Luyini Ukholo?

UNGALUCHAZA kanjani ukholo? Abanye bathi luwukukholelwa kokuthile ngaphandle kobufakazi obuphathekayo. Umlobi wezindaba waseMelika onethonya noyintatheli, uH. L. Mencken wachaza ukholo ngokuthi “inkolelo engenangqondo ekwenzekeni kwento engenakwenzeka.”

Ngokuphambene, iBhayibheli alichazi ukholo ngokuthi ukukholelwa kokuthile ngaphandle kobufakazi noma ngokuthi inkolelo engenangqondo. IZwi likaNkulunkulu lithi: “Ukholo luwukulindelwa okuqinisekisiwe kwezinto ezithenjwayo, ukuboniswa okusobala kwezinto ezingokoqobo nakuba zingabonakali.”—Hebheru 11:1.

Njengoba kunemibono ehlukahlukene ngokholo, ake sicabangele izimpendulo zemibuzo elandelayo:

• Incazelo yeBhayibheli ihluke kanjani kulokho abaningi abakushoyo ngokholo?

• Kungani kubalulekile ukuba nokholo oluchazwa iBhayibheli?

• Ungalwakha kanjani ukholo oluqinile?

Itayitela Nobufakazi Obuqinile

Ngesikhathi kubhalwa incwadi yeBhayibheli yamaHebheru, igama lesiGreki elihunyushwe ngokuthi ‘ukulindela okuqinisekisiwe’ lalivame ukusetshenziswa. Lalivame ukuvela ezincwadini zebhizinisi futhi lidlulisela umqondo wokuthi kunesiqinisekiso sokuthi uzothola okuthile esikhathini esizayo. Yingakho enye incwadi isikisela ukuthi eyamaHebheru 11:1 ingahunyushwa ngokuthi: “Ukholo luyitayitela lezinto ezethenjwayo.”

Uma wake wathenga okuthile enkampanini enedumela elihle wabe usulindela ukuba kulethwe, yilolo hlobo lokholo owalubonisa. Irisidi owalinikezwa laba yisizathu sokuba uyethembe leyo nkampani. Ngamanye amazwi, lelo risidi laliyitayitela noma isiqinisekiso sokuthi wawuzokuthola okuthengile. Uma lelo risidi lalingaduka noma ulilahle, wawuyobe ulahlekelwe isiqinisekiso sokuthi wayithenga leyo nto. Ngokufanayo, labo abanokholo lokuthi uNkulunkulu uyofeza izithembiso zakhe, baqinisekiswa ngokuthi bayokuthola lokho abakulindele. Ngakolunye uhlangothi, labo abangenalo ukholo noma olubaphelelayo ngeke bazithole izinto uJehova azithembisayo.—Jakobe 1:5-8.

Inkulumo yesibili ekumaHebheru 11:1, ehunyushwe ngokuthi “ukuboniswa okusobala,” inomqondo wokuveza ubufakazi obuphikisa lokho okubonakala kuyiqiniso. Ngokwesibonelo, kubonakala sengathi ilanga lizungeza umhlaba—liphuma empumalanga, lihambe esibhakabhakeni lize liyosithela entshonalanga. Nokho, ubufakazi bokufundwa kwezinkanyezi nezibalo bembula ukuthi akuwona umhlaba osenkabeni yesimiso sonozungezilanga. Lapho usukwazi lokhu futhi ukwamukela njengokuyiqiniso, uba nokholo lokuthi wumhlaba ozungeza ilanga—naphezu kwalokho amehlo akho akutshela khona. Akukhona ukuthi ukholelwa kokuthile ngaphandle kobufakazi obuphathekayo. Kunalokho, ukholo lwakho lukunikeza ikhono lokubona izinto njengoba zinjalo, hhayi njengoba zibonakala emehlweni.

Lubaluleke Kangakanani Ukholo Oluqinile?

Lolu uhlobo lokholo olukhuthazwa yiBhayibheli—ukholo oluqinile olwakhelwe ebufakazini obunamandla, ngisho noma lokho kusho ukulungisa izinkolelo zethu. Ukholo olunjalo lubalulekile. Umphostoli uPawulu wabhala: ‘Ngaphandle kokholo akwenzeki ukujabulisa uNkulunkulu, ngoba lowo oza kuye kumelwe akholelwe ukuthi ukhona nokuthi uba umvuzi walabo abamfuna ngobuqotho.’—Hebheru 11:6.

Ziningi izinselele ekubeni nokholo oluqinile. Kodwa uma ulandela izinyathelo ezine ezidingidwa emakhasini alandelayo, ungaphumelela.