IBHOKISI LOKUFUNDISA 19B
Umfudlana Uba Umfula!
UHezekeli ubona umfudlana ugeleza uvela endlini engcwele kaJehova, bese ngokuyisimangaliso uba umfula ojulile kungakapheli namakhilomitha amabili! Osebeni lalo mfula ubona izihlahla ezikhephuzelayo ezinikeza umsoco futhi zelaphe. Kusho ukuthini konke lokhu?
Umfula Uletha Izibusiso
ENDULO: Lapho ababedingisiwe bebuyela ezweni lakubo, izibusiso zagelezela kubo lapho bebuyisela indlela emsulwa yokukhonza uNkulunkulu ethempelini
OSUKWINI LWETHU: Ngo-1919 indlela emsulwa yokukhonza uNkulunkulu yabuyiselwa, lokho kwavula indlela yokuba izinceku zikaNkulunkulu ezithembekile zithole izibusiso eziningi ngendlela engakaze ibonakale
ESIKHATHINI ESIZAYO: Ngemva kwe-Armagedoni, uJehova uyosibusisa ngezindlela eziningi ezinjengokuqeda isono emizimbeni yethu nokusifundisa amaqiniso amasha
Amanzi Anikeza Ukuphila
ENDULO: UJehova wababusisa ngokucebile abantu bakhe abalalelayo, wenza ubuhlobo bakhe nabo baqina ngisho nalapho beba baningi
OSUKWINI LWETHU: Epharadesi elingokomfanekiso elikhulayo, abantu abaqhubeka banda baye bazuza ekugelezeni okuqhubekayo kwamaqiniso eBhayibheli, bafunda ngoJehova, bazihlanganisa nalabo abamkhonza ngendlela ayamukelayo
ESIKHATHINI ESIZAYO: Abasinde e-Armagedoni bayohlangana nezigidi zabavusiwe futhi bonke bayothola izibusiso zikaJehova
Izihlahla Zokudla Nokwelapha
ENDULO: Ngomqondo ongokomfanekiso, uJehova wondla abantu bakhe abathembekile ezweni labo elibuyiselwe; wabelapha ngokubasiza bayeke noma yini ehlobene nokukhonza onkulunkulu bamanga
OSUKWINI LWETHU: Ukuchazwa kwamaqiniso amaningi aseBhayibhelini kusiza abantu bakaNkulunkulu bagweme indlala nokugula okuwukwenza izono ezimbi nokucabanga ngendlela yabantu baleli zwe
ESIKHATHINI ESIZAYO: UKristu nabangu-144 000 ayobusa nabo bayosiza ekususeni isono kubantu abalalelayo, babenze bajabulele impilo, babe namandla kuze kube phakade!