Indlela Ongathola Ngayo Uthando Lweqiniso
Yini ongayenza ukuze uthole uthando futhi uthandwe kakhulu, hhayi nje ngomqondo wokuqomisana? Ingabe ukuceba? Ukuthuthukisa ukubukeka komzimba wakho?
KOKUBILI abesilisa nabesifazane, bekhohliswa ezentengiselwano futhi bethonywa imithombo yezindaba, babheka izinto ezinjalo njengezixazululo. Yiqiniso, kungokwemvelo futhi kuhle ukukhathazeka ngendlela esibukeka ngayo, kodwa ubuhle—obuyinto yesikhashana nje ngempela—abusona isibopho sobunye obuhlala njalo. Kungokufanayo nangengcebo. Okusizayo ukubonisa abanye uthando olungenabugovu. UJesu wafundisa: “Kwenzeni umkhuba ukupha, khona-ke abantu bayonipha.” (Luka 6:38) Kalula nje, uma ufuna uthando, lubonise.
Singakwenza kanjani lokho? Ebhala ngaphansi kokuqondisa komoya ongcwele kaNkulunkulu, umphostoli uPawulu uyawuphendula lo mbuzo. Wembula ukuthi uthando lunamandla, nokuthi alubonakali ngemizwelo, kodwa ngalokho olukwenzela abanye nangalokho olugwema ukukwenza. Phawula amazwi kaPawulu: “Uthando luyabekezela futhi lunomusa. Uthando alunamhawu, aluzigabisi, aluzikhukhumezi, aluziphathi ngokuhlazisayo, aluzifuneli izinzuzo zalo siqu, alucasuki. Alunamagqubu. Alujabuli ngokungalungi, kodwa lujabulela iqiniso. Lubekezelela zonke izinto, lukholelwa yizo zonke izinto, luthemba zonke izinto, lukhuthazelela zonke izinto.”—1 Korinte 13:4-7.
Uzizwa kanjani lapho othile ekubonisa umusa noma ekwamukela naphezu kwezinto ozishoyo noma ozenzayo ezicasulayo? Akakukhangi yini lowo muntu okhathazeka ngawe ngobuqotho, ongasheshi acasuke, othethelelayo futhi oneqiniso ngisho nalapho ukuthethelela nokwethembeka kungelula?
Ngakho, yenzenjalo kwabanye. UJesu wathi: “Ngakho-ke, zonke izinto enifuna abantu bazenze kini, nani kumelwe nizenze ngokufanayo kubo.” (Mathewu 7:12) Akulula ukubonisa uthando ngaso sonke isikhathi, kodwa kuwufanele umzamo. Enye inzuzo yalokho ukuthi uyothandwa kakhulu umkhaya wakini, abangane, umngane womshado, noma yilowo ongase ushade naye. Okunye ukuthi, uyothola injabulo ekwenzeni okuhle, ngokuzinikela ngenxa yabanye. Yebo, “kukhona injabulo eyengeziwe ekupheni kunasekwamukeleni.”—IzEnzo 20:35.
Funda Uthando Egunyeni Eliphakeme Kunawo Wonke
UJehova unguNkulunkulu wothando, igunya eliphakeme kule ndaba. (1 Johane 4:8) Uthando lwakhe lumshukumisela ukuba abafundise le mfanelo bonke abazimisele ukufunda. Cabanga ngezibonelo ezimbalwa zezimiso zeBhayibheli ezisisiza ukuba sithande futhi sithandwe.
‘Shesha ukuzwa, uphuze ukukhuluma.’ (Jakobe 1:19) Ukuhlola okwenziwa emibhangqwaneni engu-20 000 kwembula ukuthi abantu ababejabula kakhulu kwakuyilabo abangane babo bomshado abayizilaleli ezinhle. Ukukhulumisana okuhle kubalulekile ebuhlotsheni. Uprofesa wesayensi yokuhlalisana kwabantu wabhala: “Uma ufuna ukuzizwa uwedwa ebuhlotsheni, yiba nomuntu ongazi nhlobo ukuthi ubhekene nani. Mhlawumbe okubi nakakhulu, umuntu owaziyo kodwa ongaqondi ukuthi kungani ukwenza into enkulu.” Wenezela ukuthi ngisho noma abantu ababili behlukene ngezindlela ezithile, “uma umngane wakho womshado eyikhathalela indlela obheka ngayo izinto nokuhlangenwe nakho kwakho ekuphileni, khona-ke ukwehlukana ngemibono akubalulekile.”
“Niminyene othandweni lwenu. . . . yanulekani.” (2 Korinte 6:12, 13) Siyazuza lapho sanuleka othandweni lwethu ngabanye. Incwadi yaseHarvard Medical School ithi: “Ukuhlola okuningi kuye kwabonisa ukuthi abantu abathola usizo kwabanye—okuwukuthi, abanobuhlobo obuhle nemikhaya yabo, abangane, kanye nomphakathi wabo—bajabula kakhulu, baba nezinkinga zempilo ezimbalwa, futhi baphila isikhathi eside.”
“Masicabangelane ukuze sivuselelane uthando nemisebenzi emihle.” (Hebheru 10:24, 25) Sithonywa abantu esijwayelene nabo. Ngokuchitha isikhathi nalabo ababonisa uthando lobuKristu oluqotho, uyozibonela mathupha le mfanelo futhi ufunde indlela ongayibonisa ngayo ekuphileni kwakho. OFakazi BakaJehova bazama ngokusemandleni ukubonisa uthando olunjalo phakathi kwabo, bazi ukuthi lokhu kuwuphawu lwabafundi bakaJesu beqiniso. (Johane 13:35) Wamukelekile emihlanganweni yabo yobuKristu.
Uma uzizwa ungathandwa, ungadumali noma uzahlulele kabi. Khumbula ukuthi uJehova uyasibona isimo sakho. Uyamkhumbula uLeya, okukhulunywe ngaye esihlokweni sokuqala? UJehova wasiqaphela isimo sakhe, futhi waba umama wamadodana ayisithupha nendodakazi eyodwa—isibusiso esicebile ngesikhathi abantwana ababebhekwa ngaso njengempahla eyigugu! Ngaphezu kwalokho, wonke amadodana kaLeya aba okhokho bezizwe zakwa-Israyeli. (Genesise 29:30-35; 30:16-21) Yeka indlela okufanele ukuba kwamduduza ngayo uLeya ukukhathalela kothando kukaNkulunkulu!
Ezweni elisha elithenjiswe emiBhalweni, akekho oyozizwa engathandwa. Kunalokho, uthando lweqiniso luyoba kuwo wonke umphakathi wesintu. (Isaya 11:9; 1 Johane 4:7-12) Ngakho-ke masibonise manje ukuthi sifuna ukuba lapho ngokuhlakulela uthando olufundiswa yiBhayibheli futhi oluye lwaboniswa uMlobi walo. Yebo, injabulo yangempela ayikho nje ekuthandweni kodwa ekuboniseni uthando olungenabugovu kwabanye.—Mathewu 5:46-48; 1 Petru 1:22.
[Amazwi acashunwe esihlokweni ekhasini 8]
“Kukhona injabulo eyengeziwe ekupheni kunasekwamukeleni.”—IzEnzo 20:35
[Isithombe ekhasini 8]
Uma ufuna ukuthandwa, bonisa uthando kwabanye