye pa Yecu gungolo loka nam ento wigi owil woko ki wot ki mugati. 6 Yecu owaco botgi ni: “Wubed ma wangwu twolo dok wugwokke ki tobi pa Luparicayo ki Lucadukayo.” 7 Pi meno, gucako lok i kingi kekengi ni: “Pe wawoto ki mugati mo.” 8 Ma Yecu ongeyo man, en openyogi ni: “Pingo wutye ka lok i kinwu ni pe wuwoto ki mugati mo, wun ma niyewu ­nok-ki? 9 Pud peya wuniang gin ma awacciwu-ni? Nyo wiwu pe po i kom kit ma mugati abic opito kwede co 5,000 ki wel adita ma cam mudong opongo? 10 Nyo i kom kit ma mugati abiro opito kwede co 4,000 ki wel aduku ma cam mudong opongo? 11 Dong pingo pe wuniang ni pe aloko kwedwu i kom mugati? Ento ni, wugwokke ki tobi pa Luparicayo ki Lucadukayo.” 12 Ci dong guniang ni en pe owaccigi ni myero gigwokke ki tobi me mugati, ento ki pwony pa Luparicayo ki Lucadukayo.

13 I kare ma Yecu oo i lobo Cecaria Pilipi, en openyo lupwonnyene ni: “Dano mono giwaco ni Wod pa dano obedo anga?” 14 Gugamo ni: “Jo mogo giwaco ni en Jon Labatija, mukene ni Elia, ki mukene ni en Jeremia nyo lanebi mo mapat.” 15 En owaccigi ni: “Wun kono, wuwaco ni an anga?” 16 Cimon Petero ogamo ni: “In aye Kricito, Wod pa Lubanga makwo.” 17 Ci Yecu owacce ni: “Itye ki yomcwiny Cimon wod pa Yona, pien pe dano* aye onyutti lok man, ento Wora ma tye i polo aye onyutti. 18 Dok bene awaco boti ni: In i Petero. Abigero kacokkena i kom pata got man, dok teko pa to* pe biloyone. 19 Abimiyo boti layab me Ker me polo, gin ma ibipungo i lobo bibedo gin ma dong kityeko pungone woko i polo, dok gin ma ibiyabo i lobo bibedo gin ma dong kityeko yabone woko i polo.” 20 Ci ociko lupwonnyene matek ni pe ­guwac bot ngat mo ni en aye Kricito.

21 Nicakke i kare meno, Yecu ocako tito bot lupwonnyene ni omyero ecit i Jerucalem dok eden can i cing ludongo ki lulamdog madito ki lupwony cik, dok ni omyero kineke, ci kicere woko i nino me adekke. 22 Pi meno, Petero otere cen ci ocako jukke, kun waco ni: “Bed ki kica i komi kekeni, Rwot; gin ma kit man pe bitimme i komi matwal.” 23 Ento en oloko ngeye bot Petero, ci owacce ni: “Dok i ngeya, Catan! Idoko ariya bota, pien tammi pe rwatte ki tam pa Lubanga, ento tam pa dano.”

24 Ci Yecu owaco bot lupwo­nnyene ni: “Ka ngat mo mito lubo kora, en myero kong okwerre kekene ci oting yatte* dok omedde ki lubo kora. 25 Pien ngat ma mito gwoko kwone birwenyone, ento ngat ma rwenyo kwone pira binongone. 26 Bikonyo ngat mo nining ka en onongo jami ducu ma i lobo ento orwenyo kwone woko? Nyo gin ango ma dano bimiyo me wilo kwone? 27 Pien Wod pa dano bibino i deyo pa Wonne, dok lumalaikane gibibino kacel kwede, ci en biculo ngat acel acel ma lubbe ki ticce. 28 Ada, awaco botwu ni, tye jo mogo ma gucung kany ma pe gibibilo to wang ma kong guneno Wod pa dano obino i Kerre.”

17 I nge nino abicel, Yecu okwanyo Petero, Yakobo ki ominne Jon, ci gucito ka kengi i wi got mo mabor. 2 Ki kunnu, kom Yecu olokke woko i nyimgi; wange ocako ryeny calo ceng, dok bongone odoko tar adada. 3 Ci nen! guneno Moses ki Elia ma gitye ka lok ki Yecu. 4 Petero owaco ki Yecu ni: “Rwot, ber mada me bedo kany. Ka imito, abiguro kema adek kany, acel piri, acel pi Moses ki dong acel pi Elia.” 5 Ma en pud tye ka lok, nen! pol matar oumogi woko, ci dwan mo owinnye ki i pol meno kun waco ni: “Man aye Woda me amara, ma cwinya yom i kome. Wuwinye.” 6 Ka lupwonnyene guwinyo lok meno, guryebbe piny dok lworo omakogi matek adada. 7 Yecu obino botgi, ogudogi, ci owaco ni: “Wua malo. Pe wubed ki lworo.” 8 I kare ma guilo wanggi malo, pe guneno ngat mo mukene mapat ki Yecu. 9 Ma gitye ka lor piny ki i wi got, Yecu ocikogi ni: “Pe wutit ginanyuta man bot ngat mo nio ka kicero Wod pa dano ki i kin jo muto.”

10 Ento lupwonnyene gupenye ni: “Dong pingo lupwony cik giwaco ni Elia aye myero okwong bino?” 11 En ogamo ni: “Elia bibino ada dok bidwoko jami ducu kakare. 12 Ento awaco botwu ni, Elia dong otyeko bino woko ento pe guniang i kome dok gutimo gin ma gimito i kome. I yo acel-lu bene, Wod pa dano bideno can i cinggi.” 13 Ci lupwo­nnye guniang ni en obedo ka lok i kom Jon Labatija.

14 Ma dong gubino cok ki lwak, laco mo obino bot Yecu, orumo conge piny i nyime ci owacce ni: 15 “Rwot kica omaki i kom woda, pien tye ki two alili dok kome lit adada. Kare ducu en bedo ka poto i mac ki dong i pii. 16 Akele bot lupwonnyeni, ento onongo pe gitwero cange.” 17 Yecu ogamo ni: “Wun yalwak ma pe wutye ki niye dok kitwu oballe woko, abibedo kwedwu pi kare ma rom mene? Abikanyo kitwu pi kare ma rom mene? Wukele bota kany.” 18 Ci Yecu ojuko cen meno, mumiyo cen-ni oa woko ki i kome, dok awobi-ni ocang woko i cawa meno cutcut. 19 Lacen, lupwonnye gubino bot Yecu i mung ci gupenye ni: “Pingo ryemo cen-ni oloyowa?” 20 En ogamo ni: “Pien niyewu nok. Ada awaco botwu ni, ka wutye ki niye ma rom ki nyig kodi karadali, wubiwaco ki got man ni, ‘A ki kany ikob kuca,’ ci bikobo, dok pe tye gin mo ma timone biloyowu.” 21* ⁠——

22 I kare ma gugure kacel i Galilaya, Yecu owaco botgi ni: “Kibiketo lok roro i kom Wod pa dano dok gibimiye i cing lumonene, 23 ci gibineke, ento i nino me adekke Lubanga bicere woko.” Man oweko lupwonnyene gukumo matek.

24 Ma dong guo i Kapernaum, co ma gijogo mucoro me ot pa Lubanga gubino bot Petero ci gupenye ni: “Lapwonywu pe culo mucoro me ot pa Lubanga?” 25 En ogamo ni: “Culo.” Ento ma Petero odonyo i ot, Yecu aye okwongo lok kwede kun penye ni: “Itamo ningo Cimon? Luker me lobo gijogo mucoro* ki cul mapatpat ki bot angagi? Gijogo ki bot lutinogi nyo ki bot jo mukene?” 26 Ma en ogamo ni: “Ki bot jo mukene,” Yecu owaco bote ni: “Ka tye kit meno, ci lutinogi pe culo mucoro. 27 Ento wek pe wabal cwinygi, cit i dog nam, ibol goli i pii, ci iyut rec ma okwongo moko, dok ka iyabo doge ibinongo iye nyig cente acel me ryal. Kwany cente meno ci imi botgi pira ki piri bene.”

18 I cawa meno, lupwonnye pa Yecu gubino bote ci gupenye ni: “Anga madit loyo i Ker me polo?” 2 Pi meno, en olwongo latin mo bote, ci oweko ocung i kingi 3 dok owaco ni: “Ada awaco botwu ni, ka pe wulokke wudoko calo lutino matino, pe wubidonyo i Ker me polo. 4 Dong ngat ma bimwolle kene calo latin man aye ngat madit loyo i Ker me polo; 5 dok ngat ma jolo latin matidi calo man pi nyinga, nongo ojolo an bene. 6 Ento dano ma keto ariya i nyim ngat mo acel ki i kin jo matino ma gitye ki niye i koma, bibedo ber loyo ka kitweyo kidi rego madit* i ngute ci kibole kwede i nam.

7 “Can i wi jo me lobo man pien giketo ariya i nyim jo mukene! Ngene kene ni, ariya bibedo tye, ento can i wi dano ma bikelo ariya! 8 Dong ka ce cingi nyo tyeni aye weko ipoto i bal, tong ingun ci ibol woko. Pien bedo ber ka inongo kwo ma cingi nyo tyeni acel pe, loyo ka kiboli i mac ma pe to ma itye ki cingi aryo nyo tyeni aryo ducu. 9 Dok ka ce wangi aye weko ipoto i bal, kol ci ibol woko. Pien bedo ber ka inongo kwo ma wangi tungcel pe, loyo ka kiboli i mac me Geena* ma itye ki wangi aryo ducu. 10 Wunen ni pe wucayo ngat mo acel ki i kin jo magi matino-ni, pien awacciwu ni, lumalaikagi ma gitye i polo gineno wang Wora ma tye i polo kare ducu. 11* ⁠——

12 “Wutamo ningo? Ka ngat mo tye ki romi 100 ci acel mo orweny woko, tika en pe biweko romi 99 mudong-ngi i wi got ci cito ka yenyo acel ma orweny-nyi? 13 Dok awacciwu ni, ka en onongo romo meno, en bibedo ki yomcwiny madit pire loyo pi romi 99 ma pe gurweny-nyi. 14 I yo acel-lu bene, Wora* ma tye i polo pe mito ni kadi ngat acel i kin jo magi matino-ni orweny woko.

15 “Dong, ka omeru otimo bal i komi, cit inyutte balle* ma nongo wutye wun aryo keken. Ka en owinyo lokki, nongo ikonyo omeru. 16 Ento ka en okwero winyo lokki, cit ki ngat acel nyo jo aryo mukene, wek lok ma caden* aryo nyo adek gimiyo omok lok ducu. 17 Dok ka en okwero winyo lokgi bene, ter lokke bot kacokke. Ento ka ce okwero winyo lok pa kacokke, ci omyero itere macalo larok ki lajog mucoro.

18 Ada awacciwu ni, gin mo keken ma wubitweyo i lobo bibedo gin ma dong kityeko tweyone woko i polo, dok gin mo keken ma wubigonyo i lobo bibedo gin ma dong kityeko gonyone woko i polo. 19 Ada awaco botwu ni, ka ki i lobo kany, jo aryo i kinwu guye me lega pi gin mo ma pire tek, ci Wora ma i polo bitimone pigi. 20 Pien ka ma jo aryo nyo adek gugure iye i nyinga, nongo an bene atye i kingi.”

21 Lacen Petero obino bote ci openye ni: “Rwot, tyen adi ma myero atim kica ki omera pi bal ma en timo i koma? Tyen ma romo abiro?” 22 Yecu owacce ni: “Awaco boti ni, pe tyen abiro keken, ento tyen 77.

23 “Meno aye oweko kiromo poro Ker me polo ki kabaka mo ma onongo mito ni opiine gucul banyane ma gitye kwede. 24 Ma dong ocako gamo banyane, kikelo bote laco mo ma tye ki banyane ma romo talanto 10,000.* 25 Ento kit macalo en onongo pe twero culo banya meno, kabaka ociko ni kicat en, dakone, lutinone ki dong jamine ducu wek kicul ki banya meno. 26 Cutcut, ­opii-ni orumo conge piny i nyim kabaka dok obako doge ni: ‘Kong idi cwinyi i koma, ci abiculo banyani ducu.’ 27 Pi meno, kica omako kabaka i kom opii meno ci oweke dok ongolo banyane woko. 28 Ento ma en okato woko, onongo opii lawote ma tye ki banyane ma romo denari 100, ci omake ocako deyone woko, kun waco ni, ‘Cul banyana ducu.’ 29 Pi meno, opii lawote-ni orumo conge piny i nyime ci ocako bako doge ni, ‘Kong idi cwinyi i koma, ci abiculo banyani ducu.’ 30 Ento en okwero woko, dok oweko kibolo lawote i buc nio ka oculo banyane ducu. 31 I kare ma opii mukene-ni guneno gin mutimme, cwinygi ocwer matek, ci gucito gutito bot laditgi jami ducu mutimme. 32 Ci laditgi olwongo opii-ni dok owacce ni: ‘In opii ma kite rac, angolo banya ma itye kwede ducu i kare ma ibako doggi bota. 33 Onongo pe itwero timo kica ki opii lawoti kit ma an atimmi kwede kica?’ 34 Pi meno, kiniga omako laditte matek, ci oweko kitweye i buc nio ka oculo banyane ducu. 35 Wora ma tye i polo bene biterowu kit meno ka ce ngat acel acel i kinwu pe timo kica ki ominne ki cwinye ducu.”

19 I kare ma Yecu otyeko loko lok magi, en oa woko ki i Galilaya ci ocito i wang lobo me Judaya i loka Kulu Jordan. 2 Dok lwak dano mapol gulubo kore, ci en ocangogi ki kunnu.

3 Luparicayo gubino bote ki miti me temme ci gupenye ni: “Cik ye ni laco oket nyomme pi tyen lok mo keken?” 4 Yecu ogamo lokgi kun waco ni: “Wun pe wukwano ni i acakki piny Lubanga ocweyo laco ki dako? 5 Ci owaco ni: ‘Pi tyen lok man, laco biweko wonne ki minne ci moko i kom dakone, dok gin aryo-ni gidoko kom acel.’ 6 Kit meno, pe dong gibedo kom aryo ento kom acel. Dong gin ma Lubanga oribo kacel, ngat mo pe opok kingi.” 7 Luparicayo guwaco bote ni: “Dong pingo Moses ociko ni omyero laco omi waraga me keto nyom bot dakone ci oryeme woko?” 8 Yecu ogamo ni: “Pi nwang cwinywu, oweko Moses oye ni wutwero keto kenywu, ento onongo pe tye kit meno i acakki piny. 9 Dong awaco botwu ni laco mo keken ma oketo nyomme, ma kun dakone pe otimo tim tarwang,* ci onyomo dako mukene, nongo otimo abor.”*

10 Lupwonnyene guwaco bote ni: “Ka meno aye gin ma timme i kin laco ki dakone, ci bedo ber pe me nyomme.” 11 En owaco botgi ni: “Pe dano ducu giromo bedo kit meno, ento jo ma gitye ki mot man keken. 12 Jo mukene pe ginyomme pien nongo kinywalogi ma gin lulur, mukene pien dano aye okologi, ento tye jo mogo ma pe ginyomme pi Ker me polo. Ngat ma twero bedo labongo nyomme, wek en obed kit meno.”

13 Ci kikelo lutino bote wek oket cinge i komgi dok oleg pigi, ento lupwonnyene gujukogi woko. 14 Pi meno, Yecu owaco ni: “Wuwek lutino gubedi, dok pe wujukgi ki bino bota, pien Ker me polo tye pi jo macalo gin.” 15 Ci en oketo cinge i komgi, ka dong oa woko ki kunnu.

16 Ci nen! dano mo obino bote ci openye ni: “Lapwony, gin ango maber ma myero atim wek anong kwo ma pe tum?” 17 Yecu owacce ni: “Pingo ipenya pi gin maber? Ngat acel keken aye ber. Ento ka imito nongo kwo, medde ki lubo cik.” 18 Laco-ni openye ni: “Cik mene?” Yecu owaco ni: “Omyero pe ineki, pe itim abor, pe ikwal kwo, pe ibed caden me goba, 19 wor babani ki mamani, dok omyero imar lawoti kit ma imarre kwede kekeni.” 20 Laco-ni owacce ni: “Atye ka lubo cik magi ducu, gin ango mukene ma dok mitte ni atim?” 21 Yecu owacce ni: “Ka imito bedo labongo roc* mo, cit icat jamini dok imi centene bot lucan, ci ibibedo ki lonyo i polo; ka dong ibin ibed lalub kora.” 22 I kare ma laco-ni owinyo lok meno, en oa woko ki cwercwiny, pien onongo tye ki jami mapol. 23 I nge meno, Yecu owaco bot lupwo­nnyene ni: “Ada awaco botwu ni, bibedo tek bot lalonyo me donyo i Ker me polo. 24 Dok awaco botwu ni, yot ki kinaga me kato ki i wang libira loyo ki lalonyo me donyo i Ker pa Lubanga.”

25 Ma lupwonnyene guwinyo lok meno, gubedo ki ur matek kun giwaco ni: “Dong anga ma kitwero larone?” 26 Yecu ociko wange atir botgi ci owaco ni: “Gin man pe twerre ki bot dano, ento ki bot Lubanga jami ducu twerre.”

27 Petero ogamo lokke kun waco ni: “Nen, waweko jamiwa ducu ci walubo kori, dong gin ango ma wabinongone?” 28 Yecu owaco botgi ni: “Ada awaco botwu ni, i kare ma kibiloko jami ducu doko nyen, ma nongo Wod pa dano* obedo i wi komkerre me deyo, wun ma wulubo kora bene wubibedo i wi komker 12, ka ngolo kop i kom kaka 12 me Icrael. 29 Dok ngat mo keken ma oweko odine nyo omegine nyo lumegine nyo wonne nyo minne nyo lutinone nyo potine pi nyinga, binongo jami makato magi tyen miya mapol dok binongo kwo ma pe tum.

30 “Ento jo mapol ma gubedo me wi atii, gibidong cen, ki ma gudong cen, gibibedo jo me wi atii.

20 Yecu omedde ni: “Kitwero poro Ker me polo ki won poto mo ma ocito odiko con ka yenyo lutic me tic i poto olokke. 2 I kare ma en omoko ki lutic ni ebiculogi denari acel pi tic me nino acel, en ocwalogi i poto olokke. 3 Ma en dok ocito i cuk i kine ka cawa adek me odiko, onongo jo mukene ma pe gitye ki tic; 4 ci owaccigi ni, ‘Wun bene wucit i poto olokka, dok abiculowu wel ma opore.’ 5 Kit meno, gucito ka tic. En dok odok cen i cuk i kine ka cawa abicel ki dok cawa abongwen me dyeceng, ci olwongo lutic mukene. 6 Me agikkine, en ocito i cuk i kine ka cawa apar wiye acel, onongo jo mukene gucung kunnu, ci owaccigi ni, ‘Pingo wucung kany labongo tic mo nio wa otyeno?’ 7 Gin gugamo ni, ‘Pien ngat mo pe olwongowa ka tic.’ En owaco botgi ni, ‘Wun bene wucit i poto olokka.’

8 “I otyeno, won poto olok-ki owaco bot lagwok jamine ni, ‘Lwong lutic ci iculgi, cak ki lutic ma gubino me agikki, ci igik ki lutic ma gukwongo bino.’ 9 I kare ma jo ma gucako tic cawa apar wiye acel gubino, kimiyo bot ngat acel acel i kingi denari acel. 10 Dong i kare ma jo ma gucako tic odiko con gubino, gutamo ni kibiculogi madit kato denari acel, ento gin bene kiculogi denari acel acel. 11 I nge gamo centegi, gucako nguru i kom won poto 12 kun guwacci, ‘Co magi gutiyo pi cawa acel keken, ento iculogi marom ki wan ma watiyo dyeceng benebene i wi ceng malyet!’ 13 Ento en owaco bot ngat acel i kingi ni, ‘Larema, an pe ateri marac. Pe wawinnye pi denari acel? 14 Gam centeni ci icit giri. Amito bene culo lutic ma gubino lacen-ni wel marom ki ma aculi kwede. 15 Pe atye ki twero me timo gin ma cwinya mito ki jamina? Nyo gwok nyeko* tye ka maki pi ber* kita?’ 16 I yo ­acel-lu bene, jo ma gudong cen gibibedo jo me wi atii, ki jo me wi atii gibidong cen.”

17 I kare ma gitye ka ito cere me cito i Jerucalem, Yecu otero lupwonnyene 12 ka ma dano pe iye. Ma gitye i yo, en owaccigi ni: 18 “Nen! Watye ka ito cere me cito i Jerucalem, dok kibimiyo Wod pa dano i cing lulamdog madito ki lupwony cik. Gibingolo kop me to i wiye 19 ci gibimiye i cing lurok wek kingale, kipwode dok kigure i kom yat. Ento i nino me adekke kibicere woko.”

20 Lacen, dako pa Jebedayo obino kacel ki awobene bot Yecu, ci orumo conge piny i nyim Yecu. Onongo mito penyo pi gin mo ki bote. 21 Yecu owacce ni: “Imito gin ango?” En ogamo ni: “Alegi ni iwek lutinona aryo-ni gubed kacel kwedi i Kerri. Ngat acel obed tung cingi ma lacuc ki acel obed tung lacam.” 22 Yecu ogamo ni: “Pe wungeyo gin ma wutye ka penyo pire-ni. Tika wutwero mato ki kikopo ma acok mato kwede-ni?” Gugamo ni: “Watwero.” 23 En owaccigi ni: “Wubimato ki kikopona gire, ento pe an aye amoko anga ma myero obed tung cinga ma lacuc ki ma lacam, ento kabedo meno tye pi jo ma Wora dong otyeko yubone pigi.”

24 Ka lupwonnye apar mukene-ni guwinyo lok man, kiniga omakogi matek i kom omege aryo-ni. 25 Ento Yecu olwongo gin ducu bote ci owaco ni: “Wungeyo ni luloc me lobo-ni gitye ki twero i kom lwakgi dok luditogi giloyogi ki tek. 26 Pe myero obed kit meno i kinwu; ento ngat ma mito bedo ladit i kinwu myero obed laticwu, 27 ki ngat ma mito bedo mukwongo i kinwu myero obed opiiwu. 28 Kit meno bene, Wod pa dano obino, pe ni kiti pire, ento wek en aye eti pi jo mukene dok emi ­kwone macalo ginkok* pi jo mapol.”

29 Ma dong gitye ka a ki i Jeriko, lwak dano mapol gulubo kore. 30 Ci nen! lutowang aryo ma gubedo i dog yo guwinyo ni Yecu tye ka kato ci gudange ni: “Rwot, Wod pa Daudi, kica omaki i komwa ba!” 31 Ento lwak gujukogi kun giwaccigi ni guling mot; ento gumedde ameda ki dange ki dwan malongo ni: “Rwot, Wod pa Daudi, kica omaki i komwa ba!” 32 Pi meno Yecu ocung, olwongogi dok openyogi ni: “Wumito ni atim gin ango piwu?” 33 Guwacce ni: “Rwot, wek wangwa oyabbe.” 34 Pi meno, kica omako Yecu i komgi, dok ogudo wanggi. Cutcut gucako neno piny, ci gulubo kore.

21 I kare ma gicok o i Jerucalem, gucung cok ki Betepage i kor Got Jeituni, ci Yecu ooro lupwonnyene aryo, 2 kun waccigi ni: “Wucit i caro ma tye i nyimwu-ni, ci wubinongo kana ma kitweyo kunnu ma tye ki latinne. Wugonygi ci wukelgi bota. 3 Ka ngat mo openyowu, wuwacce ni, ‘Rwot aye mitogi.’ Ci en biye cutcut ni wukelgi.”

4 Man otimme me cobo lok ma Lubanga otito kun tiyo ki lanebine, ni: 5 “Wac ki nya pa Cion ni: ‘Nen! Kabakani tye ka bino boti, en mwol dok obedo i wi kana, ada, obedo i wi latin kana.’”

6 Pi meno, lupwonnyene gucito gutimo kit ma Yecu ocikogi kwede kikome. 7 Gukelo kana ki latinne, dok gupeto bongigi i komgi, ci Yecu obedo i wiye. 8 Jo mapol i kin lwak gupeto bongigi i dye yo, dok mukene bene gutongo jang yadi gupeto i dye yo. 9 Ci lwak ma gutelo nyime ki ma gitye ka lubo kore gubedo ka dangnge ni: “Lubanga, walegi ni ilar* Wod pa Daudi! Gum obed i kom ngat ma bino i nying Jehovah! Walegi ni ilare, in ma itye malo i polo!”

10 I kare ma en odonyo i Jerucalem, jo ducu ma i boma man gucako woo kun giwaco ni: “Man anga?” 11 Lwak gubedo ka waco ni: “Man aye lanebi Yecu, ma a ki i Najaret me Galilaya!”

12 Yecu odonyo i ot pa Lubanga ci oryemo jo ducu ma gitye ka cat ki wil kunnu, dok oreto meja pa lulok cente ki kom pa lucat amam. 13 Ci owaco botgi ni: “Yam kicoyo ni, ‘Kibilwongo oda ni ot me lega,’ ento wun wuloko odoko boro pa luyak.” 14 Lutowang ki lungolo bene gubino bote i ot pa Lubanga, ci en ocangogi woko.

15 Kiniga omako lulamdog madito ki lupwony cik i kare ma guneno jami me aura ma en otimo kacel ki lutino awobe ma gitye ka dangnge i ot pa Lubanga ni: “Lubanga, walegi ni ilar Wod pa Daudi!” 16 Pi meno, gupenye ni: “Tika iwinyo gin ma lutino-ni gitye ka wacone?” Yecu owaccigi ni: “Awinyo. Wun pe wukwano Ginacoya ma waco ni, ‘Iweko lutino matino ki lutino ma pud dot giwero wer me paki’?” 17 Ma dong owekogi, oa woko ki i Jerucalem ocito i Betania ci obuto kunnu.

18 I kare ma en tye ka dwogo cen i boma odiko con, kec ocako neke. 19 En oneno yat oduro mo i dog yo dok ongak i tere, ci pe onongo nyige mo ento onongo pote keken, ci owaco ki ­yat-ti ni: “Pe dok ibinyak matwal.” Ci yat oduro meno otwo woko cutcut. 20 Ma lupwonnyene guneno, gubedo ki ur madit ci guwaco ni: “Yat oduro-ni otwo woko cutcut kit man nining?” 21 Yecu ogamo lokgi kun waco ni: “Ada awaco botwu ni, ka wutye ki niye dok pe wukalo akala, pe wubitimo gin ma atimo i kom yat oduro-ni keken, ento kadi ka wuwaco ki got man ni, ‘Tingnge woko icit ipot i nam,’ bitimme bene kit meno. 22 Dok jami ducu ma wulego pire, wubinongo ka wutye ki niye.”

23 I kare ma en odonyo i ot pa Lubanga, lulamdog madito ki ludongo pa lwak gubino bote ma en tye ka pwony ci gupenye ni: “Itimo jami magi ducu ki twero pa anga? Dok anga ma omiyo boti twero man?” 24 Yecu ogamo lokgi kun waco ni: “An bene abipenyowu lapeny acel. Ka wugamo lapenya, ci abiwacciwu anga ma omiya twero me timo jami magi: 25 Jon onongo twero me batija dano ki kwene? Ki i polo nyo ki bot dano?” Ci gucako lok i kingi kekengi ni: “Ka wawaco ni, ‘Ki i polo,’ en biwacciwa ni, ‘Dong pingo pe wuye en?’ 26 Ento ka wawaco ni, ‘Ki bot dano,’ ci lwak bitimo gin ango i komwa? Pien gin ducu giye ni Jon onongo obedo lanebi.” 27 Pi meno gugamo lok pa Yecu ni: “Pe wangeyo.” Mumiyo Yecu bene ogamo ni: “An bene pe abiwacciwu ngat ma omiya twero me timo jami magi.

28 “Wutamo ningo? Laco mo onongo tye ki lutino aryo. En ocito bot latin mukwongo ci owacce ni, ‘Latinna, cit iti i poto olok tin.’ 29 Latin meno ogamme ni, ‘Pe abicito,’ ento lacen oloko tamme ci ocito ka tic. 30 Dok ocito bot latin me aryone ci owacce lok acel-li. En owaco bot wonne ni, ‘Abicito,’ ento pe ocito. 31 I kin lutino aryo-ni, anga ma otimo gin ma wonne mito?” Gugamo ni: “Latin mukwongo.” Yecu owaccigi ni: “Ada awaco botwu ni, lujog mucoro ki mon ma malaya gibikwongo nyimwu me donyo i Ker pa Lubanga. 32 Pien Jon yam obino botwu me nyutiwu yo me kit ma atir, ento pe wuye en. Ki tungcel, lujog mucoro ki mon ma malaya guye en, dok kadi bed wuneno magi ducu, pe wuloko tamwu wek wuye en.

33 “Wuwiny dok lapor mukene: Onongo yam tye won poto mo ma opito olok i potone, orumo woko ki cel, ci okwinyo bur me biyo pig olok dok ogero lubele i iye. I nge meno, en omiyo lupur gupango ci en ocito woko i lobo mukene. 34 I kare ma olok ocek, en ooro luticce bot lupur ka gamo nyig olok ma myero kimi bote. 35 Ento lupur gumako luticce, gugoyo acel, guneko acel ki mukene gucelo ki got. 36 En dok ocwalo lutic mukene, mapol loyo mukwongo, ento gutimo gin acel-li i komgi. 37 Me agikkine en ocwalo wode kun waco ni, ‘Gibiworo woda.’ 38 Ma lupur guneno wode, guloko i kingi kekengi ni, ‘Man aye lale jami. Wubin, waneke wek wagam ginaleyane woko!’ 39 Pi meno gumake gubole i nge cel, ci guneke woko. 40 Dong ka won poto obino, gin ango ma en bitimo i kom lupur magi?” 41 Lulamdog madito ki ludongo pa lwak guwacce ni: “Kit macalo gubedo jo maraco-ni, en binekogi i yo marac adada ci bimiyo poto olok bot lupur mukene, ma gibimiye olok ka karene oromo.”

42 Yecu owaco botgi ni: “Wun pe wukwano Ginacoya ma waco ni, ‘Got ma lugedo gukwero-ni aye dong odoko got madit me twok ot?* Got man oa ki bot Jehovah dok obedo gin me aura i wangwa.’ 43 Man aye oweko awaco botwu ni, Ker pa Lubanga kibikwanyone woko ki botwu ci kibimiyone bot rok ma tye ka nyako nyig mabeco.* 44 Ngat ma opoto i wi got man bitur ngidde woko. Dok ka got man opoto i wi ngat mo, binyoto ngat meno woko.”

45 Ma lulamdog madito ki Luparicayo guwinyo lapor ma en omiyo, guniang ni en tye ka lok i komgi. 46 Ento kadi bed onongo gimito make, gubedo ki lworo i kom lwak, pien lwak onongo giye ni en lanebi.

22 Yecu dok otiyo ki lapor me lok kwedgi, kun waco ni: 2 “Ker me polo kiromo porone ki kabaka mo ma oyubo karama me nyom pa wode. 3 Dok ooro luticce me cito ka lwongo jo ma gunongo lwongo pi karama me nyom man, ento onongo pe gimito bino. 4 En dok ooro lutic mukene kun waco ni, ‘Wuwac bot jo ma kilwongogi ni: “Nen! atyeko yubo cam ducu, aneko twonina ki lee ma gucwene dok jami ducu dong tye atera. Wubin i karama me nyom.”’ 5 Ento pe guketo cwinygi i lok meno dok gucito ka timo jamigi. Jo mogo gucito i potigi, mukene gucito i dog biacaragi; 6 dok mukene gumako ­luticce, gugoyogi, ci gunekogi woko.

7 “Pi meno, kiniga omako kabaka matek ci ocwalo lumonnye oweko guneko lunek magi dok guwango bomagi woko. 8 Ci owaco bot luticce ni: “Karama me nyom dong kityeko yubone woko ento jo ma kilwongogi pe gupore me bedo iye. 9 Pi meno, wucit i gudi mapatpat ma tye i nge boma ci wulwong ngat mo keken ma wunongo wek obin i karama me nyom.” 10 Dong lutic magi gucito i gudi ci gulwongo jo ducu ma gunongogi, jo maraco wa ki jo mabeco; dok ot me karama opong woko ki wele.

11 I kare ma kabaka odonyo ka neno wele, en oneno laco mo ma pe oruko bongo nyom. 12 Pi meno, en owaco ki laco man ni, ‘Larema, idonyo kany nining ma pe iruko bongo nyom?’ Ento en pe ogamo gin mo. 13 Ci kabaka owaco bot luticce ni, ‘Wutwe cinge ki tyene ducu dok wubole woko i colpiny. Meno aye ka ma en bikok kun kayo iye lake.’

14 “Pien jo ma kilwongogi gipol, ento jo ma kiyerogi nok.”

15 I nge meno, Luparicayo gucito gupiro lok kacel wek gimak bal i lok pa Yecu. 16 Pi meno, gucwalo lupwonnyegi kacel ki jo ma gicwako Kerode bot Yecu kun giwaco ni: “Lapwony, wangeyo ni iloko lok ada dok ipwonyo yo pa Lubanga ki ada, pe bene iyenyo cwak ki bot dano, pien pe iketo cwinyi i kom kit ma dano nen kwede ki woko. 17 Itamo ningo? Cik ye* ni kicul mucoro* bot Cecar nyo pe?” 18 Ento Yecu oniang ni gitye ki tam marac, pi meno en owaco botgi ni: “Wun lugoba, pingo wutye ka tema? 19 Kong wunyutta nyig cente ma kiculo ki mucoro-ni.” Ci gukelo bote denari acel. 20 En openyogi ni: “Cal ki nying ma kigoro i kome-ni pa anga?” 21 Gugamo ni: “Pa Cecar.” Ci en owaco botgi ni: “Pi meno dong, wudwok jami pa Cecar bot Cecar, ento jami pa Lubanga wudwok bot Lubanga.” 22 I kare ma guwinyo lok man, gubedo ki ur madit, ci guweke dok gucito woko.

23 I nino meno, Lucadukayo gubino bot Yecu. Gin aye jo ma pe giye i kom nicer. Gupenye ni: 24 “Lapwony, Moses yam owaco ni: ‘Ka laco mo oto labongo latin, ominne omyero olak dakone ci onywal kwede lutino pi ominne ma oto-ni.’ 25 Yam onongo tye co abiro ma gubedo omego. Laco mukwongo onyomo ci oto woko ma pe onywalo latin, dok ominne olako dakone. 26 Gin ­acel-li bene otimme i kom omingi me aryo ki me adek nio kwede wa i kom me abirone. 27 I agikkine, dako-ni bene oto woko. 28 Dong i kare me nicer, dako meno bibedo pa anga i kin co abiro-ni? Pien co magi ducu gubedo kwede.”

29 Yecu ogamo lokgi kun waco ni: “Tamwu pe tye kakare, pien pe wungeyo Ginacoya nyo teko pa Lubanga. 30 I kare me nicer, dano pe gubinyomo, dok pe kibinyomogi ento gibibedo calo lumalaika i polo. 31 Ma lubbe ki nicer pa jo muto, wun pe wukwano lok ma Lubanga otito botwu, ni: 32 ‘An Lubanga pa Abraim ki Lubanga pa Icaka ki Lubanga pa Yakobo’? En pe Lubanga pa jo muto ento pa jo makwo.” 33 I kare ma lwak guwinyo lok meno, gubedo ki ur matek i kom kit ma en pwonyo kwede.

34 Ka Luparicayo guwinyo ni Yecu otwoyo dog Lucadukayo woko, gucokke kacel ci gubino bote. 35 Dok ngat acel i kingi, ma ngeyo Cik maber, oteme kun penye ni: 36 “Lapwony, cik mene ma pire tek loyo ki i kin Cik ducu?” 37 En owacce ni: “Omyero imar Jehovah Lubangani ki cwinyi ducu, ki kwoni ducu, dok ki tammi ducu.’ 38 Man aye cik mukwongo dok ma pire tek loyo. 39 Me aryone, ma cal ki meno en ene: ‘Omyero imar lawoti kit ma imarre kwede kekeni.’ 40 Cik ducu, kacel ki Coc pa Lunebi ducu jenge i kom cik aryo magi.”

41 Ma onongo Luparicayo pud gucokke kacel, Yecu openyogi ni: 42 “Wutamo ningo i kom Kricito? En wod pa anga?” Gin gugamo ni: “Wod pa Daudi.” 43 En openyogi ni: “Ci dong pingo cwiny maleng omiyo Daudi olwo­nge ni Rwot, i kare ma en owaco ni, 44 ‘Jehovah owaco bot Rwoda ni: “Bed tung cinga ma lacuc nio ka aketo lumoneni piny i te tyeni”’? 45 Ka dong Daudi lwo­nge ni Rwot, ci en dok twero bedo wode nining?” 46 Ngat mo onongo dong pe twero gamo doge, dok cakke i nino meno, pe tye ngat mo ma obedo ki tekcwiny me penye ki lapeny mo keken.

23 I nge meno, Yecu oloko bot lwak kacel ki lupwonnyene kun waco ni: 2 “Lupwony cik ki Luparicayo gukette kengi me bedo i wi kom pa Moses. 3 Pi meno, wutim jami ducu ma giwacciwu, ento pe wutim gin ma gitimo, pien giloko aloka keken, ento pe gitimo gin ma giloko. 4 Gitweyo yec mapek ci giketo i wi gwok jo mukene, ento gin kikomgi pe giye gudone kadi ki nyig cinggi acel. 5 Jami ducu ma gitimo, gitimo wek dano onengi, me labolle, giyaro pulakterigi* bedo malac dok gimedo dog bongogi bedo mabor. 6 Gimaro kabedo me deyo loyo ka gitye i cam me karama ki kom ma tye anyim* i ot cokke pa Lujudaya. 7 Gimito ni dano omotgi wa i cuk dok kilwonggi ni Rabbi.* 8 Ento wun, pe myero kilwongwu ni Rabbi, pien Lapwonywu tye acel, dok wun ducu wubedo utmege. 9 Dok bene, pe myero wulwong ngat mo i lobo-ni ni wonwu, pien Wonwu tye acel, en aye Ngat ma tye i polo. 10 Omyero bene pe kilwongwu ni lutela, pien Latelawu tye acel, ma en aye Kricito. 11 Ento ngat madit loyo i kinwu myero obed laticwu. 12 Pien ngat ma kette malo kene, kibidwokke piny, dok ngat ma mwolle kene, kibikete malo.

13 “Can i wi wun lupwony cik ki Luparicayo, wun lugoba! pien wuloro doggola me Ker me polo woko bot dano; wun kikomwu pe wudonyo iye, dok bene wugengo jo ma gimito donyo. 14* ⁠——

15 “Can i wi wun lupwony cik ki Luparicayo, wun lugoba! pien wuwoto wot maboco kun wungolo nam dok wuwoto wa i wi tera wek wulok dano acel odok i diniwu, dok ka en olokke, wuweko en doko latin me Geena* ma balle kato megwu tyen aryo.

16 “Can i wiwu, wun lutowang ma wupeyo lutowang luwotwu, pien wuwaco ni, ‘Ka ngat mo okwongnge i nying ot pa Lubanga, kwong meno konnye pe; ento ka ngat mo okwongo kwong i nying jabu ma i ot pa Lubanga, ci en myero ocob kwong meno.’ 17 Wun lutowang ma luming! Gin ango ma pire tek loyo, jabu nyo ot pa Lubanga ma olonyo jabu meno? 18 Dok wuwaco bene ni, ‘Ka ngat mo okwong­nge i nying keno tyer, kwong meno konnye pe; ento ka ngat mo okwongo kwong i nying mot ma i wi keno tyer, ci en myero ocob kwong meno.’ 19 Wun lutowang! Gin ango ma pire tek loyo, mot nyo keno tyer ma olonyo mot meno? 20 Pi meno, ngat ma kwongo kwong i nying keno tyer nongo tye ka kwongnge i nying keno tyer ki jami ducu ma i wiye. 21 Dok ngat ma kwongo kwong i nying ot pa Lubanga nongo tye ka kwongnge i nying ot pa Lubanga ki Ngat ma bedo iye. 22 Dok bene ngat ma kwongo kwong i nying polo nongo tye ka kwong­nge i nying komker pa Lubanga kacel ki Ngat ma bedo i wiye.

23 “Can i wi wun lupwony cik ki Luparicayo, wun lugoba! pien wumiyo dul acel me apar me mint ki dil ki dong kumin,* ento wuweko lok ma pigi tego me Cik woko, calo ngolo kop atir, kica ki dong gwoko genne. Jami mukwongo-ni myero wutimgi, ento pe myero wuwek timo jami ma pigi tego-ni bene. 24 Wun lutowang ma wupeyo lutowang luwotwu, wuliyo ober ma tye i ginamatawu ento wumwonyo kinaga ma tye iye woko!

25 “Can i wi wun lupwony cik ki Luparicayo, wun lugoba! pien wutye calo kikopo ki atabo ma kilwoko ngegi maleng ento igi opong ki cilo. Cwinywu opong ki woro* kacel ki miti ma pe jukke. 26 In Laparicayo ma wangi oto, kong ikwong lwoko i kikopo ki i atabo, wek ngeye bene obed leng.

27 “Can i wi wun lupwony cik ki Luparicayo, wun lugoba! pien wucal ki wi lyel ma kipuyo matar dok nen mamwonya ki woko ento ki i iye opong ki cogo pa jo muto ki jami ducu mutop. 28 I yo acel-lu bene, wunen calo jo ma kitgi atir ki bot dano, ento ki i iwu wupong ki goba ki tim maraco keken.

29 “Can i wi wun lupwony cik ki Luparicayo, wun lugoba! pien wuyubo lyelli pa lunebi dok wudeyo lyelli pa jo ma kitgi atir, 30 kun wuwaco ni, ‘Kono onongo yam wabedo kwo i kare pa kwariwa, onongo pe wabinywako kwedgi i neko lunebi.’ 31 Pi meno, wutye ka moko caden i komwu kekenwu ni wun lutino pa jo ma guneko lunebi. 32 Dong, wutyek tic ma kwariwu gucako.

33 “Wun twol, lutino uyu, wutamo ni wubibwot ki i ngolo kop me Geena? 34 Pi tyen lok meno, atye ka cwalo botwu lunebi ki luryeko ki dong lupwonye.* Wubineko jo mogo i kingi ci wugurogi i kom yat, ki mukene wubigoyogi i ot cokkewu dok wubiunogi i boma ki boma. 35 Man bimiyo alii me remo pa jo ma kitgi atir ducu ma kinekogi i lobo bedo i wiwu, cakke ki i kom remo pa Abel ma onongo kite atir-ri, me o kwede wa i kom remo pa Jekaria wod pa Barakia ma wuneko i kin kabedo maleng ki keno tyer. 36 Ada awaco botwu ni, yalwak man binongo pwod pi jami magi ducu.

37 “Jerucalem, Jerucalem, in ma ineko lunebi dok icelo jo ma kiorogi boti! Tyen mapol atute me coko lutinoni kacel kit ma min gweno coko kwede lutinone i te bwome! Ento onongo pe imito. 38 Nen! Kityeko weko otwu botwu liyak. 39 Pien awaco botwu ni, pe dong wubinena nicakke tin nio wa i nino ma wubiwaco ni, ‘Gum obed i kom ngat ma bino i nying Jehovah!’”

24 I kare ma dong Yecu tye ka a ki i ot pa Lubanga, lupwonnyene gubino bote me nyutte gedo me ot pa Lubanga. 2 Yecu odokkigi iye ni: “Wuneno jami magi ducu? Ada awaco botwu ni, pe kibiweko got mo kany dong ma ododde i wi lawote ma pe kibicorone piny.”

3 I kare ma en obedo piny i wi Got Jeituni, lupwonnyene gubino bote i mung ci gupenye ni: “Tit botwa, jami magi bitimme awene, dok gin ango ma binyuto kare ma ibibedo tye* ki dong kare me agikki me lobo man?”*

4 Yecu ogamo lokgi kun waco ni: “Wugwokke wek dano mo pe obwolwu, 5 pien jo mapol gibibino i nyinga kun giwaco ni, ‘An aye Kricito,’ ci gibibwolo jo mapol. 6 Wubiwinyo pi lweny ma tye ka timme ka macok ki ka maboco. Wugwokke wek pe wubed ki lworo, pien jami magi myero kong otimme, ento meno nongo pud pe agikki piny.

7 “Pien rok bilweny ki rok wadigi dok ker bilweny ki ker wadigi, ki kec bipoto dok oyengyeng biyengo piny i kabedo mapatpat. 8 Jami magi ducu obedo acakki me te can* ma bipoto.

9 “I kare meno, dano gibiunowu, gibinekowu dok jo me rok ducu gibikwerowu pi nyinga. 10 Medo i kom meno, niye pa jo mapol bikwe woko, gibiketo lok roro i kom luwotgi dok gibidagge i kingi kekengi. 11 Lunebi ma lugoba mapol gibibino dok gibibwolo jo mapol; 12 dok kit macalo tim maraco bimedde ameda-ni, mar pa jo mapol bene bikwe woko. 13 Ento ngat ma ociro nio wa i agikki aye kibilarone. 14 Dok kwena maber me Ker-ri kibititone i wi lobo ducu me bedo caden bot rok ducu, ka dong lacen agikki piny bibino.

15 “Dok ma lubbe ki lok pa lanebi Daniel, wubineno gin me kwer ma balo jami ducu ocung i kabedo maleng (ngat ma kwano lok man myero oniang maber). 16 Ka wuneno gin man, ci jo ma i Judaya myero guring woko i wi godi. 17 Ngat ma tye i wi ot pe dok odony i ot ka kwanyo jami ma i ode, 18 ki ngat ma tye i poto pe odok cen gang ka kwanyo bongone. 19 Mon muyac ki mon ma gitye ka doto lutino gibineno can i kare meno! 20 Wumedde ki lega ni ngwecwu pe otimme i kare me ngico* nyo i nino me Cabat; 21 pien i kare meno, twon can madit atika bitimme, can ma kit man ma naka yam peya otimme cakke ki i acakki piny nio wa i kare-ni, dok pe dong bitimme matwal. 22 Ki lok ada, ka pe kijwiko nino meno obedo manok, pe tye dano mo ma bibwot; ento pi jo ma kiyerogi, kibiweko nino meno bedo manok.

23 “I kare meno, ka ce ngat mo owacciwu ni: ‘Nen! Kricito tye kany,’ nyo, ‘Tye kuca!’ pe wuye lok meno. 24 Pien kricito ma lugoba ki lunebi ma lugoba gibibino ci gibitimo tango madongo ki jami me aura wek ka twerre, gibwol kadi wa jo ma kiyerogi. 25 Nen! Atyeko cikowu woko con. 26 Pi meno, ka ngat mo owacciwu ni, ‘Nen! En tye i tim,’ pe wuciti; nyo ni, ‘Nen! En tye i tyelo,’ pe wuye lok meno. 27 Pien kit macalo lutkot meny ki tung kunyango ci caro piny wa tung kupoto ceng, bitimme kit meno bene i kare ma Wod pa dano bibedo tye. 28 Ka ma gin muto tye iye, ocur bene gicokke kunnu.

29 “Cutcut i nge can me kare meno, ceng bicido woko, dwe pe bimenyo piny, ki lakalatwe bene bipoto woko ki i dan polo, dok teko me polo biyenge. 30 Lacen lanyut me bino pa Wod pa dano binen i polo, dok kaki ducu ma i wi lobo gibikumo matek, dok gibineno Wod pa dano ma tye ka bino i wi pol me polo ki teko kacel ki deyo madit. 31 En bioro lumalaikane ki dwan tum malongo, ci gibicoko jone ma kiyerogi ki i twok lobo angwen ducu, cakke ki i agikki polo tungcel me o wa i agikkine tungcel.

32 “Dong wunong pwony ki i kom yat oduro: Cutcut ka ja­nge manyen olot ci pote oluk, wungeyo ni kare me cwir dong cok. 33 I yo acel-lu, wun bene, ka wuneno jami magi ducu, ci wunge ni en dong tye cok, tye wa i doggola. 34 Ada awaco botwu ni, yalwak man pe bitum nio wang ma jami magi ducu otimme. 35 Polo ki lobo birwenyo woko, ento lokka bibedo matwal.

36 “Ento ka odok i kom nino ki cawa meno, pe tye ngat mo ma ngeyo, kadi wa lumalaika me polo nyo Wod, ento Won keken aye ngeyo. 37 Dong kit macalo otimme kwede i kare pa Nua, bitimme kit meno bene i kare ma Wod pa dano bibedo tye. 38 Pien ma Pii Aluka peya ocorre i lobo, dano onongo gicamo dok gimato, co ginyomo dok anyira kinyomogi, nio wa i nino ma Nua odonyo kwede i yeya madit-ti.* 39 Ento pe guketo cwinygi iye nio ka Pii Aluka opong ci omologi woko ducu, bitimme kit meno bene i kare ma Wod pa dano bibedo tye. 40 I kare meno, co aryo gibibedo i poto; ci kibikwanyo ngat acel ento kiweko ngat mukene-ni dong. 41 Mon aryo gibibedo ka rego i wi kidi; ci kibikwanyo ngat acel ento kiweko ngat mukene-ni dong. 42 Pi meno dong, wubed ka kiyo piny pien pe wungeyo nino mene ma Rwotwu bibino iye.

43 “Ento myero wunge ni, ka onongo rwod ot ongeyo cawa* mene kikome i dyewor ma lakwo bibino iye, kono onongo obedo ma wange twolo dok pe oye ni kitur ode. 44 Pi meno, wun bene wubed atera, pien Wod pa dano bibino i cawa ma pe wutamo ni en bibino iye.

45 “Anga ma latic* ma lagen dok maryek ma laditte ocime me loyo lutic ducu ma i ode, wek omi botgi camgi i kare ma mitte kikome. 46 Latic meno bibedo ki yomcwiny ka laditte obino ci onongo en tye ka timo ticce! 47 Ada awaco botwu ni, laditte bicimme me loyo jamine ducu.

48 “Ento ka ce latic meno rac dok owaco kekene ni, ‘Laditta tye ka galle,’ 49 ci ocako goyo lutic luwote kun bene camo dok mato ki lumero, 50 ladit pa latic meno bibino i nino ma en pe otamo pire dok i cawa ma en pe ngeyo, 51 ci bimiye pwod malit loyo dok bibolle i kin lugoba. Kunnu aye ka ma en bikok kun kayo iye lake.

25 “Ker me polo kiromo porone ki anyira apar ma gukwanyo taragi ci gucito ka jolo lanyom. 2 Jo abic i kingi onongo luming, dok jo abic onongo giryek. 3 Anyira ma luming-ngi guwoto ki taragi ento pe gutingo moo mukene, 4 dok anyira ma giryek-ki gutingo taragi kacel ki moo mukene i cupagi. 5 Ma lanyom onongo pud tye ka galle ki bino, gin ducu nino ocako mako wanggi ci gunino woko. 6 Ento i cwiny dyewor, woo owinnye ni: ‘Lanyom dong tye cok! Wukat woko ka jolle.’ 7 Ci anyira ­apar-ri ducu gua malo dok guyubo taragi. 8 Anyira ma luming-ngi guwaco bot anyira ma giryek-ki ni, ‘Wuminiwa moowu mo manok, pien tarawa dong cok to.’ 9 Anyira ma giryek-ki gugamo ni, ‘Nen calo moowa pe biromowa ka wapoko botwu mogo. Twora wucit bot lucat moo ci wuwil ki botgi.’ 10 Ma gitye ka cito ka wilo moo, lanyom obino. Anyira ma onongo gitye atera-ni gudonyo kacel kwede i karama me nyom, ci kiloro doggola woko. 11 Lacen, anyira mukene-ni bene gubino, ci guwacci, ‘Ladit, Ladit, yabiwa doggola!’ 12 Ento en ogamo ni, ‘Ada awaco botwu ni, an pe angeyowu.’

13 “Pi meno, wumedde ki kiyo piny, pien pe wungeyo nino ki cawa meno.

14 “Ker-ri bene kiromo porone ki laco mo ma onongo cok cito i lobo mukene ci olwongo luticce dok oweko jamine i cinggi. 15 En omiyo talanto abic bot latic acel, talanto aryo bot latic mukene ki dong talanto acel bot mukene, en omiyo bot ngat acel acel ma lubbe ki kerone, ci dong ocito woko. 16 Cutcut, latic ma ogamo talanto abic-ci ocito ocako timo kwede biacara ci onongo talanto abic mukene. 17 I yo acel-lu, ngat ma ogamo talanto aryo-ni bene onongo magoba me talanto aryo. 18 Ento latic ma ogamo talanto acel keken-ni, ocito okwinyo bur ci oyiko cente* pa laditte woko.

19 “I nge kare malac, ladit pa lutic magi odwogo ci ocako ngiyo kit ma gutiyo kwede ki limme. 20 Pi meno, latic ma ogamo talanto abic-ci obino ci okelo talanto abic mukene kun waco ni, ‘Ladit, onongo imiya talanto abic; nen, anongo talanto abic mukene.’ 21 Laditte owaco bote ni: ‘Itimo maber adada, in latic maber dok ma lagen! Ibedo lagen i kom jami manok. Dong abicimmi me loyo jami mapol. Dony i yomcwiny pa laditti.’ 22 I ngeye, latic ma ogamo talanto aryo-ni obino ci owaco ni, ‘Ladit, onongo imiya talanto aryo; nen, anongo talanto aryo mukene.’ 23 Laditte owaco bote ni: ‘Itimo maber adada, in latic maber dok ma lagen! Ibedo lagen i kom jami manok. Dong abicimmi me loyo jami mapol. Dony i yomcwiny pa laditti.’

24 “I agikkine, latic ma ogamo talanto acel-li obino ci owaco ni: ‘Ladit, onongo angeyo wacon ni ibedo dano ma lagingi, ikayo kac ka ma pe icoyo iye kodi dok iguro cam ka ma pe ikworo iye. 25 Pi meno, lworo omaka ci acito akano talantoni i ngom. Ene, gam giri limmi.’ 26 Laditte ogamo ni: ‘In latic marac dok ma lawackom. Onongo ingeyo ni akayo kac ka ma pe acoyo iye kodi dok aguro cam ka ma pe akworo iye, 27 dong onongo omyero igwok centena i beng, wek ka ­adwogo, agam ki magoba mo i wiye.

28 “Pi meno, wukwany talanto meno ki bote ci wumi bot ngat ma tye ki talanto apar-ri. 29 Pien ngat ma tye ki gin mo, kibimedo bote ci en bedo ki jami mabup. Ento ngat ma pe ki gin mo, kadi matidi ma en tye kwede-ni bene kibikwanyone woko ki bote. 30 Dong wubol latic ma konnye pe-ni woko i colpiny. Kunnu aye ka ma en bikok dok kayo iye lake.’

31 “I kare ma Wod pa dano bibino ki deyone, kacel ki lumalaika ducu, en bibedo i wi komkerre me deyo. 32 Jo me rok ducu gibicokke kacel i nyime, ci en bipoko kingi i dul aryo kit ma lakwat poko kwede romi ki i kin dyegi. 33 Dok en biketo romi tung cinge ma lacuc, ento dyegi tung lacam.

34 “Ci Kabaka biwaco bot jo ma gitye tung cinge ma lacuc ni: ‘Wubin, wun jo ma Wora otyeko miyo botwu mot, wule ker ma kiyubo piwu nicakke i acakki lobo.* 35 Pien i kare ma kec oneka, wumiya ginacama; ma orwo pii oneka, wumiya pii amata. Onongo abedo welo ci wujola maber; 36 ma onongo ape ki bongo,* wumiya ginaruka. Koma obedo lit ci wugwoka. Ma onongo atye i buc, wubino ka lima.’ 37 Ci jo ma kitgi atir gibigamo ni: ‘Rwot, awene ma waneni ma kec neki ci wamiyo boti cam, nyo ma orwo pii neki ci wamiyo boti pii amata? 38 Awene ma waneni ma itye welo ci wajoli, nyo ma ipe ki bongo ci wamiyo boti ginaruka? 39 Awene ma waneni ma komi lit nyo ma itye i buc ci walimi?’ 40 Kabaka bigamo kun waco botgi ni, ‘Ada awaco botwu ni, gin mo keken ma wutimo bot ngat acel i kin omegina magi matino-ni, nongo wutimo bota.’

41 “I nge meno, en biwaco bot jo ma gitye tung cinge ma lacam ni: ‘Wua woko ki bota, wun jo ma kop oloyowu, wudony i mac ma pe to ma kiyubo pi Larac* kacel ki lumalaikane. 42 Pien kec oneka, ento pe wumiya ginacama; orwo pii oneka, ento pe wumiya pii amata. 43 Onongo abedo welo ento pe wujola; onongo ape ki bongo, ento pe wumiya ginaruka; koma obedo lit dok abedo i buc, ento pe wugwoka.’ 44 Gin bene gibigamo ni: ‘Rwot, awene ma waneni ma kec nyo orwo pii neki nyo itye welo nyo ipe ki bongo nyo komi lit nyo itye i buc ci pe wakonyi?’ 45 En bigamone ni: ‘Ada awaco botwu ni, gin mo keken ma pe wutimo bot ngat acel i kin jo magi matino-ni, nongo pe wutimo bota.’ 46 Dong jo ma gitye tung cinge ma lacam, kibijwerogi woko matwal, ento jo ma kitgi atir gibidonyo i kwo ma pe tum.”

26 I kare ma Yecu otyeko loko lok magi ducu, en owaco bot lupwonnyene ni: 2 “Wungeyo ni i nge nino aryo, wabikwero kwer me Kato, dok kibimiyo Wod pa dano i cing lumonene wek kigure i kom yat.”

3 I kare meno, lulamdog madito* ki ludongo pa lwak gugure kacel i dyekal pa lalamdog madit ma nyinge Kayapa, 4 ci gupiro lok kacel me mako Yecu i wi diro wek gineke woko. 5 Ento gubedo ka waco ni: “Pe myero wamake i nino madit, wek woo obed pe i kin lwak.”

6 I kare ma Yecu onongo tye i Betania i ot pa Cimon ma ladobo, 7 dako mo ma tye ki cupa* me moo ma ngwece kur dok welle dit obino bot Yecu, ci ocako onyo moo meno i wi Yecu ma en tye ka cam. 8 Ma lupwonnyene guneno man, cwinygi ocwer ci guwaco ni: “Pingo kibalo moo-ni abala? 9 Pien onongo kitwero catone i wel madit ci kimiyo centene bot lucan.” 10 Ma Yecu ongeyo gin ma gitye ka wacone, en owaco botgi ni: “Pingo wutye ka yelo dako man? En otimo gin maber i koma. 11 Pien kare ducu wubibedo ki lucan i kinwu, ento pe wubibedo kweda kare ducu. 12 I kare ma en oonyo moo ma ngwece kur-ri i koma, en otimo meno pi yubo koma me ayika. 13 Ada awaco botwu ni, ka mo keken i wi lobo-ni ma kibitito iye kwena maber-ri, gin ma ­dako-ni otimo bene kibititone me po pire.”

14 I nge meno, Juda Lakeriot, ma en ngat acel i kin jo apar wiye aryo-ni, ocito bot lulamdog madito 15 ci owaco ni: “Wubimiya gin ango wek ami en i cingwu?” Gin guye culle nyig cente me ryal 30. 16 Dong cakke i cawa meno, en obedo ka yenyo kare maber me miyo Yecu i cinggi.

17 I nino mukwongo me Kwer me Mugati ma Tobi Pe Iye, lupwonnye gubino bot Yecu ci guwacce ni: “Ka kwene ma imito ni wacit wayub iye cam me Kato?” 18 En owaco botgi ni: “Wucit i Jerucalem bot Ngadi ci wuwacce ni, ‘Lapwony owaco ni: “Karena dong onyiko cok; abicamo cam me Kato kacel ki lupwonnyena i paconi.”’” 19 Pi meno, lupwonnyene gutimo kit ma Yecu ocikogi kwede ci guyubo jami ducu ma mitte pi kwer me Kato.

20 Ma dong piny oyuto, en obedo piny kacel ki lupwonnyene 12. 21 I kare ma gitye ka cam, en owaco ni: “Ada awaco botwu ni, ngat acel i kinwu bimiya i cing lumonena.” 22 Lupwonnyene cwinygi ocwer matek pi lok man, ci gin ducu ki acel acel gucako penye ni: “Rwot, an ce?” 23 En ogamo ni: “Ngat ma tye ka gweyo dek i atabo kacel kweda aye bimiya i cing lumonena. 24 Ada, Wod pa dano bicito gire, kit ma yam kicoyo kwede i kome, ento can i wi ngat ma bimiye i cing lumonene! Onongo bibedo ber ma loyo ka onongo pe kinywalo dano meno.” 25 Juda, ma en aye ngat ma onongo cok keto lok roro i kome-ni openye ni: “Rabbi, an ce?” Yecu owaco bote ni: “Tye kit ma iwaco-ni.”

26 Ma pud gitye ka cam, Yecu okwanyo mugati, olego lega me pwoc, oturo iye, ci omiyo ki lupwonnyene kun waco ni: “Wukwany dok wucam. Man cung pi koma.” 27 Dok okwanyo kikopo, olego lega me pwoc ci omiyo botgi kun waco ni: “Wun ducu wumat man, 28 pien man cung pi ‘remona me gicikke,’ ma kibionyone pi weko bal pa jo mapol. 29 Ento awaco botwu ni: Nicakke tin, pe dong abimato kongo vino nio wa i nino ma dok abimato manyenne kacel kwedwu i Ker pa Wora.” 30 Lacen, i nge wero wer me pak,* gucito i wi Got Jeituni.

31 Ci Yecu owaco botgi ni: “Wun ducu wubipoto woko pi gin ma bitimme i koma i dyewor man, pien yam kicoyo ni: ‘Abigoyo lakwat, ci romi ma i dwolle gibiket woko ata.’ 32 Ento ka dong kicera, abitelo nyimwu me cito i Galilaya.” 33 Ci Petero ogamo ni: “Kadi bed jo mukene-ni ducu gibipoto pi gin ma bitimme i komi, an pe abipoto matwal!” 34 Yecu owaco bote ni: “Ada awaco boti ni, i dyewor man, ma peya twon gweno okok, nongo dong ityeko kwera woko tyen adek.” 35 Petero owaco bote ni: “Kadi bed mitte ni ato kacel kwedi, pe abikweri matwal.” Lupwonnye mukene-ni bene guwaco gin acel-li.

36 I nge meno, Yecu ocito kacel kwedgi i kabedo ma kilwongo ni Getecemane, ci en owaco bot lupwonnyene ni: “Wubed piny kany, wek an kong acit kuca ka lega.” 37 En owoto ki Petero kacel ki awobe pa Jebedayo aryo-ni, ci ocako kumo dok cwinye ocwer matek. 38 Pi meno, en owaco botgi ni: “Cwinya tye ka cwer matek ma mito neka woko. Wubed kany ci wubed ka kiyo piny kacel kweda.” 39 Ento en owoto anyim manok, oryebbe piny, okulo wiye wa i ngom ci ocako lega ni: “Wora, ka ce twere, kwany kikopo man woko ki bota. Kadi bed kit meno, wek otimme kit ma in imito ento pe kit ma an amito.”

40 En odok bot lupwonnyene ci onongo gunino woko, dok owaco bot Petero ni: “Onongo pe wutwero kiyo piny kacel kweda kadi pi cawa acel keken? 41 Wubed ka kiyo piny dok wumedde ki lega, wek pe wudony i abita. Cwiny gire mito, ento kom aye goro.” 42 En dok ocito tyen me aryone ci olego ni: “Wora, ka ce kikopo man pe twero kato ma pe amato gin ma iye, ci wek gin ma imito otimme.” 43 En odok bot lupwonnyene ci onongo gunino woko, pien nino onongo onurogi matek. 44 Pi meno, en owekogi ci ocito tyen me adekke ka lega, kun nwoyo lega acel-li. 45 Ci en odwogo bot lupwonnyene dok owaccigi ni: “I cawa ma kit man pud wutye ka nino ki yweyo? Nen! Cawa dong oromo wek kimi Wod pa dano i cing lubalo. 46 Dong wua malo, wacitu. Nen! Ngat ma biketo roro i koma dong tye cok.” 47 Ma en pud tye ka lok, nen! Juda, ngat acel i kin jo apar wiye aryo-ni obino kacel ki lwak mapol ma lulamdog madito ki ludongo pa lwak aye ocwalogi. Gin gubino ma gumako pala lucwan ki odoo i cinggi.

48 Ngat ma onongo biketo roro i kome-ni onongo omiyo botgi lanyut, kun waco ni: “Ngat ma abinoto leme aye en kikome; wumake woko.” 49 En ocito atir bot Yecu, owacce ni: “Rabbi itye?” ci onoto leme. 50 Ento Yecu owaco bote ni: “Jal, ibino kany ka timo gin ango?” Ci lwak gubino gumako Yecu dok gukwanye woko ki bot lupwonnyene. 51 Ento nen! ngat acel i kin jo ma gitye kacel ki Yecu owoto pala lucwanne, otongo opii pa lalamdog madit, ci ongunu ite woko. 52 Ci Yecu owaco bote ni: “Dwok pala lucwanni i akurane, pien jo ducu ma gitiyo ki pala lucwan, kibinekogi bene ki pala lucwan. 53 Itamo ni pe atwero lego Wora wek ocwala lumalaika makato buca* mony 12 i cawa man? 54 Ento ka atimo meno, ci Ginacoya ma waco ni myero otimme kit man bicobbe nining?” 55 I cawa meno, Yecu owaco bot lwak ni: “An layak ce ma wubino kany ka maka ki pala lucwan ki odoo-ni? Nino ki nino abedo ka pwony i ot pa Lubanga, ento pe wumaka do! 56 Ento jami magi ducu otimme wek lok* ma yam lunebi gucoyo ocobbe kakare.” I cawa meno, lupwonnye ducu guweke ci guringo woko.

57 Jo ma gumako Yecu gutere bot lalamdog madit Kayapa, ka ma onongo lupwony cik ki ludongo gugure iye. 58 Ento Petero obedo ka lubo kore ki ka mabor bor, nio wa i dyekal pa lalamdog madit. Dok ma en oo kunnu, obedo kacel ki lutic wek enen gin ma bitimme.

59 Lulamdog madito ki jo ducu ma i Lukiko gubedo ka yenyo lucaden ma gitwero loko lok goba i kom Yecu wek gineke woko. 60 Ento pe gunongo lok mo ma gitwero tic kwede kadi bed lucaden mapol ma lugoba gubino. Lacen, lucaden aryo gubino 61 ci guwaco ni: “Laco man owaco ni, ‘Atwero reto ot pa Lubanga piny, ci agero odoco i nino adek keken.’” 62 Pi meno, lalamdog madit oa malo ci openye ni: “Pe ibigamo gin mo? Gin ango ma itwero wacone i kom adot ma joni gukelo i komi?” 63 Ento Yecu oling alinga. Pi meno, lalamdog madit owacce ni: “Amito ni itit botwa ma ikwongnge i nying Lubanga makwo ka ce in aye Kricito ma Wod pa Lubanga!” 64 Yecu owacce ni: “Tye kit ma iwaco-ni. Ento awaco botwu ni: Cakke kombeddi, wubineno Wod pa dano ma obedo tung cing ma lacuc pa Ngat Matek* dok tye ka bino i wi pol me polo.” 65 Cutcut, lalamdog madit oyeco bongone, kun waco ni: “En oyeto Lubanga! Pud dok wamito caden mukene pingo? Nen! Dong wuwinyo kit ma en oyeto kwede Lubanga. 66 Wutamo ningo?” Gugamo ni: “Balle romme to.” 67 Ci gungulo laa i wange dok gudo­nge. Jo mukene gudongo leme, 68 kun giwaco ni: “In Kricito, ka in lanebi ada tit botwa! Anga ma odongi?”

69 I cawa meno, Petero onongo obedo woko i dyekal, ci anyaka mo ma latic obino bote dok owacce ni: “In bene onongo itye kacel ki Yecu Lagalilaya-ni!” 70 Ento en okwero woko i nyim gin ducu, kun waco ni: “Pe angeyo gin ma itye ka lok iye.” 71 Ma en ocito cok ki doggang, anyaka mukene dok onene ci owaco bot jo ma gitye kunnu ni: “Laco man onongo tye kacel ki Yecu Lanajaret.” 72 En dok okwero woko kun kwongnge akwonga ni: “An pe angeyo laco meno!” 73 Ma pe orii, jo ma onongo gucung cok gubino bot Petero ci guwacce ni: “Ki lok ada, in bene itye i kingi, pien kit ma iloko kwede doti woko.” 74 Ci en ocako kwongnge kun lamme kekene ni: “An pe angeyo laco meno!” Cutcut twon gweno otugi kok. 75 Ci wi Petero opo i kom lok ma Yecu owacce, ni: “Ma peya twon gweno okok, nongo dong ityeko kwera woko tyen adek.” Pi meno en okato woko dok okok matek.

27 Ma piny dong oruu, lulamdog madito ki ludongo pa lwak ducu gugure kacel ka piro lok i kom kit me neko Yecu. 2 I nge tweyo cinge, gutere ci gumiye bot Pilato, ma onongo tye laloc.

3 I kare ma Juda, ma en aye ngat ma oketo roro i kom Yecu, oneno ni kingolo kop me to i wi Yecu, cwinye ocwer ci odwoko nyig cente 30 me ryal-li bot lulamdog madito ki ludongo, 4 kun waco ni: “Atimo bal i kare ma amiyo ngat* ma pe ki bal i cingwu.” Gugamo ni: “Man obedo lokwa bo? Meno dong pekoni!” 5 Ci en obolo nyig cente me ryal-li i ot pa Lubanga dok oa woko. I ngeye, en ocito odene woko. 6 Ento lulamdog madito gukwanyo cente-ni dok guwaco ni: “Cik pe ye ni kiket cente man ka ma kigwoko iye lim i ot pa Lubanga, pien kiwilo ki remo.” 7 I nge nyamo lok man kacel, gutiyo ki cente meno me wilo ngom* me yiko jo ma gua ki i lobe mukene. 8 Pi meno, kilwongo ngom man ni Poto me Remo nio wa i kare-ni. 9 Man ocobo lok ma Lubanga oloko kun tiyo ki lanebi Jeremia ni: “Dok gukwanyo nyig cente 30 me ryal, wel ma kingolo pi laco meno, ma en aye wel ma Luicrael mogo gungolo pire, 10 ci gumiyo botgi me wilo poto pa lacwe agulu, ma lubbe ki kit ma Jehovah ocika kwede.”

11 I kare ma kitero Yecu i nyim laloc, ci laloc openye ni: “In aye kabaka pa Lujudaya?” Yecu ogamo ni: “Tye kit ma ­iwaco-ni.” 12 Ento i kare ma lulamdog madito ki ludongo gukelo adot i kome, en pe ogamo lok mo. 13 Ci Pilato owaco bote ni: “Pe iwinyo adot ducu ma gukelo i komi?” 14 Ento en pe ogamo lok mo keken, mumiyo laloc obedo ki ur madit.

15 Mwaka ki mwaka i nino me Kato, laloc onongo gonyo lamabuc acel, ma lwak guyero. 16 I kare meno, onongo gitye ki lamabuc mo ma kite rac adada ma nyinge Baraba. 17 Dong ma lwak gugure kacel, Pilato openyogi ni: “Anga ma wumito ni agony botwu, Baraba, nyo Yecu ma kilwongo ni Kricito-ni?” 18 Pien Pilato onongo ngeyo ni gumiyo Yecu bote pi nyeko. 19 Dok bene, i kare ma en obedo i wi kom me ngolo kop, dakone ocwalo kwena bote, kun waco ni: “Pe itim gin mo i kom laco ma kite atir meno, pien tin i wang lek adeno can malit pire.” 20 Ento lulamdog madito ki ludongo gupiyo lwak ni gupeny wek kigony Baraba, ento kinek Yecu woko. 21 Laloc dok openyogi ni: “Anga i kin co aryo-ni ma wumito ni agony botwu?” Gugamo ni: “Baraba.” 22 Pilato owaco botgi ni: “Dong gin ango ma myero atim i kom Yecu ma kilwongo ni ­Kricito-ni?” Gin ducu guwaco ni: “Wek kigure i kom yat!” 23 En owaco ni: “Pingo? Gin ango marac ma en otimo?” Ento gumedde ameda ki dangnge ni: “Wek kigure i kom yat!”

24 Ma Pilato oneno ni tutene pe tye ka nyako nyige, ento woo tye ka medde ameda, en okwanyo pii ci olwoko cinge i nyim lwak kun waco ni: “Alii me remo pa laco man pe bibedo i wiya. Lokke bibedo i wiwu.” 25 Lwak gugamo lokke kun giwaco ni: “Wek alii me remone obed i wiwa ki i wi lutinowa.” 26 Pi meno, en ogonyo botgi Baraba, ento oweko kigoyo Yecu ci omiye i cing lumony wek gugure i kom yat.

27 I nge meno, lumony pa Pilato gutero Yecu i gang kal pa Pilato ci guguro lumony ducu ka ngete. 28 Gulunyo bongine, ci gudwalo bongo makwar i kome. 29 Guyubo lalukana ki okuto ci guruko i wiye dok gumiye omako odoo lagada i cinge ma lacuc. Gurumo conggi i nyime dok gucako ngale kun giwaco ni: “Kuc obed kwedi, in Kabaka pa Lujudaya!” 30 Ci gungulo laa i kome dok gukwanyo lagada-ni gucako goyo ki wiye. 31 Ma dong gutyeko ngale, gukwanyo bongo makwar-ri woko ki i kome dok gurukke bongine ka dong gutere me agura i kom yat.

32 I kare ma gitye ka a ki i boma, gurwatte ki laco mo ma a ki i Cirene ma nyinge Cimon. Gudiye tektek me tingo yat me guro Yecu. 33 Dok i kare ma guo i kabedo ma kilwongo ni Golgota, ma te lokke ni, Okoto Wic, 34 gumiye kongo vino ma kirubo ki pig yat mo makec ni omati; ento ma en obilo, okwero matone woko. 35 Ma dong gutyeko gure i kom yat, gubolo kwir* me poko bongine i kingi, 36 ci gubedo piny kunnu ka gwokke. 37 Gin bene guguro coc mo malo i ka wiye ma nyuto adot ma kikelo i kome, ni: “Man aye Yecu, Kabaka pa Lujudaya.”

38 Ci kiguro luyak aryo kacel kwede, acel tung lacuc ki acel tung lacam. 39 Dok jo ma onongo gitye ka kato gubedo ka yete, ma giyengo wigi 40 kun giwaco ni: “In ma iwaco ni ibimuko ot pa Lubanga ci igero i nino adek keken-ni, dong ilarre kekeni do! Ka ada ibedo wod pa Lubanga, ci lor piny ki i kom yat!” 41 I yo acel-lu bene, lulamdog madito kacel ki lupwony cik ki ludongo gucako ngale, kun giwaco ni: 42 “En olaro jo mukene, ento pe twero larre kekene! Ka ada en Kabaka me Icrael, wek en olor piny ki i kom yat kombeddi, ci wabiye en. 43 En oketo genne i kom Lubanga; wek Lubanga dong olare ka mito konye, pien en owaco ni, ‘An a Wod pa Lubanga.’” 44 Kit meno bene, luyak ma kigurogi kacel kwede gubedo ka ngale.

45 Nicakke cawa abicel me dyeceng, piny ocido woko macol i lobo meno ducu nio wa i cawa abongwen. 46 I kine ka cawa abongwen, Yecu odang­nge ki dwan malongo ni: “Eli, Eli, lama cabaktani?” ma gonnye ni, “Lubangana, Lubangana, iweka woko pingo?” 47 Ma guwinyo lok man, jo mogo ma gucung kunnu gucako waco ni: “Laco-ni tye ka lwongo Elia.” 48 Cutcut, ngat acel i kingi oringo okwanyo pama,* oluto i kongo vino mawac, orwako i wi tal lagada ci ocwalo bote wek omati. 49 Ento jo mukene guwaco ni: “Wuweke obedi! Wek kong wanen ka Elia obibino ka larre.” 50 Yecu dok odang­nge ki dwan malongo ci oto* woko.

51 Ci nen! bongo kicika* ma i ot pa Lubanga oyec opokke iye aryo, cakke ki malo o kwede wa piny, oyengyeng oyengo piny dok godi gubarre. 52 Ci bur lyel oyabbe woko, dok kom lyelli mapol pa jo maleng ma yam guto okato woko 53 dok jo mapol guneno. (I nge cer pa Yecu, jo mogo ma gua ki i limu ka ma lyelli magi tye iye, gudonyo i boma maleng.) 54 Ento i kare ma ladit wi mony ki jo ma onongo gitye kacel kwede ka gwoko Yecu guneno oyengyeng ki jami ma tye ka timme, lworo omakogi matek ci guwaco ni: “Ada, dano man onongo Wod pa Lubanga.”

55 Dok mon mapol onongo gitye kunnu ka nenone ki ka mabor bor. Gin onongo gulubo kor Yecu ki i Galilaya dok gubedo ka konye. 56 I kingi onongo tye iye Maliam Lamagdala ki Maliam min Yakobo ki Yoce ki dong min lutino awobe pa Jebedayo.

57 Ma ceng dong cok poto, laco mo ma lalonyo me Arimataya, ma nyinge Yucepu obino, en bene onongo odoko lapwonnye pa Yecu. 58 Laco man ocito bot Pilato dok olego kom Yecu me ayika. Ci Pilato ociko ni kimiye. 59 Yucepu okwanyo kom Yecu, oboyo ki bongo camanini maber dok maleng, 60 ci opyelo i bur lyelle, ma en onongo okwinyo i kor got. Ma en dong oloro got madit oumo ki dog lyel, oa woko. 61 Ento Maliam Lamagdala ki Maliam mukene-ni gumedde ki bedo kunnu, gubedo piny i dog bur lyel.

62 Jami magi otimme i nino me yubbe pi Cabat. Orwone, lulamdog madito ki Luparicayo gugure kacel i nyim Pilato, 63 ci guwaco ni: “Ladit, wiwa po gin ma laco ma lagoba-ni owaco i kare ma en pud kwo ni, ‘I nge nino adek, abicer woko.’ 64 Pi meno, cik wek kigwok dog lyelle maber nio wa i nino me adekke, wek lupwonnyene pe gucit gukwal kome ci guwac bot dano ni, ‘En ocer woko ki i kin jo muto!’ Man biweko bwola me agikki-ni bedo rac loyo mukwongo.” 65 Pilato owaco botgi ni: “Wucit ki acikari. Wugwok dog lyelle maber kit ma wutwero kwede.” 66 Pi meno, gucito gumwono got ma i dog lyel maber dok guketo lukurpiny me gwokone.

28 I nge Cabat, ma dong piny cok ruu i nino mukwongo* me cabit, Maliam Lamagdala ki Maliam mukene-ni gucito ka neno lyel.

2 Ci nen! oyengyeng madit onongo oyengo piny, pien lamalaika pa Jehovah olor piny ki i polo, obino oloro got woko ki i dog lyel ci obedo i wiye. 3 Kome onongo ryeny calo lutkot ma wil, dok bongone onongo nen matar calo pee. 4 Ada, pi lworo ­lamalaika-ni, lukurpiny komgi omyel matek mumiyo gudoko calo jo ma dong guto woko.

5 Ento lamalaika owaco bot mon-ni ni: “Pe wulwor, pien angeyo ni wutye ka yenyo Yecu ma onongo kiguro i kom yat. 6 En pe tye kany, pien kicere woko, kit ma en onongo owaco kwede. Wubin, wunen ka ma onongo kipyele iye. 7 Ka dong wucit oyotoyot wutit ki lupwonnyene ni dong kicere woko ki i kin jo muto, pien nen! en tye ka telo nyimwu me cito i Galilaya. Wubinene ki kunnu. Nen! dong atyeko tittiwu.”

8 Pi meno, gua oyotoyot ki i dog bur lyel,* ki lworo kacel ki yomcwiny madwong, ci guringo ka titone bot lupwonnyene. 9 Ci nen! Yecu orwatte kwedgi ci omotogi ni: “Wurii maber?” Gin gucito bote ci gurumo conggi piny i nyime dok gumako tyene. 10 Ci Yecu owaco botgi ni: “Pe wulwor! Wucit wutit ki omegina wek gucit i Galilaya, ci gibinena ki kunnu.”

11 I kare ma mon magi onongo gitye ka cito, jo mogo i kin lukurpiny gucito i boma ci gutito bot lulamdog madito jami ducu ma otimme. 12 Dok i ngeye ma dong lulamdog madito ki ludongo gucokke kacel, guyubo lok ci gumiyo cente me ryal mabup bot lumony magi 13 dok guwaco botgi ni: “Wuwac bot dano ni, ‘Lupwonnyene gubino i dyewor ci gukwalo kome i kare ma onongo wanino woko.’ 14 Dok ka ce Pilato owinyo lok man, wabitito* bote lok ducu wek pe wubed ki par mo keken.” 15 Pi meno, lumony gugamo cente me ryal-li ci gutimo kit ma kiwacigi kwede, dok lok man onya i kin Lujudaya matek nio wa i kare-ni.

16 Ento, lupwonnyene 11 gucito i Galilaya i wi got ma Yecu oyubo ni ebirwatte kwedgi iye. 17 I kare ma gunene, gurumo conggi piny i nyime, ento jo mogo i kingi gubedo ki akalakala. 18 Yecu obino botgi, ci owaccigi ni: “Twero ducu ma i polo ki lobo dong kityeko miyo bota. 19 Pi meno, dong wuciti, wucilok jo me rok ducu gudok jo ma luba, wubatijagi* i nying Won ki Wod ki cwiny maleng, 20 dok wupwonygi me lubo jami ducu ma acikowu kwede. Nen! Atye kwedwu kare ducu nio wa i kare me agikki me lobo man.”