Umbuzo Oyindida

KUNEMIBONO ehlukahlukene mayelana nokuthi kwenzekani uma sesifile. Abanye banomuzwa wokuthi lapho sebefile bayaqhubeka bephila bekwesinye isimo noma kwenye indawo. Abanye bacabanga ukuthi bayozalwa kabusha baphile kwenye indawo. Kodwa abanye bacabanga ukuthi lapho sebefile basuke bengasaphili.

Kungenzeka nawe kukhona okukholelwayo kuye ngendlela okhuliswe ngayo nendawo owakhulela kuyo. Njengoba kunemibono ehlukahlukene mayelana nokuthi kwenzekani lapho umuntu efa, ukhona yini umuntu noma indawo esingathola kuyo impendulo eyiqiniso yalo mbuzo oyindida?

Sekuyiminyaka eminingi abefundisi befundisa ukuthi kunokuthile okungaphakathi kumuntu okungafi lapho umuntu efa. Abalandeli bazo zonke izinkolo ezinkulu zobuKristu, ubuHindu, ubuJuda, ubuSulumane kanye nezinye, bakholelwa ukuthi kunomphefumulo ongaphakathi kumuntu ongafi lapho umzimba ufa bese uphila endaweni yemimoya. Ngakolunye uhlangothi, amaBuddha akholelwa ukuthi lapho umuntu efa uzalwa kabusha abe sesimweni sokuthula nenjabulo.

Ngenxa yalezi zinkolelo, iningi labantu emhlabeni likholelwa ukuthi lapho umuntu efa uyaqhubeka ephila kwenye indawo. Kwabaningi, ukufa kuyinto ebalulekile ekuphileni futhi bathi kuyintando kaNkulunkulu. Lithini iBhayibheli ngale ndaba? Sicela ufunde isihloko esilandelayo. Impendulo ozoyithola kungenzeka ikumangaze.