Indlela UJehova Aphendula Ngayo Imithandazo Yethu

1-2. Yini esingase sizibuze yona uma kuziwa emithandazweni yethu?

KWAKE kwenzeka yini wazibuza: ‘Kazi uJehova uyayiphendula yini imithandazo yami?’ Uma kwake kwenzeka, awuwedwa. Abafowethu nodadewethu abaningi bake bazibuza lo mbuzo, ikakhulukazi lapho bebhekene nezikhathi ezinzima. Uma sibhekene nezikhathi ezinzima, kungase kungabi lula nakithi ukubona indlela uJehova aphendula ngayo imithandazo yethu.

² Ake sixoxe ngokuthi kungani singaqiniseka ukuthi uJehova uyayiphendula imithandazo yezikhonzi zakhe. (1 Joh. 5:15) Sizoxoxa nangale mibuzo: Kungani ngezinye izikhathi kungabonakala sengathi uJehova akayiphenduli imithandazo yethu? Uyiphendula ngaziphi izindlela imithandazo namuhla?

UJEHOVA ANGASE ANGASIPHENDULI NGENDLELA ESIYILINDELE

3. Kungani uJehova efuna sithandaze kuye?

³ ImiBhalo isiqinisekisa ngokuthi uJehova usithanda kakhulu futhi siyigugu kuye. (Hag. 2:7; 1 Joh. 4:10) Yingakho esikhuthaza ukuba sithandaze kuye, sicele usizo. (1 Pet. 5:6, 7) Ufuna ukusisiza sihlale sisondelene naye, sikwazi ukubhekana ngokuphumelelayo nezinkinga.

4. Sazi kanjani ukuthi uJehova uyayiphendula imithandazo yezikhonzi zakhe? (Bheka nesithombe.)

⁴ EBhayibhelini sivame ukufunda ngokuthi uJehova wayiphendula imithandazo yezikhonzi zakhe. Sikhona isibonelo osikhumbulayo? Esinye sazo iNkosi uDavide. Wayenezitha eziningi eziyingozi kukho konke ukuphila kwakhe futhi wayevame ukuthandaza kuJehova acele usizo. Ngesinye isikhathi, wancenga uJehova wathi: “O Jehova, yizwa umthandazo wami; lalela lapho ngikhalela usizo. Ngokwethembeka kwakho nangokulunga kwakho, ngiphendule.” (IHu. 143:1) UJehova wawuphendula umthandazo kaDavide wokucela ukuba akhululwe. (1 Sam. 19:10, 18-20; 2 Sam. 5:17-25) UDavide wayengawasho ngokuqiniseka la mazwi: “UJehova useduze nabo bonke abambizayo.” Nathi singaqiniseka ngalokho.​—IHu. 145:18.

5. Ingabe imithandazo yezikhonzi zikaJehova zesikhathi esidlule yayiphendulwa ngendlela eziyilindele ngaso sonke isikhathi? Nikeza isibonelo. (Bheka nesithombe.)

⁵ UJehova angase angayiphenduli imithandazo yethu ngendlela esiyilindele. Yilokho okwenzeka kumphostoli uPawulu. Wacela uNkulunkulu ukuba asuse “iva enyameni.” UPawulu wathandaza kathathu ngale nkinga. UJehova wayiphendula yini leyo mithandazo? Yebo, kodwa hhayi ngendlela uPawulu ayeyilindele. Kunokuba ayiqede leyo nkinga, uJehova wamnika amandla ayewadinga ukuze aqhubeke emkhonza ngokwethembeka.​—2 Kor. 12:7-10.

6. Ngezinye izikhathi, kungani kungabonakala sengathi uJehova akayiphenduli imithandazo yethu?

⁶ Ngezinye izikhathi nathi singase sithole impendulo ehlukile kwebesiyilindele. Singaqiniseka ngokuthi uJehova uyayazi indlela engcono kakhulu yokusisiza. ‘Angenza nokungaphezu kakhulu kwazo zonke izinto esizicelayo noma esizicabangayo.’ (Efe. 3:20) Ngenxa yalokho, impendulo yemithandazo yethu ingafika ngesikhathi noma ngendlela esingayilindele.

7. Kungani kungase kudingeke sikushintshe esikuthandazelayo? Nikeza isibonelo.

⁷ Lapho siyiqonda ngokwengeziwe intando kaJehova, kungase kudingeke sikushintshe esikuthandazelayo. Cabanga ngesibonelo sikaMartin Poetzinger. Lapho nje eqeda kushada, uMfoweth’ uPoetzinger waboshwa wafakwa ekamu lokuhlushwa lamaNazi. Ekuqaleni wacela uJehova ukuba amkhulule ekamu ukuze akwazi ukunakekela umkakhe, aphinde aqhubeke nokushumayela. Kodwa ngemva kwamasonto amabili kwacaca ukuthi akukho okwakubonisa ukuthi uJehova uzomkhulula. Ngakho waqala ukuthandaza wathi: “Jehova, ngicela ungibonise lokho ofuna ngikwenze.” Wabe esecabanga ngalokho abanye abafowabo abasekamu ababebhekene nakho. Abaningi babo babekhathazeke kakhulu ngomkabo nezingane zabo. UMfoweth’ uPoetzinger wabe esethandaza: “Jehova, ngiyabonga ngesabelo sami esisha. Ngicela ungisize ngiqinise abafowethu futhi ngibakhuthaze.” Kwaphela iminyaka engu-9 enza lokho kanye ekamu!

8. Yini ebalulekile okufanele siyikhumbule lapho sithandaza?

⁸ Kumele sikhumbule ukuthi uJehova unenjongo, futhi uzoyifeza ngesikhathi asimisile. Leyo njongo ihlanganisa ukuqeda ngokuphelele zonke izinkinga ezibangela inhlupheko engaka namuhla, zingaphinde zibe khona​—izinkinga ezifana nezinhlekelele zemvelo, ukugula nokufa. UJehova uzosebenzisa uMbuso wakhe ukuze afeze injongo yakhe. (Dan. 2:44; IsAm. 21:3, 4) Kodwa singakafiki leso sikhathi, uJehova uvumela uSathane ukuba abuse umhlaba.b (Joh. 12:31; IsAm. 12:9) Ukube uJehova ubengaxazulula izinkinga zesintu manje, bekungabonakala sengathi ukubusa kukaSathane kuyaphumelela ngezinga elithile. Ngakho, nakuba kumele silinde ukuba uJehova agcwalise izithembiso ezithile, lokho akusho ukuthi akasisizi njengamanje. Ake sixoxe ngezinye zezindlela uJehova asisiza ngazo.

IZINDLELA UJEHOVA APHENDULA NGAZO IMITHANDAZO YETHU NAMUHLA

9. UJehova angasisiza kanjani lapho kudingeka senze izinqumo? Fanekisa.

⁹ Usinika ukuhlakanipha. UJehova uthembisa ukuthi uzosinika ukuhlakanipha esikudingayo ukuze senze izinqumo ezinhle. Sikudinga nakakhulu ukuhlakanipha kukaNkulunkulu lapho senza izinqumo ezizothinta ukuphila kwethu konke, njengokuthi sizoshada yini noma sizohlala singashadile. (Jak. 1:5) Cabanga ngesibonelo sikadade ongashadile okuthiwa uMaria.c Wayekhonza njengephayona elivamile futhi ejabule ngesikhathi ehlangana nomzalwane othile. Uthi: “Njengoba sasiya siba abangani abasondelene kakhulu, nemizwa yethu nayo yaba namandla kakhudlwana. Ngangazi ukuthi kudingeka ngenze isinqumo. Ngathandaza kaningi ngale ndaba. Ngangidinga isiqondiso sikaJehova, kodwa futhi ngangazi ukuthi uJehova ngeke angenzele isinqumo.” Unomuzwa wokuthi uJehova wayiphendula imithandazo yakhe yokucela ukuhlakanipha. Wayiphendula kanjani? Njengoba ayecwaninga ezincwadini zethu, wathola izihloko ezithile ezamsiza wathola izimpendulo zemibuzo ayenayo. Walalela neseluleko esihlakaniphile sikamama wakhe othembekile. Leso seluleko samsiza uMaria wahlolisisa imizwa yakhe. Ekugcineni wakwazi ukwenza isinqumo esihlakaniphile.

10. NgokweyabaseFilipi 4:13, yini uJehova ayenzayo ukuze asize izikhonzi zakhe? Nikeza isibonelo. (Bheka nesithombe.)

¹⁰ Usinika amandla okukhuthazela. UJehova uzosinika amandla esiwadingayo ukuze sikhuthazelele uvivinyo, njengoba nje anika nomphostoli uPawulu. (Funda eyabaseFilipi 4:13.) Cabanga ngendlela uJehova asiza ngayo umzalwane okuthiwa uBenjamin ukuba akhuthazelele izimo ezinzima. Ngesikhathi esemncane, uBenjamin nomndeni wakubo babehlala emakamu ababaleki e-Afrika. UBenjamin uthi: “Ngangithandaza njalo kuJehova ngimcela ukuba angiphe amandla okwenza okumjabulisayo. UJehova wayiphendula imithandazo yami ngokunginika ukuthula kwengqondo, isibindi sokuba ngiqhubeke ngishumayela nezincwadi ezangisiza ngahlala ngisondelene naye.” Uyaqhubeka athi: “Ukufunda ngalokho okwenzeka kwabanye oFakazi nendlela uJehova abasiza ngayo bakhuthazela kwangenza ngazimisela nakakhulu ukuhlale ngithembekile.”

11-12. UJehova angabasebenzisa kanjani esikhonza nabo ukuze aphendule imithandazo yethu? (Bheka nesithombe.)

¹¹ Usebenzisa esikhonza nabo. Ngobusuku bangaphambi kokuba anikele ngokuphila kwakhe, uJesu wathandaza ngokujulile. Wancenga uJehova ukuba amsize angabhekwa njengomhlambalazi. Kunokuba enze lokho, uJehova wasiza uJesu ngokuthumela omunye wabafowabo abayizingelosi ukuba amqinise. (Luka 22:42, 43) Nathi uJehova angasisiza ngokuthi omunye wabafowethu nodadewethu asifonele noma asivakashele ukuze asikhuthaze. Sonke singafuna amathuba okusho “izwi elihle” kwesikholwa nabo.​—IzAga 12:25.

¹² Cabanga ngokwenzeka kudade okuthiwa uMiriam. Ngemva kwamasonto ambalwa eshonelwe umyeni wakhe, uMiriam wayehleli yedwa ekhaya, edabukile futhi ecindezelekile. Wayekhihla isililo, edinga umuntu azokhuluma naye. Uthi: “Ngangingenawo amandla okufonela othile, ngakho ngathandaza kuJehova. Ngesikhathi ngisakhala futhi ngithandaza, ucingo lwami lwakhala. Kwakungumdala, umngani othandekayo.” UMiriam waduduzwa yilowo mdala nomkakhe. Uyaqiniseka ukuthi nguJehova owabangela lo mzalwane ukuba amfonele.

13. Yisho isibonelo sendlela uJehova angasebenzisa ngayo abantu abangamkhonzi ukuze aphendule imithandazo yethu.

¹³ Angase asebenzise abantu abangamkhonzi. (IzAga 21:1) Ngezinye izikhathi, uJehova uphendula imithandazo yabantu bakhe ngokwenza abantu abangamkhonzi ukuba babasize. Ngokwesibonelo, wabangela iNkosi u-Aritahishashita ukuba ivumele uNehemiya abuyele eJerusalema ukuze asize ekwakheni kabusha lelo dolobha. (Neh. 2:3-6) Nanamuhla, uJehova angenza ngisho nalabo abangamkhonzi ukuba basisize lapho sidinga usizo.

14. Yini oyithandile endabeni kaSoo Hing? (Bheka nesithombe.)

¹⁴ Udade okuthiwa uSoo Hing wabona ukuthi uJehova wamsiza esebenzisa udokotela. Indodana yakhe inezinkinga zempilo eziningana ezithinta ingqondo. Ngesikhathi indodana yabo yehlelwa ingozi enyantisayo, yena nomyeni wakhe besula emsebenzini ukuze bayinakekele. Ngenxa yalokho, baba nezinkinga zezimali. USoo Hing wezwa sengathi isimo sase singaphezu kwamandla. Wathululela isifuba sakhe kuJehova, emcela ukuba abasize. Udokotela wazama izindlela zokubasiza. Ngenxa yalokho, bathola usizo lukahulumeni nendawo yokuhlala engabizi. Kamuva, uSoo Hing wathi: “Sayibona indlela uJehova asisiza ngayo. Ngempela ‘uyayilalela imithandazo.’”​—IHu. 65:2.

UKUQAPHELA NOKWAMUKELA IMPENDULO KAJEHOVA KUDINGA UKHOLO

15. Yini eyasiza omunye udade wabona ukuthi uJehova wayeyiphendula imithandazo yakhe?

¹⁵ Imithandazo yethu ayivamile ukuphendulwa ngezindlela eziyisimangaliso. Kodwa izimpendulo esizitholayo zisuke ziyilokho kanye esikudingayo ukuze sihlale siqotho kuBaba wethu osezulwini. Ngakho, yiqaphele indlela uJehova aphendula ngayo imithandazo yakho. Udade okuthiwa uYoko wayecabanga ukuthi uJehova akayiphenduli imithandazo yakhe, kodwa wabe eseqala ukuzibhala phansi izinto ayezicela kuJehova. Lapho sekudlule isikhathi esithile, wabheka lapho ayebhale khona, wabona ukuthi uJehova wayeyiphendulile imithandazo yakhe eminingi, ngisho neminye ayeseyikhohliwe. Nathi kuyadingeka sidamane sima sicabange ngendlela uJehova aphendula ngayo imithandazo yethu.​—IHu. 66:19, 20.

16. Singalubonisa kanjani ukholo uma kuziwa endabeni yomthandazo? (Hebheru 11:6)

¹⁶ Ukholo asigcini nje ngokulubonisa ngokuthandaza kuJehova kuphela, kodwa silubonisa nangokwamukela indlela aphendula ngayo imithandazo yethu, noma ngabe uyiphendula kanjani. (Funda eyamaHebheru 11:6.) Cabanga ngesibonelo sikaMike nomkakhe, uChrissy. Babenomgomo wokuyokhonza eBethel. UMike uthi: “Kwaphela iminyaka eminingi sifaka izicelo futhi sithandaza kaningi kuJehova ngalo mgomo, kodwa asibizwanga.” Babelokhu beqiniseka ngokuthi uJehova uyazi ukuthi iyiphi indlela angabasebenzisa ngayo kangcono enkonzweni yakhe. Baqhubeka benza konke okusemandleni, bekhonza njengamaphayona avamile endingekweni, besiza nasekwakheni izakhiwo ​zenhlangano. Namuhla bayajikeleza. UMike uthi: “UJehova akazange aphendule imithandazo yethu ngendlela ebesiyilindele ngaso sonke isikhathi, kodwa yena uyiphendulile, wayiphendula ngezindlela ezingcono kakhulu kunalokho esasikulindele.”

17-18. NgokweHubo 86:6, 7, yini esingaqiniseka ngayo?

¹⁷ Funda iHubo 86:6, 7. Umhubi uDavide wayeqiniseka ukuthi uJehova wayizwa futhi wayiphendula imithandazo yakhe. Nawe ungaqiniseka njengaye. Izibonelo okuxoxwe ngazo kulesi sihloko zisiqinisekisa ngokuthi uJehova angasinika ukuhlakanipha namandla esiwadingayo ukuze sikhuthazele. Angase asebenzise esikhonza nabo noma ngisho nabantu abangakamkhonzi ukuba basisize ngandlela-thile.

¹⁸ Nakuba uJehova engase angayiphenduli ngaso sonke isikhathi imithandazo yethu ngendlela esiyilindele, siyazi ukuthi uzoyiphendula. Uzosinika esikudingayo ngaso kanye isikhathi esikudinga ngaso. Ngakho, qhubeka uthandaza unokholo lokuthi uJehova uzokuzwa, uqiniseka ngokuthi uzokunakekela manje nokuthi ‘uzokwanelisa isifiso sayo yonke into ephilayo’ ezweni elisha elizayo.​—IHu. 145:16.