Ubukeka Kanjani UDeveli?

Impendulo YeBhayibheli

UDeveli ungumuntu ongumoya, okusho ukuthi ngeke ukwazi ukumthinta.—Efesu 6:11, 12.

Indlela ejwayelekile uDeveli achazwa ngayo ephethe imfoloko. Ubukeka njengesilwane esisambuzi enezimpondo nomsila.

Abantu bavame ukuchaza uDeveli njengesilwane esithile esisambuzi enezimpondo nomsila futhi esiphethe imfoloko. Abanye bathi le ndlela achazwa ngayo yaqalwa abadwebi bezinto ezikhuluma ngeBhayibheli cishe nabo ababethonywe yizinkolelo ezazixoxwa emphakathini noma yizinto ezithile zasendulo.

Limchaza kanjani iBhayibheli uSathane?

IBhayibheli lisebenzisa iziqhathaniso kaningi uma likhuluma ngoDeveli. Lokhu kusisiza siqonde ubuntu bakhe hhayi ukubukeka kwakhe. Nazi ezinye iziqhathaniso:

Ingelosi yokukhanya. Wenza sengathi kukhona okuhle angakunikeza abantu ukuze azame ukubenza balandele izimfundiso zakhe kunokuba balandele ezikaNkulunkulu.—2 Korinte 11:14.
Ibhubesi elibhongayo. Uhlasela abakhulekeli bakaNkulunkulu ngesihluku.—1 Petru 5:8.
Udrako omkhulu. Mubi, unamandla, uyaqothula.—IsAmbulo 12:9.

Amavesi eBhayibheli akhuluma ngoDeveli

2 Korinte 11:14: “USathane ulokhu ezenza ingelosi yokukhanya.”

Incazelo: USathane ushaya sengathi ungumuntu okahle, ukuze adlale ngabantu abenze balandele izimfundiso zakhe kunokuba balandele ezikaNkulunkulu.
Efesu 6:11: “Gqokani zonke izembatho zempi ezivela kuNkulunkulu ukuze nikwazi ukumelana ngokuqinile namaqhinga kaDeveli.”

Incazelo: UDeveli unamaqhinga okwenza abantu bangamlaleli uNkulunkulu.
Jakobe 4:7: “Zithobeni kuNkulunkulu; kodwa melanani noDeveli khona-ke uyonibalekela.”

Incazelo: Umuntu angamnqoba uSathane ngokuthi alalele uNkulunkulu kunokulalela uDeveli.
1 Petru 5:8: “Isitha senu, uDeveli, sizulazula njengebhubesi elibhongayo, sifuna esingashwabadela.”

Incazelo: UDeveli uyabazonda labo abalalela uNkulunkulu futhi ufuna ukuqeda ubungane babo noNkulunkulu.