Kwenzekani KuPeter Omncane?
NGUMLOBELI WE-PHAPHAMA! E-ECUADOR
I-PHAPHAMA! ka-March 22, 1971, yayinesihloko esithi “Ukuhlinzwa Kwenhliziyo Ngaphandle Kokumpontshelwa Kwegazi.” Yalandisa indaba yomfana waseCanada oneminyaka engu-7 ubudala okuthiwa uPeter, okwakudingeka ahlinzwe ukuze kusindiswe ukuphila kwakhe ngo-1963.
Udokotela kaPeter wathi kwakunenqubo yokuhlinza eyayingelapha i-valve yenhliziyo yakhe eyonakele. Kodwa lapho abazali bakaPeter bemyisa kudokotela onguchwepheshe futhi bebuza ukuthi wayengamhlinza yini ngaphandle kokusebenzisa igazi, lo dokotela waphendula: “Cha. Yinto engeke yenzeke. Ngiyayazi into engikhuluma ngayo.”
Ngaphandle kokudangala, abazali bakaPeter baqhubeka nokufuna futhi ekugcineni bathola udokotela owayezimisele ukumhlinza ngaphandle kokusebenzisa igazi. Kwahamba kanjani? Nakuba uPeter ahlinzwa ngokuphumelelayo, abazali bakhe batshelwa ukuthi ngokuhamba kwesikhathi kwakuzobonakala ukuthi ukuhlinza kwakube yimpumelelo kangakanani. Khona-ke, kwenzekani kuPeter omncane?
Lapho uPeter eneminyaka engu-13, yena nomkhaya wakubo bathuthela e-Ecuador, eNingizimu Melika, bayokhonza endaweni eyayinendingeko enkulu yabashumayeli bezindaba ezinhle zoMbuso kaNkulunkulu. (Mathewu 24:14) UPeter wabhapathizwa lapho eneminyaka engu-15 futhi waba iphayona elivamile (umshumayeli wesikhathi esigcwele) lapho eseneminyaka engu-18 ubudala. Lapho eseneminyaka engu-26 waba iphayona elikhethekile, wakhonza emzaneni oqhele ngamamitha angu-3 000 ngaphezu kogu lolwandle e-Andes. Ngo-1988, lapho eneminyaka engu-31 ubudala, uPeter nomkakhe, u-Isabel, waqala ukukhonza njengommeleli ojikelezayo we-Watch Tower Society. Uyaqhubeka enza lo msebenzi kuze kube namuhla, evakashela ibandla elihlukile isonto ngalinye ukuze alikhuthaze.
Ngokuqinisekile, uPeter uphila ukuphila okumatasa, futhi asikho isidingo sokuba aphinde ahlinzwe. Yeka ukuthi yena nezinkulungwane zabanye oFakazi bakwazisa kanjani ukubambisana nodokotela abanekhono abaye bawahlonipha amalungelo eziguli zabo!
[Isithombe ekhasini 23]
Lapho uPeter eneminyaka engu-7 ubudala, ngemva nje kokuhlinzwa
[Isithombe ekhasini 23]
UPeter no-Isabel Johnston namuhla